Amudaryo tumanida qishloq xoʻjaligi boʻyicha respublika seminari boʻlib oʻtdi

Yer unumdorligini saqlash, har bir gektardan moʻl hosil olish va dehqonchilikka zamonaviy yondashuvni joriy etish bugun agrar siyosatning ustuvor masalalaridan biriga aylangan. Shu bois sohada toʻplangan amaliy tajribani bir hudud doirasida qoldirmasdan, uni boshqa tumanlarga ham yetkazish, mutasaddilar oʻrtasida ochiq muloqotni yoʻlga qoʻyish alohida ahamiyat kasb etmoqda.

Aynan shu maqsadda hududlararo seminarlar, koʻchma oʻquvlar va tajriba almashish tadbirlari izchil tashkil etilmoqda. Ular mutasaddilarga hujjatlar orqali emas, balki dalada bajarilayotgan ishni oʻz koʻzi bilan koʻrish, samarali usullarni oʻrganish va oʻz hududida qoʻllash imkonini beradi. Bunday formatdagi tadbirlardan biri yaqinda Amudaryo tumanida boʻlib oʻtdi.

Amudaryo tumanida qishloq xoʻjaligi sohasini rivojlantirish, mavjud imkoniyatlardan samarali foydalanish hamda ilgʻor tajribalarni ommalashtirish masalalariga bagʻishlangan respublika miqyosidagi seminar oʻtkazildi. Seminarning asosiy maqsadi Amudaryoda toʻplangan amaliy tajribani respublikaning barcha tumanlariga keng yoyishdan iborat boʻldi.

Seminarda Qoraqalpogʻiston Respublikasi Vazirlar Kengashi Raisi Farxod Ermanov, Raisning qishloq va suv xoʻjaligi masalalari boʻyicha oʻrinbosari Kamil Aytbayev, barcha tumanlar hokimlari, qishloq xoʻjaligi masalalari boʻyicha hokim oʻrinbosarlari hamda soha boʻyicha respublika miqyosidagi tashkilotlar masʼullari ishtirok etdi.

Seminar davomida tumandagi Choykoʻl, Toʻlqin va Oq oltin ovullari hududlarida joylashgan fermer xoʻjaliklarida amalga oshirilayotgan ishlar oʻrganildi. Mehmonlar har bir xoʻjalikning ish uslubi, ekin maydonlari holati va mavsumiy ishlarning borishi bilan bevosita dalada tanishib chiqdi.

Jumladan, ishtirokchilar bugʻdoy ekish jarayonlari, paxta yigʻim-terimi mavsumining borishi, qishloq xoʻjaligi texnikalaridan samarali foydalanish hamda agrotexnik tadbirlarning tashkil etilishi bilan yaqindan tanishdilar. Kuzgi ekish va hosilni yigʻib olish bir vaqtga toʻgʻri kelayotgan hozirgi pallada bu masalalar har qachongidan ham dolzarb ekani qayd etildi.

Shu oʻrinda aytish kerakki, texnikadan unumli foydalanish paxta terimi va bugʻdoy ekishni qisqa muddatda, sifatli yakunlashning asosiy omili hisoblanadi. Xoʻjaliklarda mavjud texnika parki, uning ish bilan taʼminlanishi va xizmat koʻrsatish tartibi ham seminar qatnashchilari eʼtiboridan chetda qolmadi.

Shuningdek, hududlarda qishloq xoʻjaligi mahsulotlari yetishtirish samaradorligini oshirish, agrotexnik tadbirlarni oʻz vaqtida va sifatli tashkil etish hamda ilgʻor tajribalarni boshqa hududlarda keng joriy etish masalalariga alohida eʼtibor qaratildi. Har bir yoʻnalish boʻyicha tuman rahbarlariga aniq vazifalar belgilandi. Xususan, kechiktirilgan agrotexnik tadbir hosildorlikka bevosita taʼsir koʻrsatishi sababli, muddatlarga qatʼiy rioya qilish lozimligi yana bir bor taʼkidladi.

Seminar davomida Amudaryo tumanida qishloq xoʻjaligi sohasida yaratilgan amaliy tajriba va imkoniyatlar namoyish etildi. Boshqa tumanlardan kelgan hokimlar va ularning oʻrinbosarlari uchun bu tajriba oʻz hududlarida qoʻllash mumkin boʻlgan amaliy namuna sifatida taqdim qilindi.

Taʼkidlash kerakki, bunday seminarlar faqat tanishuv bilan cheklanmaydi. Ular tumanlar oʻrtasida sogʻlom raqobat muhitini shakllantiradi, soha masʼullarining bilim va malakasini oshiradi hamda qabul qilinayotgan qarorlarning dalada amalda qanday natija berayotganini koʻrsatib beradi. Natijada hududlar oʻrtasidagi farq qisqarib, umumiy koʻrsatkichlar oʻsishiga zamin yaratiladi.

Chindan ham, sohadagi har bir yangilik va samarali usul faqat bir tuman chegarasida qolmasdan, butun respublika boʻylab tarqalganda haqiqiy qiymatga ega boʻladi. Amudaryoda boshlangan bu muloqot keyingi bosqichda boshqa tumanlar tajribasini oʻrganish bilan davom etishi kutilmoqda. Zero, tajriba almashishning doimiy tizimga aylanishi agrar soha barqarorligining muhim kafolati boʻlib xizmat qiladi.