14 нафар шахс муддатидан илгари озод қилинди
Жиноий жазонинг пировард мақсади инсонни жамиятдан узиб қўйиш эмас, балки уни қилмишини англаб етган, қонунга ҳурмат билан қарайдиган фуқаро сифатида яна ҳаётга қайтаришдан иборат эканлиги ҳуқуқшуносликда кенг эътироф этилган тамойиллардан биридир. Мамлакатимизда суд-ҳуқуқ соҳасида амалга оширилаётган ислоҳотлар ҳам айнан инсонпарварлик ва адолат ғояларини мустаҳкамлашга йўналтирилган.
Хусусан, судларнинг аҳоли истиқомат қиладиган жойларга бориб, ишларни очиқ ва ошкора кўриб чиқиши одил судловга бўлган ишончни оширишда муҳим аҳамият касб этмоқда. Сайёр суд мажлисларида қабул қилинаётган қарорлар маҳалла аҳлининг кўз ўнгида эълон қилиниб, ҳуқуқий тарғиботнинг таъсирчан шаклига айланиб бормоқда.
12 ноябрь куни Жиноят ишлари бўйича Амударё туман суди томонидан Амударё туманидаги Янгиобод маҳалла фуқаролар йиғини биносида сайёр суд мажлиси ўтказилди. Унда Жиноят ишлари бўйича Амударё туман судининг раиси Жасур Балтабаев, Амударё туман прокуратураси катта ёрдамчиси Оғабек Еркулиев ҳамда туман Ички ишлар бўлими Пробация гуруҳи инспектори, капитан Руслан Искандаров иштирок этди.
Мажлисда Амударё тумани Ички ишлар бўлими Пробация гуруҳи томонидан киритилган тақдимнома асосида 14 нафар шахсни Ўзбекистон Республикаси Жиноят кодексининг 73-моддасига мувофиқ жазони ўташдан муддатидан илгари шартли равишда озод қилиш масаласи кўриб чиқилди. Тақдимномада маҳкумларнинг жазо ўташ давридаги хулқ-атвори, меҳнатга муносабати ва зиммасига юклатилган мажбуриятларни қай даражада бажаргани ҳақидаги маълумотлар ўз аксини топган.
Суд мажлиси давомида ҳар бир шахсга тегишли ҳужжатлар атрофлича ўрганилиб, томонларнинг фикрлари тингланди ва масала барча жиҳатлари бўйича таҳлил этилди.
Натижада жазо ўташ тартиб-қоидаларига амал қилгани, суд томонидан зиммасига юклатилган мажбуриятларни бажаргани ҳамда меҳнатга ҳалол муносабатда бўлгани инобатга олиниб, 14 нафар шахсга нисбатан Жиноят ишлари бўйича Амударё туман судининг ажримлари чиқарилди. Ушбу ажримлар билан улар Ўзбекистон Республикаси Жиноят кодексининг 73-моддасига асосан жазонинг ўталмаган қисмидан муддатидан илгари шартли равишда озод этилди.
Бундай қарорлар қонун олдида жавобгарликнинг муқаррарлиги билан бирга, чин дилдан тузалиш йўлини танлаган инсонга иккинчи имконият берилишини ҳам амалда намоён этади. Шу билан бирга, жамоатчилик иштирокида кўрилган ҳар бир иш одамларда қонунга ҳурмат туйғусини кучайтириб, жиноятчиликнинг олдини олишда ўзига хос огоҳлантирувчи ва тарбиявий восита вазифасини ўтайди.

▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶