14 нафар маҳкум жазони ўташдан муддатидан илгари шартли озод қилинди
Жазони ижро этиш тизимида инсонпарварлик тамойилларига амал қилган ҳолда, қонунни бузган шахсни жамиятдан узиб қўймасдан, унга тузалиш имконини бериш ва меҳнатга қайтариш орқали қайта тарбиялаш сўнгги йилларда суд-ҳуқуқ соҳасидаги ислоҳотларнинг устувор йўналишларидан бирига айланди. Бу борада сайёр суд мажлислари алоҳида ўрин тутади, чунки улар одил судловни бевосита маҳалла шароитида, фуқаролар кўз ўнгида амалга оширади. Бундай ёндашув суд жараёнининг очиқлигини таъминлаш билан бирга, аҳолининг қонунчилик билан бевосита танишишига ҳам имкон яратади.
Амударё туманининг Бой овул маҳалла фуқаролар йиғини маъмурий биносида ҳам шу каби очиқ сайёр суд мажлиси бўлиб ўтди. Унда Жиноят ишлари бўйича Амударё туман суди раиси Жасурбек Балтабаев, судья ёрдамчиси Элёр Жуманиёзов, Амударё туман прокурорининг катта ёрдамчиси Оғабек Эркулиев ҳамда Амударё туман Ички ишлар бўлими Пробация гуруҳи катта инспектори Азамат Артиков иштирок этди.
Суд мажлисида Ўзбекистон Республикаси Жиноят кодексининг 73-моддаси, яъни "Жазони ўташдан муддатидан илгари шартли озод қилиш" тартибига мувофиқ илгари жиноят содир этган, ҳозирги кунда тузалиш йўлига қатъий ўтган, ўрнатилган тартиб-қоида талабларини бажарган ва меҳнатга ҳалол муносабатда бўлган 14 нафар маҳкумга нисбатан қўлланилган жазоларнинг ўталмай қолган қисми шартли равишда енгиллаштирилди.
Шу билан бирга, озод этилганларга жазонинг ўталмаган қисми мобайнида қасддан янги жиноят содир этилган тақдирда Жиноят кодексининг 60-моддасига мувофиқ жазо белгиланиши ҳақида тўлиқ тушунтиришлар берилди. Шунингдек, уларга белгиланган муддат давомида ўз хулқ-атворига масъулият билан ёндашиш зарурлиги уқтирилди.
Бундан ташқари, мажлис иштирокчилари ва маҳалла аҳлига Ўзбекистон Республикаси Президентининг 2026 йил 14 август кунги "Одил судлов — 2030": Янги Ўзбекистонда инсон ҳуқуқларини ишончли ҳимоя қилувчи халқчил ва адолатли суд тизимини барпо этиш стратегияси тўғрисида"ги фармони мазмун-моҳияти ҳақида ҳам батафсил тушунтиришлар берилди.
Хусусан, ҳужжатда белгиланган "халқчил суд", "адолат қўрғони", "кафолатланган адолат", "адолат посбонлари", "рақамли одил судлов" ва "халқаро эътироф" йўналишлари кенг тушунтирилди ва иштирокчиларни қизиқтирган саволларга ҳам жавоблар берилди. Бундай очиқ мажлислар қонун талабларини аҳолига етказиш билан бирга, суд тизимига бўлган ишончни мустаҳкамлашга хизмат қилади.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
