Хайрия тадбири доирасида эҳтиёжманд оилалар ва нуронийлар ҳолидан хабар олинди
Хотин-қизларнинг жисмоний соғлиғи ва руҳий хотиржамлиги ҳар бир оиланинг мустаҳкамлигини белгилайдиган асосий омиллардан саналади. Шу боис мамлакатимизда аёлларни қўллаб-қувватлаш ҳамда оилавий муносабатларда ҳуқуқбузарликларнинг олдини олиш йўналишида профилактик ва тарғибот ишлари изчил амалга оширилмоқда.
Бундай ишлар айниқса маҳалла даражасида самара беради, чунки айнан шу ерда ҳар бир оиланинг эҳтиёжи, ҳар бир аёлнинг ташвиши яққол кўринади. Амударё туманида ҳам ана шундай тарғибот тадбирлари узлуксиз давом этмоқда ва уларга фаол фуқаролар, жамоат ташкилотлари ҳамда тадбиркорлар кенг жалб қилинмоқда.
Хусусан, туман Ички ишлар бўлимининг жамоат хавфсизлиги хизмати ҳуқуқбузарликлар профилактикаси бўлинмаси катта инспектори, катта лейтенант Инобат Ўрозматова туманнинг Бой овул маҳалласида фаолият юритувчи «HUMO YOGA FITNES» спорт-соғломлаштириш маркази тренери Раъно Ниязимбетова ва унинг гуруҳи билан ҳамкорликда хайрия тадбирини ташкил этишди.
Тадбир доирасида туманнинг Олмазор маҳалласи ва Ўрта қала овулида истиқомат қилувчи ижтимоий аҳволи оғир оилалардан хабар олинди. Иштирокчилар шу тоифага кирувчи оилаларга ташриф буюриб, уларнинг турмуш шароити ва муаммолари билан яқиндан танишдилар ҳамда зарур маслаҳатлар бердилар. Ташриф чоғида оилаларга тарқатма материаллар ҳам топширилди.
Шунингдек, маҳаллада яшовчи нуроний онахонларнинг ҳам ҳолидан хабар олинди. Уларнинг ҳар бири билан алоҳида профилактик суҳбатлар ўтказилиб, тарқатма материаллар ва совға-саломлар топширилди. Суҳбатлар давомида кексаларнинг соғлиғи, оилаларидаги аҳвол ва кундалик эҳтиёжлари ўрганилди.
Ташкилотчиларнинг таъкидлашича, бундай тадбирларни ўтказишдан асосий мақсад тумандаги хотин-қизларнинг саломатлигини янада яхшилаш, уларни салбий ҳиссиётлар ва руҳий босимдан халос этишдан иборат. Зеро, ўз соғлиғига эътиборли, руҳан тетик аёл оиласида ҳам, жамиятда ҳам муваффақиятли фаолият юрита олади. Йога ва фитнес машғулотлари ҳам соғлом турмуш тарзининг муҳим қисми сифатида тарғиб қилинмоқда.
Тадбирнинг яна бир муҳим йўналиши ҳозирги кунда долзарб бўлиб турган оила ва турмуш доирасидаги ҳуқуқбузарлик ҳамда жиноятларнинг олдини олиш масаласи бўлди. Иштирокчиларга оила-турмуш соҳасидаги ҳуқуқбузарлик ва жиноятларнинг салбий оқибатлари, уларнинг оила мустаҳкамлиги ва фарзандлар тарбиясига таъсири ҳақида батафсил тушунчалар берилди, тарқатма материаллар орқали бу борадаги маълумотлар янада мустаҳкамланди.
Айтиш жоизки, тадбир давомида айни пайтда пахта хирмонига ўзининг фидокорона меҳнати билан ҳисса қўшаётган аёллар ва қизлар ҳам эътибордан четда қолмади. Ташкилотчилар теримчи аёлларнинг кайфиятини кўтариш мақсадида уларга ҳам совға-саломлар топширди, бу эса мавсумий иш билан банд аёлларга алоҳида эътибор қаратилаётганидан далолат беради.
Макур ҳайрия тадбири фақат моддий ёрдам кўрсатиш билан чекланмади: у соғлом турмуш тарзини тарғиб қилиш, ҳуқуқий саводхонликни ошириш ва маҳалладаги ижтимоий муҳитни соғломлаштиришни бир вақтнинг ўзида қамраб олди. Спорт-соғломлаштириш маркази жамоаси билан ҳамкорлик эса тарғибот ишларига янги, замонавий шакл бахш этди.
Туманда бу каби тадбирлар келгусида ҳам бошқа маҳаллаларни қамраб олган ҳолда давом эттирилади. Аёлларнинг саломатлиги ва ҳуқуқий онгини юксалтиришга қаратилган ҳар бир қадам эса пировардида оилалар мустаҳкамлиги, жиноятчиликнинг камайиши ва маҳаллаларда тинч-тотув муҳит қарор топишига хизмат қилади.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
