Deputatlar Amudaryo tumanida tibbiyot, ijtimoiy himoya va taʼlim sohalarini oʻrgandi

Mamlakatimizda aholi farovonligini taʼminlash, odamlarni qiynab kelayotgan maishiy va ijtimoiy muammolarni joyida oʻrganish hamda ularga samarali yechim topish borasida keng koʻlamli ishlar amalga oshirilmoqda. Ayniqsa, parlament va mahalliy Kengashlar deputatlarining joylarga chiqib, hududlardagi real ahvol bilan yaqindan tanishishi, aholining kayfiyati va ehtiyojlarini bevosita oʻrganishi xayrli anʼanaga aylandi. Oliy Majlis Qonunchilik palatasi deputatlari hamda «Adolat» sotsial-demokratik partiyasi ishchi guruhi aʼzolari tomonidan navbatdagi ana shunday oʻrganishlar Amudaryo tumanida oʻtkazildi. Tadbirda Xalq deputatlari Amudaryo tuman Kengashi deputatlari, Kengash kotibiyati mudiri Mansur Urazbayev hamda tuman hokimi oʻrinbosari, oila va xotin-qizlar boʻlimi boshligʻi Goʻzal Saburovalar ham ishtirok etdilar.

Tashrif davomida birinchi manzil tuman tibbiyot birlashmasi boʻldi. Maʼlumki, tibbiyot sohasi inson qadri, uning salomatligi bilan bevosita bogʻliq boʻlib, eng muhim yoʻnalishlardan biri hisoblanadi. Deputatlar va partiya ishchi guruhi aʼzolari ushbu muassasada aholiga koʻrsatilayotgan tibbiy xizmatlar darajasi, bemorlar va soha xodimlari uchun yaratilgan zamonaviy sharoitlar bilan yaqindan tanishdilar. Ayniqsa, mavjud infratuzilma va imkoniyatlardan qay darajada foydalanilayotganiga alohida eʼtibor qaratildi.

Maʼlumot oʻrnida taʼkidlash joizki, Amudaryo tuman tibbiyot birlashmasi tarkibidagi ushbu shifoxona 421-oʻringa moʻljallangan. Bu yerda bemorlarning salomatligini mustahkamlash va ularni oyoqqa turgʻazishga xizmat qiluvchi 36-oʻrinli xoʻjalik hisobidagi reabilitatsiya boʻlimi ham samarali faoliyat yuritmoqda. Shu bilan birga, tumanda aholiga birlamchi tibbiy-sanitariya yordamini koʻrsatish tarmogʻi ham keng yoʻlga qoʻyilgan. Hozirgi kunda tumanda umumiy qabul quvvati 1 455 nafarni tashkil etuvchi 14 ta ambulatoriya-poliklinika muassasasi fuqarolarga xizmat koʻrsatmoqda. Ularning tarkibiga 1 ta koʻp tarmoqli markaziy poliklinika, 9 ta oilaviy poliklinika va 4 ta oilaviy shifokor punkti kiradi. Bundan tashqari, aholiga yanada yaqin boʻlgan 11 ta mahalla tibbiyot punktining faoliyati haqida ham atroflicha maʼlumotlar olindi. Uchrashuvlar va oʻrganishlar davomida soha mutasaddilari va tibbiyot xodimlarining fikr-mulohazalari, takliflari tinglandi. Birlamchi tibbiy xizmat koʻrsatish tizimini yanada mustahkamlash, aholiga tibbiy yordamni oʻz vaqtida va sifatli yetkazish, shuningdek, kasalliklarning oldini olishga qaratilgan profilaktika ishlarini yanada samarali tashkil etish masalalari muhokamalar markazida boʻldi.

Muloqotlar va amaliy oʻrganishlarning keyingi manzili tumanning Navoiy mahallasida joylashgan ayollar fitnes klubi boʻldi. Mehmonlar ushbu maskan faoliyati bilan yaqindan tanishib, xotin-qizlar salomatligini tiklash, ular oʻrtasida sogʻlom turmush tarzi tamoyillarini keng targʻib qilish va ommalashtirish borasida amalga oshirilayotgan ishlarga yuqori baho berdilar. Shuningdek, ushbu binoda joylashgan va mahalliy xotin-qizlarni ish bilan taʼminlashga xizmat qilayotgan tikuvchilik tsexi faoliyati ham atroflicha koʻzdan kechirildi. Aytish joizki, ayollar bandligini taʼminlash, ularni daromad manbaiga ega qilish va jamiyatdagi oʻrnini mustahkamlash «Adolat» sotsial-demokratik partiyasining ustuvor maqsadlari sirasiga kiradi. Zero, ish bilan band boʻlgan, ruhan va jismonan sogʻlom ayol — oilaning va demakki, butun jamiyatning mustahkam ustunidir.

Umuman olganda, Amudaryo tumanida 49 ta mahalla mavjud boʻlib, ularda 219 ming 300 nafar aholi istiqomat qiladi. Har bir mahallaning oʻz oʻziga xos sharoiti, geografik joylashuvi va har bir oilaning oʻz ehtiyoji bor. Shu bois, hududdagi haqiqiy vaziyatni xolisona oʻrganishda odamlarning fikrini bevosita joyida tinglash va ularning munosib hayot kechirishiga, kundalik turmushiga bevosita taʼsir koʻrsatayotgan eng muhim masalalarni chuqur anglash juda muhimdir. Parlament va mahalliy Kengashlar vakillarining tuman boʻylab amalga oshirgan xizmat safari davomida mahallalar va ijtimoiy soha obʼektlarida boʻlib, mavjud sharoitlar bilan bevosita tanishilgani aynan shu maqsadga xizmat qildi. Ushbu oʻrganishlar jarayonida aniqlangan muammolarni tezkor va samarali hal etish uchun masʼul tashkilot va idoralar bilan birgalikda aniq, amaliy chora-tadbirlarni belgilashga asosiy eʼtibor qaratildi.

Amudaryo tumanidagi keng qamrovli oʻrganishlar davomida partiya ishchi guruhi Ijtimoiy himoya milliy agentligining tuman boʻlimida ham boʻlishdi. Bu yerda aholining yordamga muhtoj qatlamlariga koʻrsatilayotgan ijtimoiy xizmatlar koʻlami, ajratilayotgan koʻmaklarning manzilliligi va mavjud muammolarni hal etish borasidagi amaliy ishlar bilan yaqindan tanishildi.

Raqamlarga murojaat qiladigan boʻlsak, tumanda ijtimoiy himoyaga muhtoj shaxslar 28 401 nafarni, yaʼni aholi umumiy sonining 12,7 foizini tashkil etadi. Ularning 4 728 nafari «Ijtimoiy reyestr» tizimiga kiritilgan oilalar aʼzolaridir. Shunga qoʻshimcha ravishda, tumanda 6 409 nafar nogironligi boʻlgan shaxs istiqomat qiladi. Ular orasida 995 nafar voyaga yetmagan bola borligi alohida eʼtiborga molik. Boʻlim xodimlari va mutasaddilar bilan boʻlib oʻtgan samimiy muloqotda ushbu ehtiyojmand qatlamga koʻrsatilayotgan ijtimoiy xizmatlar va ularning hayotiy ehtiyojlariga mos ravishda manzilli koʻmakni tashkil etish masalalariga alohida toʻxtalib oʻtildi.

Taʼkidlash joizki, 2026-yilning oʻtgan davri mobaynida «Saxovat va koʻmak» jamgʻarmasi hisobidan 694 nafar fuqaroga jami 2 milliard soʻmdan ortiq miqdorda ijtimoiy yordam koʻrsatilgan. Shuningdek, tuman hokimligi huzuridagi «Infratuzilma va ijtimoiy barqarorlik» jamgʻarmasiga salkam 1,5 milliard soʻm mablagʻ oʻtkazib berilgani aholini qoʻllab-quvvatlash borasidagi koʻlamning salmoqli ekanidan dalolat beradi. Mazkur oʻrganish ishlarida vakolatli vakillar tomonidan ajratilayotgan ushbu koʻmaklar va moddiy yordamlarning fuqarolarga qay darajada yetib borayotgani, ularning hayotiy muammolari qay yoʻsinda hal etilayotganiga jiddiy eʼtibor qaratildi.

Soha xodimlarining fikr va takliflari tinglanib, xizmatlar sifatini oshirish hamda ehtiyojmand insonlarni tizimli qoʻllab-quvvatlash ishlarini yanada yaxshilash yoʻllari atroflicha muhokama qilindi. Zero, ijtimoiy himoya sohasida muammoni oʻz vaqtida aniqlash, insonning asl ehtiyojini toʻgʻri oʻrganish, unga mos va sifatli xizmat koʻrsatish hamda yakuniy natijani muntazam kuzatib borish bir-biri bilan uzviy bogʻliq boʻlgan yaxlit jarayondir.

Shundan keyin Oliy Majlis Qonunchilik palatasi va Xalq deputatlari Amudaryo tuman Kengashi deputatlari hamda partiya ishchi guruhi aʼzolari tumandagi 40-sonli umumiy oʻrta taʼlim maktabida boʻlishdi.

Mazkur taʼlim maskanida oʻtkazilgan oʻrganishlar davomida ishchi guruhi aʼzolari maktabning pedagogik jamoasi hamda oʻquvchi yoshlar bilan ochiq va samimiy muloqotda boʻldilar. Ular taʼlim muassasasida yosh avlodga berilayotgan bilim va tarbiya darajasi, yaratilgan zamonaviy sharoitlar, oʻquv xonalarining zarur jihozlar hamda koʻrgazmali vositalar bilan taʼminlangani va taʼlim sifatini oshirish borasida amalga oshirilayotgan islohotlar bilan yaqindan tanishdilar. Qizgʻin kechgan suhbat jarayonida oʻqituvchi va oʻquvchilarning fikr-mulohazalari, ularni oʻylantirayotgan masalalar, amaliy takliflari tinglandi. Yakunda taʼlim sifatini yanada yaxshilash va yoshlarning sifatli bilim olishlari uchun zarur sharoitlarni yaratish boʻyicha tegishli chora-tadbirlar dasturi belgilab olindi.

Xulosa oʻrnida aytish mumkinki, bu kabi atroflicha va kompleks oʻrganishlar, xalq vakillarining bevosita joylarga chiqib, aholi bilan yuzma-yuz muloqot qilishi mavjud muammolarni oʻz vaqtida aniqlash va ularni bartaraf etishda muhim ahamiyat kasb etadi. Amudaryo tumanida amalga oshirilgan bu kabi amaliy tadbirlar aholi sogʻligʻini saqlash, xotin-qizlar bandligini taʼminlash, ijtimoiy himoya tizimini takomillashtirish va taʼlim sifatini yangi bosqichga koʻtarishda muhim kafolat boʻlib xizmat qiladi.