Oʻquvchilar oʻrtasida sogʻlom turmush tarzi targʻib qilindi

Kasallikni davolashdan koʻra uning oldini olish ham samaraliroq, ham kamxarj ekanligi zamonaviy tibbiyotning asosiy qoidalaridan biri boʻlib, soʻnggi yillarda mamlakatimizda profilaktika yoʻnalishini kuchaytirish sogʻliqni saqlash tizimini isloh qilishning ustuvor vazifalaridan biriga aylandi. Ayniqsa, oʻsib kelayotgan avlod orasida sogʻlom turmush tarzi madaniyatini va zararli odatlarga nisbatan murosasiz munosabatni shakllantirish borasidagi targʻibot ishlari izchil tus olmoqda.

Shu maqsadda Amudaryo tuman Tibbiyot birlashmasining ish rejasiga muvofiq 30-sonli umumiy oʻrta taʼlim maktabida yuqori sinf oʻquvchilari va oʻqituvchilar ishtirokida sogʻlom turmush tarzi asoslari hamda kasalliklar profilaktikasiga bagʻishlangan targʻibot tadbiri tashkil etildi.

Uchrashuvni tuman Tibbiyot birlashmasi tashkiliy-uslubiy boʻlimi mudiri Jumaboy Yavkashev ochib, inson salomatligini asrash va mustahkamlash eng avvalo sogʻlom turmush tarzini shakllantirishga bogʻliq ekanini hayotiy misollar bilan batafsil tushuntirdi hamda uzoq umr koʻrishning garovi aynan shu tamoyillarga izchil amal qilishda ekanini qayd etdi.

Maʼruzachining taʼkidlashicha, har bir inson, eng avvalo, oʻz sogʻligʻini oʻylashi lozim, ana shunda xotirjam va farovon hayot kechirib, koʻplab asoratli xastaliklarning oldi olinadi. Shu bois bunday suhbatlar maktab yoshidan boshlab muntazam oʻtkazilishi muhim sanaladi. Mutaxassislarning fikricha, salomatlikka ongli munosabat yoshlikdan shakllansa, keyinchalik uni qayta tarbiyalashga ehtiyoj qolmaydi.

Soʻngra soʻz olgan vrach valeolog Tamara Saidova toʻgʻri ovqatlanish, jismoniy faollik, kun tartibiga rioya etish va ish faoliyatini biologik rejim asosida tashkil qilish masalalari yuzasidan keng tushunchalar berdi. Shu oʻrinda aytish kerakki, kundalik hayotda oddiy koʻringan bu qoidalar aslida salomatlikni asrashning eng samarali vositasi hisoblanadi.

Shuningdek, mutaxassis ruhiy osoyishtalikni taʼminlash, ichkilikbozlik, kashandalik hamda giyohvandlik singari zararli odatlardan tiyilish salomatlikni saqlashning ajralmas sharti ekani va yoshlikdan shakllangan koʻnikma umrbod saqlanib qolishini alohida taʼkidlab oʻtdi.

Endokrinolog shifokor Ergash Oʻrozimbetov esa endokrin tizimi kasalliklari orasida koʻp uchraydigan qalqonsimon bez xastaliklari va qandli diabet haqida maktab oʻquvchilari hamda oʻqituvchilariga batafsil maʼlumot berdi. Maʼlumki, endokrin tizimi faoliyatidagi oʻzgarishlar koʻpincha sezdirmay boshlanadi, shu bois aholining bu boradagi savodxonligini oshirish profilaktikaning muhim qismi sanaladi. U kasallikning klinik belgilari, kechishi, yuzaga kelishi mumkin boʻlgan asoratlari va profilaktika chora-tadbirlari toʻgʻrisida toʻxtalib, dastlabki alomatlarni vaqtida sezish shifokorga erta murojaat qilish imkonini berishini tushuntirdi. Shifokor xastalikka olib keluvchi asosiy omillar sifatida notoʻgʻri ovqatlanish, kamharakat hayot tarzi va zararli odatlarni sanab oʻtdi.

Tadbir davomida Salomatlik va strategik rivojlanish instituti tomonidan tayyorlangan videoroliklar namoyish qilindi. Ular orqali ishtirokchilar sogʻlom turmush tarzining amaliy jihatlari bilan koʻrgazmali tarzda tanishish imkoniga ega boʻldilar. Videolavhalarda berilgan tavsiyalar maʼruzalarda aytilgan fikrlarni toʻldirib, mavzuning oʻquvchilar tomonidan oson oʻzlashtirilishiga xizmat qildi.

Uchrashuv soʻngida oʻquvchi va oʻqituvchilarga shaxsiy gigiyena, sogʻlom turmush tamoyillari, jismoniy faollik, qandli diabetning 2-turining oldini olish kabi bir necha mavzudagi buklet va eslatmalar tarqatildi. Tarqatilgan materiallar oʻquvchilarga olingan bilimlarni keyinchalik ham eslab turish imkonini beradi.

Maktab yoshida shakllangan sogʻlom odatlar kelgusida butun bir avlodning salomatlik koʻrsatkichini belgilaydi, shu sababli tibbiyot xodimlarining taʼlim muassasalaridagi bunday uchrashuvlari oddiy maʼruza emas, uzoq muddatli profilaktika vositasiga aylanmoqda.