Фанлар олимпиадасининг туман босқичи бошланди
Иқтидорли ёшларни эрта аниқлаш таълим тизимидаги энг нозик вазифалардан бири бўлиб, натижа кўп жиҳатдан танлов қанчалик холис ташкил этилганига боғлиқ. Шу сабабли фан олимпиадалари тизимини замонавий технологиялар асосида ташкил қилишга алоҳида эътибор қаратилмоқда. Ўзбекистон Республикаси Вазирлар Маҳкамасининг 2021 йил 9 сентябрдаги “Иқтидорли ўқувчилар ўртасида фан олимпиадаларини ўтказиш тизимини такомиллаштириш ҳамда хорижий тилларни ўқитиш бўйича энг яхши мактабни аниқлаш тизимини жорий этиш тўғрисида”ги қарори ижроси доирасида ушбу йўналишда қатор амалий ишлар йўлга қўйилди.
Мактабгача ва мактаб таълими вазирлигининг 2026 йил 23 сентябрдаги 360-сонли, Қорақалпоғистон Республикаси мактабгача ва мактаб таълими вазирлигининг 2026 йил 5 октябрдаги 313-сонли буйруқларига мувофиқ, Амударё туманида 2026–2027 ўқув йили асосий фанлар олимпиадасининг туман босқичи Навоий маҳалласи ҳудудидаги 1-сонли мактабда 15–27 октябрь кунлари ўтказилмоқда.
Беллашувларда давлат ва нодавлат умумий ўрта таълим муассасалари, академик лицейлар ҳамда касбий таълим ташкилотлари ўқувчилари қатнашиб, 86 та умумтаълим мактабининг 9–11-синфларидан жами 2787 нафар ўқувчи ўз билимини синовдан ўтказмоқда.
Олимпиада 15 та фан — география, тарих, кимё, физика, биология, математика, информатика, тиллар, давлат ва ҳуқуқ асослари ҳамда она тили ва адабиёти фанлари бўйича ўтказилмоқда.
Туманда махсус ташкилий қўмита тузилиб, жараённи марказлашган ҳолда реал вақт режимида олиб бориш, ҳайъат аъзолари, аудитория раҳбарлари ва кузатувчиларнинг ўз вақтида етиб келишини таъминлаш, ҳакамлар таркибига тажрибали ўқитувчиларни жалб этиш, узлуксиз электр таъминоти ва барқарор интернет хизмати, шунингдек ҳаракат хавфсизлиги ва тиббий ёрдам масалалари назоратга олинган.
Жорий йилги танловнинг асосий ўзгачалиги шундаки, синов компьютерда ўтказилиб, тест натижаси якунлангани заҳоти экранда намоён бўлади — бу ортиқча қоғозбозлик ва воситачиликни бартараф этади.
1-сонли мактабда ўтказилган очилиш маросимида Қорақалпоғистон Республикаси Мактабгача ва мактаб таълими вазирлиги, туман Мактабгача ва мактаб таълими бўлими ташкилий қўмитаси масъул ходимлари ва бошқа мутасадилар иштирок этиб, қатнашчиларга омад тилади.
Туман босқичида саралаб олинган билимдонлар кейинги, республика даражасидаги синовларга тайёргарликни бошлайди. Биз ҳам фанлар олимпиадасининг туман босқичи иштирокчиларига омад ва муваффақиятлар тилаймиз!
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
