14 nafar mahkum jazoni oʻtashdan muddatidan ilgari shartli ozod qilindi
Jazoni ijro etish tizimida insonparvarlik tamoyillariga amal qilgan holda, qonunni buzgan shaxsni jamiyatdan uzib qoʻymasdan, unga tuzalish imkonini berish va mehnatga qaytarish orqali qayta tarbiyalash soʻnggi yillarda sud-huquq sohasidagi islohotlarning ustuvor yoʻnalishlaridan biriga aylandi. Bu borada sayyor sud majlislari alohida oʻrin tutadi, chunki ular odil sudlovni bevosita mahalla sharoitida, fuqarolar koʻz oʻngida amalga oshiradi. Bunday yondashuv sud jarayonining ochiqligini taʼminlash bilan birga, aholining qonunchilik bilan bevosita tanishishiga ham imkon yaratadi.
Amudaryo tumanining Boy ovul mahalla fuqarolar yigʻini maʼmuriy binosida ham shu kabi ochiq sayyor sud majlisi boʻlib oʻtdi. Unda Jinoyat ishlari boʻyicha Amudaryo tuman sudi raisi Jasurbek Baltabayev, sudya yordamchisi Elyor Jumaniyozov, Amudaryo tuman prokurorining katta yordamchisi Ogʻabek Erkuliyev hamda Amudaryo tuman Ichki ishlar boʻlimi Probatsiya guruhi katta inspektori Azamat Artikov ishtirok etdi.
Sud majlisida Oʻzbekiston Respublikasi Jinoyat kodeksining 73-moddasi, yaʼni "Jazoni oʻtashdan muddatidan ilgari shartli ozod qilish" tartibiga muvofiq ilgari jinoyat sodir etgan, hozirgi kunda tuzalish yoʻliga qatʼiy oʻtgan, oʻrnatilgan tartib-qoida talablarini bajargan va mehnatga halol munosabatda boʻlgan 14 nafar mahkumga nisbatan qoʻllanilgan jazolarning oʻtalmay qolgan qismi shartli ravishda yengillashtirildi.
Shu bilan birga, ozod etilganlarga jazoning oʻtalmagan qismi mobaynida qasddan yangi jinoyat sodir etilgan taqdirda Jinoyat kodeksining 60-moddasiga muvofiq jazo belgilanishi haqida toʻliq tushuntirishlar berildi. Shuningdek, ularga belgilangan muddat davomida oʻz xulq-atvoriga masʼuliyat bilan yondashish zarurligi uqtirildi.
Bundan tashqari, majlis ishtirokchilari va mahalla ahliga Oʻzbekiston Respublikasi Prezidentining 2026-yil 14-avgust kungi "Odil sudlov — 2030": Yangi Oʻzbekistonda inson huquqlarini ishonchli himoya qiluvchi xalqchil va adolatli sud tizimini barpo etish strategiyasi toʻgʻrisida"gi farmoni mazmun-mohiyati haqida ham batafsil tushuntirishlar berildi.
Xususan, hujjatda belgilangan "xalqchil sud", "adolat qoʻrgʻoni", "kafolatlangan adolat", "adolat posbonlari", "raqamli odil sudlov" va "xalqaro eʼtirof" yoʻnalishlari keng tushuntirildi va ishtirokchilarni qiziqtirgan savollarga ham javoblar berildi. Bunday ochiq majlislar qonun talablarini aholiga yetkazish bilan birga, sud tizimiga boʻlgan ishonchni mustahkamlashga xizmat qiladi.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
