Fanlar olimpiadasining tuman bosqichi boshlandi

Iqtidorli yoshlarni erta aniqlash taʼlim tizimidagi eng nozik vazifalardan biri boʻlib, natija koʻp jihatdan tanlov qanchalik xolis tashkil etilganiga bogʻliq. Shu sababli fan olimpiadalari tizimini zamonaviy texnologiyalar asosida tashkil qilishga alohida eʼtibor qaratilmoqda. Oʻzbekiston Respublikasi Vazirlar Mahkamasining 2021-yil 9-sentyabrdagi “Iqtidorli oʻquvchilar oʻrtasida fan olimpiadalarini oʻtkazish tizimini takomillashtirish hamda xorijiy tillarni oʻqitish boʻyicha eng yaxshi maktabni aniqlash tizimini joriy etish toʻgʻrisida”gi qarori ijrosi doirasida ushbu yoʻnalishda qator amaliy ishlar yoʻlga qoʻyildi.

Maktabgacha va maktab taʼlimi vazirligining 2026-yil 23-sentyabrdagi 360-sonli, Qoraqalpogʻiston Respublikasi maktabgacha va maktab taʼlimi vazirligining 2026-yil 5-oktyabrdagi 313-sonli buyruqlariga muvofiq, Amudaryo tumanida 2026–2027 oʻquv yili asosiy fanlar olimpiadasining tuman bosqichi Navoiy mahallasi hududidagi 1-sonli maktabda 15–27-oktyabr kunlari oʻtkazilmoqda.

Bellashuvlarda davlat va nodavlat umumiy oʻrta taʼlim muassasalari, akademik litseylar hamda kasbiy taʼlim tashkilotlari oʻquvchilari qatnashib, 86 ta umumtaʼlim maktabining 9–11-sinflaridan jami 2787 nafar oʻquvchi oʻz bilimini sinovdan oʻtkazmoqda.

Olimpiada 15 ta fan — geografiya, tarix, kimyo, fizika, biologiya, matematika, informatika, tillar, davlat va huquq asoslari hamda ona tili va adabiyoti fanlari boʻyicha oʻtkazilmoqda.

Tumanda maxsus tashkiliy qoʻmita tuzilib, jarayonni markazlashgan holda real vaqt rejimida olib borish, hayʼat aʼzolari, auditoriya rahbarlari va kuzatuvchilarning oʻz vaqtida yetib kelishini taʼminlash, hakamlar tarkibiga tajribali oʻqituvchilarni jalb etish, uzluksiz elektr taʼminoti va barqaror internet xizmati, shuningdek harakat xavfsizligi va tibbiy yordam masalalari nazoratga olingan.

Joriy yilgi tanlovning asosiy oʻzgachaligi shundaki, sinov kompyuterda oʻtkazilib, test natijasi yakunlangani zahoti ekranda namoyon boʻladi — bu ortiqcha qogʻozbozlik va vositachilikni bartaraf etadi.

1-sonli maktabda oʻtkazilgan ochilish marosimida Qoraqalpogʻiston Respublikasi Maktabgacha va maktab taʼlimi vazirligi, tuman Maktabgacha va maktab taʼlimi boʻlimi tashkiliy qoʻmitasi masʼul xodimlari va boshqa mutasadilar ishtirok etib, qatnashchilarga omad tiladi.

Tuman bosqichida saralab olingan bilimdonlar keyingi, respublika darajasidagi sinovlarga tayyorgarlikni boshlaydi. Biz ham fanlar olimpiadasining tuman bosqichi ishtirokchilariga omad va muvaffaqiyatlar tilaymiz!