Йўл ҳаракати хавфсизлиги: кундалик хизмат ва устоз қадри

Йўлларда қатновнинг тиғизлашиши ҳайдовчилар ва пиёдалар учун қулай шароитлар яратиш, ҳаракат қоидаларига риоя этилишини таъминлаш масалалари соҳа ходимлари олдидаги энг долзарб вазифалардан саналади. Бу вазифани Амударё тумани ички ишлар бўлими жамоат хавфсизлиги хизмати, йўл ҳаракати хавфсизлиги бўлинмаси вакиллари ҳар куни шараф билан уддалаб келмоқда.

Бўлинма ходимларининг иш куни анъанавий тартибда бошланади: улар ҳар куни эрталаб ички ишлар бўлими биноси олдида сафланиб, жорий кун учун белгиланган вазифаларни муҳокама қилади ва раҳбариятдан тегишли топшириқларни олади. Шундан сўнггина ҳар бир ходим ўзига бириктирилган ҳудудга йўл олади.

Қайд этиш жоизки, 1 октябрь — Ўқитувчилар ва мураббийлар куни арафасида бўлинма ходимларининг навбатдаги иш куни бироз бошқачароқ бошланди. Яъни улар кундалик хизмат вазифалари билан бир қаторда, ўзларига касб сирларини ўргатган устозларини эслаш ва эъзозлашни ҳам ўринли деб билдилар.

Ходимлар соҳада узоқ йиллар самарали меҳнат қилиб, айни пайтда нафақада бўлган устозлари — Шерзод Камалов ва Қадамбой Қаражановлар хонадонига ташриф буюрдилар. Улар устозларини байрам билан табриклаб, эсдалик совғаларини топширдилар ва нафақадаги устозлари билан самимий суҳбат қурдилар.

Учрашув чоғида устозлар ўз меҳнат фаолияти давомида орттирган тажрибаларини ўртоқлашиб, йўл ҳаракати хавфсизлигини таъминлашда масъулият, сабр-тоқат ва фуқаролар билан муомала маданиятининг аҳамияти ҳақида сўз юритдилар. Ёш ходимлар учун бу суҳбат амалий сабоқ вазифасини ўтади, зеро йиллар мобайнида тўпланган ҳаётий тажриба ҳеч қайси дарслик ёки қўлланмада тўлиқ акс этмайди. Бу борада устозларнинг ўрни беқиёс.

Шу билан бирга, бундай ташрифлар касб ворисийлигини сақлаш, ёш авлодга устоз қадрини англатиш нуқтаи назаридан алоҳида қиймат касб этади, зеро ҳар бир соҳада эришилган натижанинг пойдеворида ўз вақтида билим ва тажриба улашган мураббийларнинг меҳнати турганини инобатга олган ҳолда, бу анъанани давом эттириш муҳим саналади.

Шундан сўнг бўлинма ходимлари ўз фаолиятларини давом эттириб, хизмат вазифалари доирасида йўлларда ҳаракат хавфсизлигини таъминлаш, йўл-транспорт ҳодисаларининг олдини олиш бўйича рейд тадбирларини амалга оширдилар.

Рейд жараёнида ҳаракат қоидаларига риоя этилиши назоратдан ўтказилиб, тартиб-қоидаларни бузган ҳайдовчиларга қонун ҳужжатларида белгиланган тартибда тегишли чоралар кўрилди. Шунингдек, аниқланган қоидабузарликлар юзасидан ҳужжатлар расмийлаштирилди. Назорат тадбирлари, биринчи навбатда, қоидабузарликларга йўл қўймаслик, эҳтимолий хавфни ўз вақтида бартараф этиш мақсадини кўзлаган ҳолда ташкил этилди.

Бундан ташқари, ходимлар ҳайдовчилар ва пиёдалар билан суҳбатлар ўтказиб, тезликни чеклаш, хавфсизлик камарини тақиш, йўлни белгиланган жойдан кесиб ўтиш каби оддий, лекин ҳаёт учун ҳал қилувчи аҳамиятга эга талабларга амал қилиш зарурлигини алоҳида кўрсатиб ўтдилар. Суҳбатлар чоғида йўл ҳаракати иштирокчиларининг эътибори, айниқса, бир лаҳзалик эътиборсизлик жуда оғир оқибатларга олиб келиши мумкинлигига қаратилди.

Кўриниб турганидек, бўлинма ходимларининг кундалик хизмати фақат қоидабузарликларни аниқлаш билан чекланмай, балки инсон ҳаётини асраш, йўлда ўзаро ҳурмат муҳитини қарор топтириш, устоз-шогирд анъаналарини эъзозлаш каби кенг қамровли мазмунга эга. Бу йўналишдаги изчил ҳаракат келгусида ҳам хавфсиз йўл муҳитини шакллантиришнинг ишончли омили бўлиб хизмат қилиши шубҳасиз.