Амударё туманида куз-қиш мавсумига тайёргарлик ишлари ўрганилди

Аҳолини куз-қиш мавсумида табиий ва суюлтирилган газ билан барқарор таъминлаш, мавжуд газ инфратузилмасининг техник ҳолатини назорат қилиш ҳамда мавсум давомида юзага келиши мумкин бўлган муаммоларнинг олдини олиш мақсадида Амударё туманида ўрганиш ишлари олиб борилди.

Хусусан, Қорақалпоғистон Республикаси Ички ишлар вазири Бахтияр Торебеков туманда бўлиб, «Ҳудудгаз Қорақалпоғистон» газ таъминоти филиали «Амударётумангаз» газ таъминоти бўлими томонидан куз-қиш мавсумига тайёргарлик доирасида амалга оширилаётган ишлар билан танишди.

Ўрганиш жараёнида газ таъминоти тизимининг жорий ҳолати, истеъмолчиларни табиий ва суюлтирилган газ билан таъминлаш кўрсаткичлари, мавжуд газ тармоқларининг техник ҳолати ҳамда мавсумга тайёргарлик бўйича белгиланган чора-тадбирларнинг ижроси юзасидан маълумотлар тақдим этилди.

Қайд этилишича, бугунги кунда «Амударётумангаз» газ таъминоти бўлими томонидан жами 42 033 нафар истеъмолчига хизмат кўрсатилмоқда. Шундан 15 856 та хонадон ва 284 та улгуржи истеъмолчи табиий газ билан таъминланган. Шунингдек, 25 893 та аҳоли хонадонига суюлтирилган газ етказиб берилмоқда.

Туманда фойдаланишда бўлган газ тармоқларининг умумий узунлиги салкам 500 километрни ташкил этади. Жумладан, 35,1 километр юқори босимли, 152,9 километр ўрта босимли ва 311,6 километр паст босимли газ қувурлари мавжуд. Шундан 27,9 километри ер остидан, 471,7 километри эса ер устидан ўтказилган.

Шунингдек, аҳолини суюлтирилган газ билан таъминлаш борасида ҳам белгиланган режа асосида ишлар ташкил этилган. Жорий йилнинг январ–октябрь ойларига мўлжалланган 3 631 тонна суюлтирилган газ етказиб бериш режасига мувофиқ, бугунги кунга қадар 3 144 тонна газ истеъмолчиларга етказиб берилган.

Ўрганиш давомида мавжуд газ тармоқларининг соз ҳолатда сақланиши, уларнинг техник хавфсизлигини таъминлаш, газ таъминотида узилишларнинг олдини олиш, истеъмолчиларнинг мурожаатларини ўз вақтида кўриб чиқиш ҳамда юзага келиши мумкин бўлган носозликларга тезкор муносабат билдириш масалаларига алоҳида эътибор қаратилди.

Шу билан бирга, куз-қиш мавсумида газ таъминоти билан боғлиқ хавфсизлик талабларига риоя этилиши, газ ускуналаридан фойдаланиш қоидаларининг аҳоли ўртасида кенг тарғиб қилиниши ҳамда профилактик тадбирларнинг самарадорлигини ошириш муҳимлиги таъкидланди.

Ўрганиш якунида масъул ташкилотлар томонидан мавсум давомида газ таъминоти барқарорлигини таъминлаш, мавжуд имкониятлардан самарали фойдаланиш, аниқланган камчиликларни ўз вақтида бартараф этиш ва аҳоли манфаатларини таъминлаш борасидаги ишларни изчил давом эттириш зарурлиги қайд этилди.

Белгиланган чора-тадбирларнинг ўз вақтида ва сифатли амалга оширилиши куз-қиш мавсумини барқарор ўтказиш, аҳолининг табиий ҳамда суюлтирилган газга бўлган эҳтиёжини таъминлашда муҳим аҳамият касб этади.

Чарос Арслонова, туман ҳокимлигининг Ахборот хизмати раҳбари.