Amudaryo tumanidagi 56-sonli umumtaʼlim maktabi “Jasorat sinfi” oʻquvchilarining tantanali vaʼda berish tadbiri oʻtkazildi

Oʻzbekiston — buyuk ajdodlar jasorati, mardlik va matonat, vatanparvarlik va fidoyilik anʼanalari asrlar osha yashab kelayotgan muqaddas zamin. Bu yurtda Vatan ozodligi va xalq farovonligi yoʻlida jonini fido qilgan qahramonlar, oʻz hayotini el-yurt xizmatiga bagʻishlagan ulugʻ insonlar kamol topgan. Ularning ibratli hayoti va mardonavor faoliyati bugungi avlod uchun bebaho maʼnaviy meros, yuksak tarbiya maktabidir.

Ana shu ezgu anʼanalarni davom ettirish, yoshlar qalbida Vatanga muhabbat, xalqiga sadoqat, milliy qadriyatlarga hurmat va yuksak fuqarolik masʼuliyatini shakllantirish maqsadida mamlakatimizda keng koʻlamli ishlar amalga oshirilmoqda. Xususan, Oʻzbekiston Respublikasi Vazirlar Mahkamasining 2025-yil 4-noyabrdagi “Umumtaʼlim maktablarida “Jasorat maktabi” faoliyatini tashkil etish chora-tadbirlari toʻgʻrisida”gi 688-sonli qarori bu boradagi muhim qadamlardan biri boʻldi.

Mazkur qarorga muvofiq, 2025–2026 oʻquv yilidan boshlab respublikamizning 208 ta tuman va shahrida bittadan “Jasorat maktabi” faoliyati yoʻlga qoʻyildi.

Mazkur qaror ijrosi doirasida Amudaryo tumani Xotira maydonida tumandagi 56-sonli umumiy oʻrta taʼlim maktabida 2026–2027 oʻquv yilida “Jasorat sinfi”ga qabul qilingan oʻquvchilarning tantanali vaʼda berish tadbiri boʻlib oʻtdi. Marosimda tuman Mudofaa ishlari boʻlimi boshligʻi Shuhrat Mamatov hamda tuman Ichki ishlar boʻlimi boshligʻi oʻrinbosari Umidjon Oʻrazaliyev soʻzga chiqib, yosh avlodni vatanparvarlik ruhida tarbiyalash, ularda masʼuliyat, intizom, mardlik va fidoyilik fazilatlarini shakllantirishning ahamiyatiga alohida toʻxtaldilar.

Soʻzga chiqqanlar Vatanga xizmat qilish har bir fuqaro uchun buyuk sharaf va muqaddas farzandlik burchi ekanini taʼkidladilar. Ona yurtni sevish, uning tinchligini asrash, xalq osoyishtaligi va mamlakat taraqqiyoti yoʻlida sidqidildan mehnat qilish har bir yoshning hayotiy eʼtiqodiga aylanishi zarurligi qayd etildi. Shuningdek, ajdodlarimizning mardlik va jasorat anʼanalarini davom ettirish, ularning munosib vorislari boʻlish uchun, eng avvalo, puxta bilim, mustahkam iroda, yuksak odob-axloq va qatʼiy intizom zarurligi uqtirildi.

Tadbirning eng hayajonli va unutilmas lahzalari, shubhasiz, oʻquvchilarning tantanali vaʼda berish marosimi boʻldi. Oʻquvchilar Vatanimiz bayrogʻi, buyuk ajdodlarimizning muqaddas xotirasi va tengdoshlari guvohligida Ona Vatanni sevish, uning ravnaqi yoʻlida sidqidildan xizmat qilish, yurtga sadoqatli boʻlish hamda “Jasorat sinfi” oʻquvchilari nizomiga qatʼiy rioya etish haqida tantanali ravishda vaʼda berdilar.

Oʻquvchilar uchun ushbu kun hayotlaridagi muhim bosqichlardan biri boʻlib qolishi shubhasiz. Chunki ular shu kundan boshlab nafaqat oʻz bilimlari va xulq-atvori, balki “Jasorat sinfi” oʻquvchisi degan sharafli nomga munosib boʻlish masʼuliyatini ham chuqurroq his etishga intiladilar. Ularning har bir xatti-harakati, oʻqishga munosabati, ustozlari va ota-onalariga hurmati, tengdoshlari bilan muomalasi mazkur tarbiya yoʻlining muhim koʻrsatkichidir.

Bugun maktab partasida oʻtirgan oʻgʻil-qizlar ertaga turli sohalarda mamlakatimiz taraqqiyotiga xizmat qiladigan mutaxassislar, yetakchilar va fidoyi insonlar boʻlib yetishadilar. Ularning qalbida bugun uygʻongan vatanparvarlik tuygʻusi kelajakdagi ezgu ishlariga mustahkam zamin boʻlib xizmat qiladi. Bu borada maktab jamoasi, ota-onalar, mahalla faollari hamda tegishli tashkilotlarning hamkorligi muhimdir.

Shubhasiz, “Jasorat sinfi” oʻquvchilari kelgusida bilimli, intizomli, qatʼiyatli, tashabbuskor va Vatanga sadoqatli yoshlar boʻlib kamol topishga intiladilar. Ular oʻzlarining namunali xulqi, puxta bilimi, odob-axloqi va ezgu ishlari bilan tengdoshlariga oʻrnak boʻlishlari, oilasi, maktabi, mahallasi va butun jamiyat ishonchini oqlashlari lozim.

Zero, yurt ravnaqi faqat bugun amalga oshirilayotgan ishlar bilan emas, balki ertangi kun egalarining qanday inson boʻlib voyaga yetishi bilan ham belgilanadi. Yoshlar qalbiga ezgulik, halollik, mardlik va vatanparvarlik urugʻlarini qanchalik chuqur singdira olsak, kelajagimiz shunchalik mustahkam boʻladi.

Charos Arslonova, tuman hokimligining Axborot xizmati rahbari.