Амударё туманида маънавий-маърифий ишлар самарадорлиги, мавжуд муаммолар муҳокама қилинди

Бугунги глобаллашув ва ахборот алмашинуви тобора жадаллашиб бораётган даврда жамиятда соғлом маънавий муҳитни шакллантириш, ёш авлодни миллий ва умуминсоний қадриятлар руҳида тарбиялаш, аҳолининг маънавий дунёқарашини юксалтириш долзарб вазифалардан бири ҳисобланади. Шу нуқтаи назардан, Амударё туманида маънавий-маърифий ишлар самарадорлигини ошириш, мавжуд вазифалар ижросини таҳлил қилиш ва келгусидаги устувор йўналишларни белгилашга бағишланган йиғилиш бўлиб ўтди.

Йиғилишда Қорақалпоғистон Республикаси Жўқорғи Кенгеси ҳузуридаги Маҳаллий ҳокимият вакиллик органлари ва давлат ташкилотлари фаолиятининг очиқлигини таъминлаш масалалари бўйича қўмита раиси Шарапат Отемисов, Амударё тумани ҳокими ўринбосари Жасур Яхшимов, тегишли давлат ва жамоат ташкилотлари раҳбарлари, маҳаллалардаги масъуллар иштирок этди.

Йиғилишда Амударё тумани Маънавият ва маърифат кенгашининг 2026 йилнинг ўтган 10 ойи давомида амалга оширган ишлари, ҳудудда ижтимоий-маънавий муҳит барқарорлигини таъминлашга қаратилган “Йўл харитаси” ижроси ҳамда маънавий-маърифий ва тарбиявий тадбирлар самарадорлигини ошириш масалалари атрофлича муҳокама қилинди.

Муҳокамалар давомида маънавий-маърифий ишларни шунчаки тадбирлар ташкил этиш билан чеклаб қўймасдан, уларнинг мазмуни, таъсирчанлиги ва амалий натижадорлигига алоҳида эътибор қаратиш лозимлиги таъкидланди. Чунки маънавий тарбия узлуксиз жараён бўлиб, у инсоннинг кундалик ҳаёти, меҳнат фаолияти, оилавий муносабатлари ва жамиятдаги ўрни билан чамбарчас боғлиқдир.

Шу боис корхона ва ташкилотларда маънавий-маърифий ишлар ҳолатини мунтазам ўрганиш, мониторинг тадбирларини тизимли ташкил этиш, белгиланган вазифалар ижросини назорат қилиш муҳим аҳамият касб этиши қайд этилди. Меҳнат жамоаларида соғлом маънавий муҳитни қарор топтириш, ходимларнинг ижтимоий фаоллиги ва маънавий дунёқарашини юксалтириш, китобхонлик маданиятини кенг тарғиб этиш борасидаги ишларни янада кучайтириш зарурлиги билдирилди.

Айниқса, бугунги мураккаб ахборот маконида ёшлар ва аҳолининг турли ёт ғоялар, зарарли ахборот хуружлари ҳамда маънавий таҳдидларга нисбатан мафкуравий иммунитетини мустаҳкамлаш устувор вазифалардан бири эканлиги алоҳида қайд этилди. Бу борада тарғибот ишларини замонавий ёндашувлар асосида ташкил этиш, аҳолига ишончли ва холис маълумотларни етказиш, ёшларни мустақил фикрлашга ўргатиш муҳимлиги таъкидланди.

Йиғилишда маҳаллалар, таълим муассасалари ва меҳнат жамоалари билан ҳамкорликни янада мустаҳкамлаш масаласига ҳам алоҳида эътибор қаратилди. Хусусан, ҳар бир ҳудуднинг ўзига хос хусусиятлари, аҳолининг эҳтиёжи ва ёшларнинг қизиқишларидан келиб чиқиб, маънавий-маърифий тадбирларни манзилли ташкил этиш зарурлиги билдирилди. Ўтказилаётган учрашув, давра суҳбатлари, маърифий мулоқотлар ва тарғибот тадбирлари қуруқ ҳисобот учун эмас, балки инсонлар дунёқарашида ижобий ўзгаришлар ясашга хизмат қилиши лозимлиги қайд этилди.

Шунингдек, маънавий-маърифий ишларнинг самарадорлигини баҳолашда тадбирлар сонидан кўра, уларнинг амалий натижаси, қамрови ва аҳоли онгига таъсирини асосий мезон сифатида белгилаш лозимлиги таъкидланди. Бу эса масъул ташкилотлардан ташаббускорлик, изчиллик ва ўзаро ҳамкорликни талаб этади.

Муҳокамалар якунида тегишли раҳбар ва масъулларга белгиланган вазифалар ижросини қатъий назоратга олиш, аниқланган камчиликларни бартараф этиш, мониторинг ишларини кучайтириш ҳамда ҳар бир йўналиш бўйича аниқ натижаларга эришиш юзасидан тегишли тавсия ва топшириқлар берилди.

Чарос Арслонова, туман ҳокимлигининг Ахборот хизмати раҳбари.