Қонунчиликдаги аёллар ва болалар ҳуқуқлари ҳимоясига оид нормалар тушунтирилди
Оила институтини мустаҳкамлаш, аёллар ва болалар ҳуқуқларини ҳимоя қилиш давлат сиёсатининг устувор йўналишларидан бири бўлиб, қабул қилинаётган ҳужжатлар мазмунини аҳолига етказиш суд органлари фаолиятидаги долзарб вазифа ҳисобланади.
Амударё тумани Холимбег овулидаги 35-сонли мактаб биносида жиноят ишлари бўйича Амударё туман суди тергов судьяси Донахон Юсупова, Холимбег овул фуқаролар йиғини раиси Зарипбой Алламов, Ўзбекистон Республикаси Президентининг тумандаги халқ қабулхонаси мудири ўринбосари Ботир Қочқаров ва бош мутахассиси Санъат Авезов иштирокида сайёр қабул ўтказилди.
Йиғилишда тергов судьяси Донахон Юсупова Ўзбекистон Республикаси Президентининг 2026 йил 3 мартдаги “Аёллар ва болалар ҳуқуқларининг ҳимоясини кучайтириш ҳамда уларга нисбатан тазйиқ ва зўравонлик ҳолатларининг олдини олиш бўйича қўшимча ташкилий-ҳуқуқий чоралар тўғрисида”ги фармони мазмун-моҳиятини тушунтирди.
Фармон эрта турмуш қуриш ҳолатларининг олдини олиш, ваколатли идоралар фаолиятини мувофиқлаштириш ҳамда идоралараро ҳамкорликни таъминлашга қаратилгани, унда никоҳ ёшини камайтиришнинг аниқ асосларини белгилаш тўғрисидаги таклиф маъқуллангани қайд этилди.
Хусусан, 2027 йилдан бошлаб ҳар иккала тараф камида 21 ёшга тўлганда биринчи никоҳ тузган ёш оилаларга қўшимча имтиёзлар берилиши, улар Ижтимоий реестрга киритилганда субсидия, ссуда ва грантлар белгиланган миқдордан 1,5 бараварга оширилиши, никоҳ шартномасини тузганлар давлат божидан озод этилиши айтилди.
Шунингдек, 2026/2027 ўқув йилидан бошлаб ҳомиладор талаба-қизлар ва 3 ёшгача фарзанд тарбияси билан шуғулланувчи, курсдан курсга қолган ёхуд талабалар сафидан чиқарилган шахсларга фанлар фарқини қайта ўзлаштириш шарти билан таълимни давом эттириш имкони яратилади. Олий таълим, фан ва инновациялар вазирлиги уч ой муддатда Вазирлар Маҳкамасига масофавий таълим бўйича таклифлар киритади.
Шу билан бирга, вояга етмаганлар билан никоҳ тузишга даъват этганлик учун маъмурий жавобгарлик белгиланиши, 2026 йил 1 сентябрдан никоҳ ёши тўғрисидаги қонунчиликни бузганлик учун ундирилган жарима суммасининг 15 фоизи хабар берган шахсларни рағбатлантиришга йўналтирилиши таъкидланди. Тушунтиришлардан сўнг фуқаролар суд-ҳуқуқ масалалари бўйича саволларига жавоб олдилар.
Қонун нормаси аҳоли яшайдиган жойда тушунтирилганда ижро самараси ошади, чунки оила ўз қарорини ҳужжат матнидан эмас, унинг маъносини тушунган ҳолда қабул қилади. Шу жиҳатдан сайёр қабуллар фармон ижросини маҳалла даражасига олиб тушишда муҳим восита бўлмоқда.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
