Ўқувчилар ўртасида соғлом турмуш тарзи тарғиб қилинди

Касалликни даволашдан кўра унинг олдини олиш ҳам самаралироқ, ҳам камхарж эканлиги замонавий тиббиётнинг асосий қоидаларидан бири бўлиб, сўнгги йилларда мамлакатимизда профилактика йўналишини кучайтириш соғлиқни сақлаш тизимини ислоҳ қилишнинг устувор вазифаларидан бирига айланди. Айниқса, ўсиб келаётган авлод орасида соғлом турмуш тарзи маданиятини ва зарарли одатларга нисбатан муросасиз муносабатни шакллантириш борасидаги тарғибот ишлари изчил тус олмоқда.

Шу мақсадда Амударё туман Тиббиёт бирлашмасининг иш режасига мувофиқ 30-сонли умумий ўрта таълим мактабида юқори синф ўқувчилари ва ўқитувчилар иштирокида соғлом турмуш тарзи асослари ҳамда касалликлар профилактикасига бағишланган тарғибот тадбири ташкил этилди.

Учрашувни туман Тиббиёт бирлашмаси ташкилий-услубий бўлими мудири Жумабой Явкашев очиб, инсон саломатлигини асраш ва мустаҳкамлаш энг аввало соғлом турмуш тарзини шакллантиришга боғлиқ эканини ҳаётий мисоллар билан батафсил тушунтирди ҳамда узоқ умр кўришнинг гарови айнан шу тамойилларга изчил амал қилишда эканини қайд этди.

Маърузачининг таъкидлашича, ҳар бир инсон, энг аввало, ўз соғлиғини ўйлаши лозим, ана шунда хотиржам ва фаровон ҳаёт кечириб, кўплаб асоратли хасталикларнинг олди олинади. Шу боис бундай суҳбатлар мактаб ёшидан бошлаб мунтазам ўтказилиши муҳим саналади. Мутахассисларнинг фикрича, саломатликка онгли муносабат ёшликдан шаклланса, кейинчалик уни қайта тарбиялашга эҳтиёж қолмайди.

Сўнгра сўз олган врач валеолог Тамара Саидова тўғри овқатланиш, жисмоний фаоллик, кун тартибига риоя этиш ва иш фаолиятини биологик режим асосида ташкил қилиш масалалари юзасидан кенг тушунчалар берди. Шу ўринда айтиш керакки, кундалик ҳаётда оддий кўринган бу қоидалар аслида саломатликни асрашнинг энг самарали воситаси ҳисобланади.

Шунингдек, мутахассис руҳий осойишталикни таъминлаш, ичкиликбозлик, кашандалик ҳамда гиёҳвандлик сингари зарарли одатлардан тийилиш саломатликни сақлашнинг ажралмас шарти экани ва ёшликдан шаклланган кўникма умрбод сақланиб қолишини алоҳида таъкидлаб ўтди.

Эндокринолог шифокор Эргаш Ўрозимбетов эса эндокрин тизими касалликлари орасида кўп учрайдиган қалқонсимон без хасталиклари ва қандли диабет ҳақида мактаб ўқувчилари ҳамда ўқитувчиларига батафсил маълумот берди. Маълумки, эндокрин тизими фаолиятидаги ўзгаришлар кўпинча сездирмай бошланади, шу боис аҳолининг бу борадаги саводхонлигини ошириш профилактиканинг муҳим қисми саналади. У касалликнинг клиник белгилари, кечиши, юзага келиши мумкин бўлган асоратлари ва профилактика чора-тадбирлари тўғрисида тўхталиб, дастлабки аломатларни вақтида сезиш шифокорга эрта мурожаат қилиш имконини беришини тушунтирди. Шифокор хасталикка олиб келувчи асосий омиллар сифатида нотўғри овқатланиш, камҳаракат ҳаёт тарзи ва зарарли одатларни санаб ўтди.

Тадбир давомида Саломатлик ва стратегик ривожланиш институти томонидан тайёрланган видеороликлар намойиш қилинди. Улар орқали иштирокчилар соғлом турмуш тарзининг амалий жиҳатлари билан кўргазмали тарзда танишиш имконига эга бўлдилар. Видеолавҳаларда берилган тавсиялар маърузаларда айтилган фикрларни тўлдириб, мавзунинг ўқувчилар томонидан осон ўзлаштирилишига хизмат қилди.

Учрашув сўнгида ўқувчи ва ўқитувчиларга шахсий гигиена, соғлом турмуш тамойиллари, жисмоний фаоллик, қандли диабетнинг 2-турининг олдини олиш каби бир неча мавзудаги буклет ва эслатмалар тарқатилди. Тарқатилган материаллар ўқувчиларга олинган билимларни кейинчалик ҳам эслаб туриш имконини беради.

Мактаб ёшида шаклланган соғлом одатлар келгусида бутун бир авлоднинг саломатлик кўрсаткичини белгилайди, шу сабабли тиббиёт ходимларининг таълим муассасаларидаги бундай учрашувлари оддий маъруза эмас, узоқ муддатли профилактика воситасига айланмоқда.