ЎЗБЕКИСТОННИ, АМУ ЭЛИНИ ЎЗИГА ВАТАН КИЛГАН ОТАХОН

Жамиятимизда миллатлараро ҳамжиҳатлик ва тотувликни мустаҳкамлаш, барча фуқароларга миллати ва диний эътиқодидан қатъий назар, тенг ҳуқуқ ва имкониятлар яратиш давлатимиз сиёсатининг энг муҳим устувор йўналишларидан бири сифатида белгиланган.

Юртимизнинг барча ҳудудларида бўлгани каби Амударё туманида ҳам 30 дан ортиқ турли миллат ва элат вакиллари ўзаро тинч-тотув ва бирдамликда юрт равнақи, эл фаровонлигига муносиб ҳисса қўшиб яшаб келмоқдалар.

Туманимизнинг Куюк кўпир овулида истиқомат қилувчи қозоқ миллатига мансуб Қазиевлар оиласи нафақат овулдаги, балки тумандаги энг намунали оилалардан бири. Файзга тўла уй олдида очилиб турган чиройли гуллар билан бурканган боғли ҳудудга қадам қўйганингизданоқ бу ерда нақадар меҳнаткаш, яратувчан инсонлар истиқомат қилишини ҳис этасиз. Томорқада ёзги сабзавотлар етилган, мевасидан шохлари эгилиб турган узум, олма, нок, шафтоли дарахтларини томоша қилишнинг завқи бўлакча. Худди она заминимизнинг саховати шу бир парча ерда акс этиб тургандай.

Узоқ йиллар заҳматли касбда ишлаган, ёши саксондан ошиб кетган оила бошчиси Мингтурған ота ҳам болалари билан бирга меҳнат қилади, уларга йўл-йўриқ кўрсатади. Экин, молларга қарашиб, ўз меҳнатидан завқ олади.

Мингтурған Казиевнинг ота-оналари ҳам шу юртни Ватаним, халқини қон-қардошим, деб яшаган инсонлардан бўлган. Отахон 1936 йилда шу овулда туғилган. Барча имкониятлар яратилган шундай жаннатмакон юртда камолга етиб, Ватан равнақига муносиб ҳисса қўшди. У 1954 йили олийгоҳни тугатиб, ҳозирги 2-сонли мактабда ўқитувчи бўлиб иш бошлади. Кейинчалик 1964 йилда Куюк кўпир овулида жойлашган 19-сонли мактабга директор лавозимига тайинланди.

1968 йилгача ўқувчиларга физика-математика фанларидан дарс берди. Сўнгра, 1969 йили ҳозирги 2-сонли мактабга илмий бўлим мудири этиб тайинланди. Иш фаолиятининг сўнгги йилларида Мингтурған ота 19-сонли мактабда ўқитувчилик қилди. Турмуш ўртоғи билан бешта қиз, иккита ўғилни вояга етказди. Ҳозирда улар ўзларининг фаол хизматлари, улкан тажрибалари билан танилган етук мутахассислар бўлиб етишиб, Ватанимиз равнақи йўлида меҳнат қилаётган, бой амалий тажрибаси билан ёшларга ўрнак бўлаётган инсонлардир.

Катта фарзанди Динар Қазиева Тошкент Давлат Жаҳон тиллари Университетини тугатиб, ўз соҳаси бўйича фаолият олиб борди. Иккинчи фарзанди Айбўпе Қазиева мактабгача таълим соҳаси ходими, Гулнор Қазиева эса 19-сонли мактабда бошланғич синф ўқитувчиси. Қайрат Қазиев туман Тиббиёт бирлашмаси тез тиббий ёрдам бўлимида шифокор, қизи Халдан Қазиева Тошкент шаҳар Санитария-эпидемиологик осойишталик маркази  жамоат саломатлиги бўлими мудираси, яна бир ўғли Муҳит Қазиев 19-сонли мактабда хўжалик ишлари бўйича ишчи-ходим, кичик қизи Рая Қазиева уй бекаси. Мингтурған отанинг келинлари Мая Қаландарова тиббиёт ходими, Айгул Нуришбоева эса ҳозирда 19-сонли мактабда ўқувчиларга таълим-тарбия бериб келмоқда.

Мустақилликнинг илк йилларида Мингтурған отанинг кўп қариндошлари Қозоғистонга кўчиб кетишди. Унга ҳам юр, кетамиз, деганлар кўп бўлган экан. Бироқ у ҳеч қаерга кетмасдан, шу ерда яшашни маъқул кўрди. Чунки, устоз деб бошига кўтаргувчи шогирдларини, оға-инидай қадрдон овулдошларини ташлаб кетгиси келмади. Шу юртдаги тинч-осойишталикни, бир-бировга бўлган ғамхўрлик, меҳр-оқибатлиликни бошқа бирор жойдан топа олишига кўзи етмади.

Отахон айтганидек, овулда яшаётган қозоқ миллати вакиллари тўй-маъракалардан бошқа вақтда ҳам уйига меҳмон келса, яхши кутиб олиб, борини дастурхонга қўяди. Энг тансиқ таомлари билан дастурхонни тўлдиради. Ўғил-қизларини вояга етгунича, бирор ҳунарга ўргатишади.

Ёшлигидан уларга ердан унумли фойдаланишни, чорвачилик билан шуғулланишни ўргатади. Овул ёшларининг саводи чиқишига меҳнати сингган, уларга хат-савод ўргатган Мингтурған отанинг бугун овулда ҳурмати баланд. Меҳнатларининг роҳатини кўриб, кексалик гаштини суриб яшаётган нуронийлардан бири Мингтурған отанинг оиласи қишлоқдаги ибратли оилалардан. Фарзандларини ҳам юрт корига ярайдиган инсонлар қилиб тарбиялаган ота ҳозир нафақат ўғил-у келинлари, балки элнинг ҳам ардоғида.

Отахон ер юзидаги турфа хил маданиятлар гуллаб-яшнаётган мамлакатлардан бири – Ўзбекистонда яшаётганидан ҳамиша фахрланади.

Севара Исмоилова.