Amudaryoda tadbirkorlar bilan ochiq muloqot boʻlib oʻtdi

Bugun mamlakatimizda tadbirkorlikni rivojlantirish, aholi bandligi va daromadini oshirish, kambagʻallikni qisqartirish masalalari davlat siyosatining eng muhim yoʻnalishlaridan biriga aylanib bormoqda. Chunki tadbirkorlik — bu shunchaki daromad topish manbai emas. U yangi ish oʻrinlari, oilalar farovonligi, mahalla iqtisodiy faolligi va hudud taraqqiyotining muhim omilidir.

Shu maʼnoda, tadbirkorlar bilan bevosita muloqot qilish, ularning muammolarini eshitish va joyida hal etish bugungi islohotlarning amaliy ifodasidir.

Amudaryo tumani Madaniyat markazida tadbirkorlar hamda tadbirkorlik faoliyatini boshlash istagidagi fuqarolar bilan tashkil etilgan ochiq muloqot ham ana shunday maqsadga xizmat qildi.

Unda respublika miqyosidagi vazirlik, bank va tashkilotlar rahbarlari, tuman miqyosidagi masʼullar, amaldagi tadbirkorlar, ishbilarmonlik faoliyatini yoʻlga qoʻyishni maqsad qilgan fuqarolar ishtirok etdi.

Ochiq muloqotni tuman hokimining birinchi oʻrinbosari Fahriddin Yusupov olib bordi.

Ochiq muloqotning asosiy maqsadi berilayotgan yangi imkoniyat va imtiyozlarni odamlar, tadbirkorlar va yangi biznes boshlash istagidagi fuqarolarga yetkazish, ularni amaliy loyihalarga aylantirishdan iborat boʻldi.

Muloqot davomida tadbirkorlarning murojaatlari birma-bir tinglandi. Tadbirkorlar oʻz faoliyatini yuritish va kengaytirish jarayonida duch kelayotgan muammolar, kredit va moliyaviy masalalar, infratuzilma, yer ajratish, mavjud imkoniyatlardan foydalanish, faoliyatini rivojlantirish uchun zarur shart-sharoitlar hamda boshqa dolzarb masalalar yuzasidan murojaat qildilar.

Ayniqsa, tadbirkor uchun muammoning qogʻozda emas, amalda hal boʻlishi muhim. Chunki biror loyiha ortida faqat tadbirkorning emas, balki ish bilan taʼminlanadigan fuqarolarning, daromadi oshadigan oilalarning taqdiri turadi. Shu nuqtai nazardan, ochiq muloqotda koʻtarilgan har bir masalaga alohida eʼtibor qaratildi.

Tadbirkorlik faoliyatini boshlash istagidagi fuqarolar ham oʻzlarini qiziqtirgan savollar bilan masʼullarga murojaat qilib, kredit, moliyaviy koʻmak, biznes loyihalarini shakllantirish, mavjud dasturlardan foydalanish va faoliyatini qonuniy yoʻlga qoʻyish borasida tegishli tushuntirish va tavsiyalar oldilar.

Muloqotning yana bir muhim jihati shundaki, unda ishtirok etgan masʼul rahbarlar faqat murojaatlarni tinglash bilan cheklanib qolmadi.

Har bir mutasaddi oʻz yoʻnalishi boʻyicha tadbirkorlar uchun yaratilayotgan yangi imkoniyatlar, moliyaviy instrumentlar, imtiyoz va qoʻllab-quvvatlash mexanizmlari haqida batafsil maʼlumot berdi.

Bu esa tadbirkorlar uchun oʻz faoliyatini rivojlantirish, ishlab chiqarishni kengaytirish, xizmatlar koʻlamini oshirish, yangi loyihalarni ishga tushirish va qoʻshimcha ish oʻrinlari yaratish imkoniyatlarini yanada kengaytiradi.

Taʼkidlash joizki, bugungi islohotlarning mazmunida kambagʻallikni qisqartirishga yangicha qarash shakllanmoqda.

Davlatimiz rahbari joriy yilning 3-sentyabrdagi yigʻilishda kambagʻallikni qisqartirishni oilani barqaror daromad manbaiga bogʻlash, ish oʻrni, infratuzilma va munosib sharoit yaratish bilan bogʻliq kompleks vazifa sifatida belgiladi. Demak, masala faqat moddiy yordam koʻrsatish bilan tugamaydi. Insonning oʻz mehnati bilan daromad topishi, kasb egallashi, tadbirkorlik bilan shugʻullanishi, oʻz biznesini yoʻlga qoʻyishi uchun sharoit yaratish — eng asosiy maqsad.

Muloqot yakunida bildirilgan barcha murojaat va takliflar masʼullar tomonidan tinglanib, ularni joyida oʻrganish, mavjud muammolarni qonunchilik doirasida hal etish va tadbirkorlarga amaliy koʻmak koʻrsatish boʻyicha tegishli vazifalar belgilandi.

Charos Arslonova, tuman hokimligining Axborot xizmati rahbari.