Амударёда тадбиркорлар билан очиқ мулоқот бўлиб ўтди

Бугун мамлакатимизда тадбиркорликни ривожлантириш, аҳоли бандлиги ва даромадини ошириш, камбағалликни қисқартириш масалалари давлат сиёсатининг энг муҳим йўналишларидан бирига айланиб бормоқда. Чунки тадбиркорлик — бу шунчаки даромад топиш манбаи эмас. У янги иш ўринлари, оилалар фаровонлиги, маҳалла иқтисодий фаоллиги ва ҳудуд тараққиётининг муҳим омилидир.

Шу маънода, тадбиркорлар билан бевосита мулоқот қилиш, уларнинг муаммоларини эшитиш ва жойида ҳал этиш бугунги ислоҳотларнинг амалий ифодасидир.

Амударё тумани Маданият марказида тадбиркорлар ҳамда тадбиркорлик фаолиятини бошлаш истагидаги фуқаролар билан ташкил этилган очиқ мулоқот ҳам ана шундай мақсадга хизмат қилди.

Унда республика миқёсидаги вазирлик, банк ва ташкилотлар раҳбарлари, туман миқёсидаги масъуллар, амалдаги тадбиркорлар, ишбилармонлик фаолиятини йўлга қўйишни мақсад қилган фуқаролар иштирок этди.

Очиқ мулоқотни туман ҳокимининг биринчи ўринбосари Фаҳриддин Юсупов олиб борди.

Очиқ мулоқотнинг асосий мақсади берилаётган янги имконият ва имтиёзларни одамлар, тадбиркорлар ва янги бизнес бошлаш истагидаги фуқароларга етказиш, уларни амалий лойиҳаларга айлантиришдан иборат бўлди.

Мулоқот давомида тадбиркорларнинг мурожаатлари бирма-бир тингланди. Тадбиркорлар ўз фаолиятини юритиш ва кенгайтириш жараёнида дуч келаётган муаммолар, кредит ва молиявий масалалар, инфратузилма, ер ажратиш, мавжуд имкониятлардан фойдаланиш, фаолиятини ривожлантириш учун зарур шарт-шароитлар ҳамда бошқа долзарб масалалар юзасидан мурожаат қилдилар.

Айниқса, тадбиркор учун муаммонинг қоғозда эмас, амалда ҳал бўлиши муҳим. Чунки бирор лойиҳа ортида фақат тадбиркорнинг эмас, балки иш билан таъминланадиган фуқароларнинг, даромади ошадиган оилаларнинг тақдири туради. Шу нуқтаи назардан, очиқ мулоқотда кўтарилган ҳар бир масалага алоҳида эътибор қаратилди.

Тадбиркорлик фаолиятини бошлаш истагидаги фуқаролар ҳам ўзларини қизиқтирган саволлар билан масъулларга мурожаат қилиб, кредит, молиявий кўмак, бизнес лойиҳаларини шакллантириш, мавжуд дастурлардан фойдаланиш ва фаолиятини қонуний йўлга қўйиш борасида тегишли тушунтириш ва тавсиялар олдилар.

Мулоқотнинг яна бир муҳим жиҳати шундаки, унда иштирок этган масъул раҳбарлар фақат мурожаатларни тинглаш билан чекланиб қолмади.

Ҳар бир мутасадди ўз йўналиши бўйича тадбиркорлар учун яратилаётган янги имкониятлар, молиявий инструментлар, имтиёз ва қўллаб-қувватлаш механизмлари ҳақида батафсил маълумот берди.

Бу эса тадбиркорлар учун ўз фаолиятини ривожлантириш, ишлаб чиқаришни кенгайтириш, хизматлар кўламини ошириш, янги лойиҳаларни ишга тушириш ва қўшимча иш ўринлари яратиш имкониятларини янада кенгайтиради.

Таъкидлаш жоизки, бугунги ислоҳотларнинг мазмунида камбағалликни қисқартиришга янгича қараш шаклланмоқда.

Давлатимиз раҳбари жорий йилнинг 3 сентябрдаги йиғилишда камбағалликни қисқартиришни оилани барқарор даромад манбаига боғлаш, иш ўрни, инфратузилма ва муносиб шароит яратиш билан боғлиқ комплекс вазифа сифатида белгилади. Демак, масала фақат моддий ёрдам кўрсатиш билан тугамайди. Инсоннинг ўз меҳнати билан даромад топиши, касб эгаллаши, тадбиркорлик билан шуғулланиши, ўз бизнесини йўлга қўйиши учун шароит яратиш — энг асосий мақсад.

Мулоқот якунида билдирилган барча мурожаат ва таклифлар масъуллар томонидан тингланиб, уларни жойида ўрганиш, мавжуд муаммоларни қонунчилик доирасида ҳал этиш ва тадбиркорларга амалий кўмак кўрсатиш бўйича тегишли вазифалар белгиланди.

Чарос Арслонова, туман ҳокимлигининг Ахборот хизмати раҳбари.