Саҳна орқали фикрлашув: муҳокама марказида – аёл ҳуқуқлари
Ижтимоий муаммоларни жамоатчилик билан биргаликда муҳокама қилиш маданияти сўнгги йилларда фуқаролик жамияти институтлари фаолиятининг ажралмас қисмига айланиб бормоқда. Нодавлат нотижорат ташкилотларининг салоҳиятини мустаҳкамлаш, уларнинг давлат идоралари билан ҳамкорлигини йўлга қўйиш эса бу борадаги ишларнинг самарасини оширишга хизмат қилмоқда. Айниқса, оила ва хотин-қизлар мавзусидаги масалалар очиқ мулоқот, ўзаро ишонч ҳамда изчил ҳамкорликни талаб этади. Амударё туманида “Аёл тақдири: саҳна орқали фикрлашув” лойиҳаси доирасида ўтказилган тадбир ҳам шу мақсадга қаратилгани билан аҳамиятлидир.
Тадбир Европа Иттифоқи томонидан молиялаштирган “Ўзбекистондаги нодавлат нотижорат ташкилотларининг институционал ва дастурий салоҳиятини мустаҳкамлаш ҳамда нодавлат нотижорат ташкилотлари билан давлат идоралари ўртасидаги муносабатларни янада яхшилаш” лойиҳаси доирасида ташкил этилди.
Лойиҳани Фуқаролик ташаббусларини қўллаб-қувватлаш марказининг Қорақалпоғистон ҳудудий бўлими амалга оширмоқда. Давра суҳбатининг асосий мақсади — лойиҳа вазифаларини жамоатчиликка таништириш, ҳамкор ташкилотлар билан алоқаларни кучайтириш ҳамда оилавий зўравонлик ва хотин-қизлар ҳуқуқлари юзасидан очиқ фикр алмашиш учун қулай муҳит яратишдан иборат.
Лойиҳанинг ўзига хослиги шундаки, ижтимоий масалалар анъанавий семинар ва лекциялар билан чекланмай, форум-театр ҳамда интерактив фикрлашув усуллари орқали кўриб чиқилди. Тажрибали актёрлар иштирокида реал ҳаётда учрайдиган ҳолатларни акс эттирувчи саҳна кўринишлари намойиш этилиши эса мураккаб мавзуларни қуруқ маъруза шаклида эмас, балки жонли воқеа тарзида етказиш имконини берди.
Спектакль намойиши вақтида томошабинлар шунчаки кузатувчи бўлиб қолмади. Саҳна кўриниши давомида иштирокчиларга “Агар сиз шу вазиятга тушиб қолсангиз, қандай йўл тутган бўлардингиз?” деган савол асосида фикр билдириш имконияти берилди, улар вазиятни турли нуқтаи назардан баҳолаб, ечим йўлларини таклиф қилишди. Шу тариқа муҳокама залдаги ҳар бир иштирокчининг фикри ҳисобига бойиб борди.
Лойиҳа доирасида шунингдек, фуқароларга ҳуқуқий ва психологик кўмак ҳам кўрсатилди. Мурожаатлар юзасидан тажрибали юрист ва психологлар маслаҳат берди, бу эса аҳолининг ўз ҳуқуқларини англаши, мавжуд ҳимоя механизмларидан хабардор бўлишига йўл очади.
Сценарий муаллифи Наргиза Қаландарова, режиссёр Лизахон Ўразимбетова томонидан саҳналаштирилган ушбу спектакль ва шу мавзудаги давра суҳбати Қорақалпоғистоннинг учта ҳудудида, камида 600 нафарга яқин иштирокчини жалб қилган ҳолда ўтказилиши режалаштирилган. Бу каби ташаббуслар аёлларнинг ҳуқуқий саводхонлигини кучайтириш, оилавий зўравонликнинг олдини олиш, фуқаролар, фуқаролик жамияти институтлари ва давлат органлари ўртасидаги шерикликни янада мустаҳкамлашга хизмат қилиши шубҳасиз.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
