Депутатлар Амударё туманида тиббиёт, ижтимоий ҳимоя ва таълим соҳаларини ўрганди

Мамлакатимизда аҳоли фаровонлигини таъминлаш, одамларни қийнаб келаётган маиший ва ижтимоий муаммоларни жойида ўрганиш ҳамда уларга самарали ечим топиш борасида кенг кўламли ишлар амалга оширилмоқда. Айниқса, парламент ва маҳаллий Кенгашлар депутатларининг жойларга чиқиб, ҳудудлардаги реал аҳвол билан яқиндан танишиши, аҳолининг кайфияти ва эҳтиёжларини бевосита ўрганиши хайрли анъанага айланди. Олий Мажлис Қонунчилик палатаси депутатлари ҳамда «Адолат» социал-демократик партияси ишчи гуруҳи аъзолари томонидан навбатдаги ана шундай ўрганишлар Амударё туманида ўтказилди. Тадбирда Халқ депутатлари Амударё туман Кенгаши депутатлари, Кенгаш котибияти мудири Мансур Уразбаев ҳамда туман ҳокими ўринбосари, оила ва хотин-қизлар бўлими бошлиғи Гўзал Сабуровалар ҳам иштирок этдилар.

Ташриф давомида биринчи манзил туман тиббиёт бирлашмаси бўлди. Маълумки, тиббиёт соҳаси инсон қадри, унинг саломатлиги билан бевосита боғлиқ бўлиб, энг муҳим йўналишлардан бири ҳисобланади. Депутатлар ва партия ишчи гуруҳи аъзолари ушбу муассасада аҳолига кўрсатилаётган тиббий хизматлар даражаси, беморлар ва соҳа ходимлари учун яратилган замонавий шароитлар билан яқиндан танишдилар. Айниқса, мавжуд инфратузилма ва имкониятлардан қай даражада фойдаланилаётганига алоҳида эътибор қаратилди.

Маълумот ўрнида таъкидлаш жоизки, Амударё туман тиббиёт бирлашмаси таркибидаги ушбу шифохона 421 ўринга мўлжалланган. Бу ерда беморларнинг саломатлигини мустаҳкамлаш ва уларни оёққа турғазишга хизмат қилувчи 36 ўринли хўжалик ҳисобидаги реабилитация бўлими ҳам самарали фаолият юритмоқда. Шу билан бирга, туманда аҳолига бирламчи тиббий-санитария ёрдамини кўрсатиш тармоғи ҳам кенг йўлга қўйилган. Ҳозирги кунда туманда умумий қабул қуввати 1 455 нафарни ташкил этувчи 14 та амбулатория-поликлиника муассасаси фуқароларга хизмат кўрсатмоқда. Уларнинг таркибига 1 та кўп тармоқли марказий поликлиника, 9 та оилавий поликлиника ва 4 та оилавий шифокор пункти киради. Бундан ташқари, аҳолига янада яқин бўлган 11 та маҳалла тиббиёт пунктининг фаолияти ҳақида ҳам атрофлича маълумотлар олинди. Учрашувлар ва ўрганишлар давомида соҳа мутасаддилари ва тиббиёт ходимларининг фикр-мулоҳазалари, таклифлари тингланди. Бирламчи тиббий хизмат кўрсатиш тизимини янада мустаҳкамлаш, аҳолига тиббий ёрдамни ўз вақтида ва сифатли етказиш, шунингдек, касалликларнинг олдини олишга қаратилган профилактика ишларини янада самарали ташкил этиш масалалари муҳокамалар марказида бўлди.

Мулоқотлар ва амалий ўрганишларнинг кейинги манзили туманнинг Навоий маҳалласида жойлашган аёллар фитнес клуби бўлди. Меҳмонлар ушбу маскан фаолияти билан яқиндан танишиб, хотин-қизлар саломатлигини тиклаш, улар ўртасида соғлом турмуш тарзи тамойилларини кенг тарғиб қилиш ва оммалаштириш борасида амалга оширилаётган ишларга юқори баҳо бердилар. Шунингдек, ушбу бинода жойлашган ва маҳаллий хотин-қизларни иш билан таъминлашга хизмат қилаётган тикувчилик цехи фаолияти ҳам атрофлича кўздан кечирилди. Айтиш жоизки, аёллар бандлигини таъминлаш, уларни даромад манбаига эга қилиш ва жамиятдаги ўрнини мустаҳкамлаш «Адолат» социал-демократик партиясининг устувор мақсадлари сирасига киради. Зеро, иш билан банд бўлган, руҳан ва жисмонан соғлом аёл — оиланинг ва демакки, бутун жамиятнинг мустаҳкам устунидир.

Умуман олганда, Амударё туманида 49 та маҳалла мавжуд бўлиб, уларда 219 минг 300 нафар аҳоли истиқомат қилади. Ҳар бир маҳалланинг ўз ўзига хос шароити, географик жойлашуви ва ҳар бир оиланинг ўз эҳтиёжи бор. Шу боис, ҳудуддаги ҳақиқий вазиятни холисона ўрганишда одамларнинг фикрини бевосита жойида тинглаш ва уларнинг муносиб ҳаёт кечиришига, кундалик турмушига бевосита таъсир кўрсатаётган энг муҳим масалаларни чуқур англаш жуда муҳимдир. Парламент ва маҳаллий Кенгашлар вакилларининг туман бўйлаб амалга оширган хизмат сафари давомида маҳаллалар ва ижтимоий соҳа объектларида бўлиб, мавжуд шароитлар билан бевосита танишилгани айнан шу мақсадга хизмат қилди. Ушбу ўрганишлар жараёнида аниқланган муаммоларни тезкор ва самарали ҳал этиш учун масъул ташкилот ва идоралар билан биргаликда аниқ, амалий чора-тадбирларни белгилашга асосий эътибор қаратилди.

Амударё туманидаги кенг қамровли ўрганишлар давомида партия ишчи гуруҳи Ижтимоий ҳимоя миллий агентлигининг туман бўлимида ҳам бўлишди. Бу ерда аҳолининг ёрдамга муҳтож қатламларига кўрсатилаётган ижтимоий хизматлар кўлами, ажратилаётган кўмакларнинг манзиллилиги ва мавжуд муаммоларни ҳал этиш борасидаги амалий ишлар билан яқиндан танишилди.

Рақамларга мурожаат қиладиган бўлсак, туманда ижтимоий ҳимояга муҳтож шахслар 28 401 нафарни, яъни аҳоли умумий сонининг 12,7 фоизини ташкил этади. Уларнинг 4 728 нафари «Ижтимоий реестр» тизимига киритилган оилалар аъзоларидир. Шунга қўшимча равишда, туманда 6 409 нафар ногиронлиги бўлган шахс истиқомат қилади. Улар орасида 995 нафар вояга етмаган бола борлиги алоҳида эътиборга молик. Бўлим ходимлари ва мутасаддилар билан бўлиб ўтган самимий мулоқотда ушбу эҳтиёжманд қатламга кўрсатилаётган ижтимоий хизматлар ва уларнинг ҳаётий эҳтиёжларига мос равишда манзилли кўмакни ташкил этиш масалаларига алоҳида тўхталиб ўтилди.

Таъкидлаш жоизки, 2026 йилнинг ўтган даври мобайнида «Саховат ва кўмак» жамғармаси ҳисобидан 694 нафар фуқарога жами 2 миллиард сўмдан ортиқ миқдорда ижтимоий ёрдам кўрсатилган. Шунингдек, туман ҳокимлиги ҳузуридаги «Инфратузилма ва ижтимоий барқарорлик» жамғармасига салкам 1,5 миллиард сўм маблағ ўтказиб берилгани аҳолини қўллаб-қувватлаш борасидаги кўламнинг салмоқли эканидан далолат беради. Мазкур ўрганиш ишларида ваколатли вакиллар томонидан ажратилаётган ушбу кўмаклар ва моддий ёрдамларнинг фуқароларга қай даражада етиб бораётгани, уларнинг ҳаётий муаммолари қай йўсинда ҳал этилаётганига жиддий эътибор қаратилди.

Соҳа ходимларининг фикр ва таклифлари тингланиб, хизматлар сифатини ошириш ҳамда эҳтиёжманд инсонларни тизимли қўллаб-қувватлаш ишларини янада яхшилаш йўллари атрофлича муҳокама қилинди. Зеро, ижтимоий ҳимоя соҳасида муаммони ўз вақтида аниқлаш, инсоннинг асл эҳтиёжини тўғри ўрганиш, унга мос ва сифатли хизмат кўрсатиш ҳамда якуний натижани мунтазам кузатиб бориш бир-бири билан узвий боғлиқ бўлган яхлит жараёндир.

Шундан кейин Олий Мажлис Қонунчилик палатаси ва Халқ депутатлари Амударё туман Кенгаши депутатлари ҳамда партия ишчи гуруҳи аъзолари тумандаги 40-сонли умумий ўрта таълим мактабида бўлишди.

Мазкур таълим масканида ўтказилган ўрганишлар давомида ишчи гуруҳи аъзолари мактабнинг педагогик жамоаси ҳамда ўқувчи ёшлар билан очиқ ва самимий мулоқотда бўлдилар. Улар таълим муассасасида ёш авлодга берилаётган билим ва тарбия даражаси, яратилган замонавий шароитлар, ўқув хоналарининг зарур жиҳозлар ҳамда кўргазмали воситалар билан таъминлангани ва таълим сифатини ошириш борасида амалга оширилаётган ислоҳотлар билан яқиндан танишдилар. Қизғин кечган суҳбат жараёнида ўқитувчи ва ўқувчиларнинг фикр-мулоҳазалари, уларни ўйлантираётган масалалар, амалий таклифлари тингланди. Якунда таълим сифатини янада яхшилаш ва ёшларнинг сифатли билим олишлари учун зарур шароитларни яратиш бўйича тегишли чора-тадбирлар дастури белгилаб олинди.

Хулоса ўрнида айтиш мумкинки, бу каби атрофлича ва комплекс ўрганишлар, халқ вакилларининг бевосита жойларга чиқиб, аҳоли билан юзма-юз мулоқот қилиши мавжуд муаммоларни ўз вақтида аниқлаш ва уларни бартараф этишда муҳим аҳамият касб этади. Амударё туманида амалга оширилган бу каби амалий тадбирлар аҳоли соғлиғини сақлаш, хотин-қизлар бандлигини таъминлаш, ижтимоий ҳимоя тизимини такомиллаштириш ва таълим сифатини янги босқичга кўтаришда муҳим кафолат бўлиб хизмат қилади.