Болажонларга йўл ҳаракати қоидалари ҳақида маълумотлар берилди
Мамлакатимизда 2022–2026 йилларга мўлжалланган “Хавфсиз ва равон йўл” умуммиллий дастури доирасида йўл ҳаракати хавфсизлигини таъминлаш ва йўл-транспорт ҳодисаларининг олдини олиш борасида изчил ишлар олиб борилмоқда. Бу йўналишда эътибор нафақат ҳайдовчиларга, балки йўлнинг энг ҳимоясиз иштирокчилари ҳисобланган болаларга ҳам қаратилиб, уларда хавфсиз ҳаракатланиш маданиятини эрта ёшдан шакллантиришга алоҳида аҳамият берилмоқда.
Маълумки, кичик ёшда ўзлаштирилган кўникмалар инсон онгида узоқ сақланиб, вақт ўтиши билан кундалик одатга айланади. Шу боис мактабгача таълим муассасаларида йўл ҳаракати қоидаларини болаларга тушунарли шаклда ўргатиш уларнинг ҳаёти ва соғлигини асрашга қаратилган энг самарали профилактик чоралардан бири ҳисобланади.
Ана шу мақсадда Қўнғирот туманидаги мактабгача таълим ташкилотларида тарбияланувчилар учун йўл ҳаракати қоидалари бўйича тарғибот тадбирлари ўтказилмоқда. Ундан кўзланган асосий мақсад кичкинтойларга қоидаларни ёшликдан сингдириш, уларда кўча-йўлларда хавфсиз ҳаракатланиш кўникмаларини шакллантиришдан иборат.
Машғулот давомида болажонларга светофор ишоралари, пиёдалар учун белгиланган ўтиш жойларидан фойдаланиш тартиби ҳамда кўча-йўлларда ҳаракатланиш қоидалари содда ва тушунарли тарзда тушунтириб берилди. Мавзуларнинг кичкинтойлар ёшига мос услубда етказилиши уларнинг мураккаб тушунчаларни осонроқ англаб, олган билимларини кундалик ҳаётда қўллай олишига имкон яратади.
Учрашув якунида болажонлар йўл ҳаракати қоидаларига доимо амал қилишга ва ўз хавфсизлигига эътиборли бўлишга чақирилди. Шу ўринда айтиш керакки, боланинг йўлдаги хавфсизлиги кўп жиҳатдан катталарнинг шахсий намунасига боғлиқ бўлиб, боғчада олинган билимларни оилада ҳам изчил мустаҳкамлаб бориш муҳим аҳамият касб этади.
Шу тариқа боғча хонасида ўрганилган ҳар бир қоида эртага кўчада ташланадиган ишончли қадамга айланади. Мактабгача ёшдаги болалар билан мунтазам олиб бориладиган бундай профилактик машғулотлар эса келажакда ўз ва ўзгалар ҳаётига масъулият билан қарайдиган, йўл маданияти юксак авлодни вояга етказишга хизмат қилади.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
