Тадбиркорлар ва ёшларга “Одил судлов – 2030” стратегияси ҳақида маълумотлар берилди

Фуқаронинг ҳуқуқлари қанчалик ишончли ҳимояланаётганини баҳолашда суд тизимига бўлган ишонч даражаси асосий мезон ҳисобланади, шу боис сўнгги йилларда мамлакатимизда суд-ҳуқуқ соҳасини ислоҳ қилиш, судлар фаолиятини очиқ ва шаффоф йўлга қўйиш давлат сиёсатининг устувор йўналишларидан бирига айланди.

Ўзбекистон Республикаси Президентининг 2026 йил 14 август кунги Фармонига мувофиқ “Одил судлов — 2030”: Янги Ўзбекистонда инсон ҳуқуқларини ишончли ҳимоя қилувчи халқчил ва адолатли суд тизимини барпо этиш стратегияси тасдиқланган.

Мазкур стратегиянинг мазмун-моҳиятини аҳолига етказиш мақсадида Амударё туман суди биносида туманнинг Фуқаролик ишлари ва Жиноят ишлари бўйича судлари раислари иштирокида йиғилиш ўтказилди. Тадбирда тадбиркорлар, банк ходимлари, ёшлар ва ички ишлар бўлими ходимлари қатнашди.

Йиғилишни Фуқаролик ишлари бўйича Амударё туман суди раиси Адилбек Сейтназаров очиб берди. У ўз нутқида суд-ҳуқуқ тизимини янада ислоҳ қилиш, фуқароларнинг ҳуқуқлари, эркинликлари ва қонуний манфаатларини ҳимоя қилиш бўйича амалга оширилаётган ишлар, шунингдек “Одил судлов — 2030”: Янги Ўзбекистонда инсон ҳуқуқларини ишончли ҳимоя қилувчи халқчил ва адолатли суд тизимини барпо этиш стратегиясининг мақсад ва вазифалари ҳақида батафсил тўхталди.

Жиноят ишлари бўйича Амударё туман суди раиси Жасурбек Балтабаев ўз чиқишида стратегия суд-ҳуқуқ ислоҳотларининг изчил давом этишини таъминлаш, қонун устуворлиги, мустақиллик, очиқлик ва самарадорлик тамойилларига жавоб берадиган замонавий суд тизимини шакллантириш, аҳолининг судларга ишончини мустаҳкамлаш мақсадида “Судлар — халқчил ва адолатли одил судлов қўрғони ва Янги Ўзбекистоннинг ҳақиқат устуни” шиори остида ишлаб чиқилганини қайд этди.

Таъкидланганидек, ислоҳотлар 6 та асосий йўналишда амалга оширилади: “Халқчил суд”, “Адолат қўрғони”, “Кафолатланган адолат”, “Адолат посбонлари”, “Рақамли одил судлов” ва “Халқаро эътироф”. “Халқчил суд” — судлар фаолиятининг шаффофлиги, суд жараёнлари ва суд фаолиятига оид ахборотдан фойдаланиш имкониятларини кенгайтириш орқали суд тизимининг очиқлигини таъминлаш ва жамиятда судга бўлган мутлақ ишончни қарор топтириш, судларни бюрократиядан бутунлай холи тизимга айлантиришни кўзда тутади.

Йиғилишда фуқаролик ва иқтисодий судларда суд медиацияси институти жорий этилиши, 2027 йил 1 июлдан айрим суд қарорларини қайта кўриб чиқиш ваколатига эга ҳудудлараро судлар ташкил этилиши, 2027–2030 йилларда эса фуқаролик ишлари бўйича туман ва шаҳар судлари босқичма-босқич тузилиши ҳақида маълумот берилди.

Жумладан, суд ишларини юритишда қоғоз шаклидан воз кечиш, ҳужжат айланмасини тўлиқ электрон кўринишга ўтказиш кўзда тутилгани, 2027 йил якунига қадар “my.sud.uz” портали такомиллаштирилиб, унинг янги мобил иловаси ишга туширилиши, процессуал ҳужжатларни тайёрлаш ва суд ҳужжатларини излаш имкониятлари кенгайтирилиши алоҳида таъкидлаб ўтилди.

Суд-ҳуқуқ соҳасидаги ислоҳотларнинг мазмунини аҳолига мана шундай очиқ мулоқотлар орқали етказиш ҳар бир фуқаронинг ўз ҳуқуқларини билиши ва улардан тўғри фойдаланишига имкон беради. Стратегияда белгиланган вазифаларнинг изчил бажарилиши эса қонун устуворлиги ва инсон қадри устувор бўлган замонавий суд тизимига эришишнинг амалий йўлини белгилайди.