Информатика ўқитувчилари учун кибархавфсизлик бўйича амалий семинар ўтказилди
Интернет фойдаланувчилари сони ортиб бораётган ҳозирги шароитда рақамли муҳитда хавфсизликни таъминлаш давлат сиёсатининг устувор йўналишларидан бирига айланди. Кибержиноятчиликнинг олдини олиш, ўқувчи-ёшларнинг рақамли саводхонлигини ошириш бўйича изчил чоралар кўрилаётган бўлиб, бу вазифа таълим тизими зиммасига ҳам масъулият юклайди.
2026 йил 24 сентябр куни Амударё тумани Мактабгача ва мактаб таълими бўлимининг Ахборот-коммуникация технологияларини жорий этиш ва таълим ташкилотларини рақамлаштириш шўъбаси бош методисти Жаҳонгир Иброҳимов ҳамда методист Ғайрат Муратов томонидан тумандаги барча умумтаълим мактабларининг информатика фани ўқитувчилари иштирокида амалий ўқув семинари ташкил этилди. Семинарда 90 нафарга яқин педагог иштирок этди.
Семинар давомида таълим жараёнида ахборот-коммуникация технологияларидан фойдаланиш кўлами кенгайиб бораётгани, шу билан бирга кибертаҳдидлардан ҳимояланиш ва шахсий маълумотларни асраш кўникмаларини ошириш долзарб вазифа экани таъкидланди. Ўқувчилар билан «Менинг рақамли ҳуқуқларим» мавзусида тарғибот ишларини йўлга қўйиш, уларга интернетдаги мулоқот маданияти ҳақида тушунча бериш лозимлиги қайд этилди.
Айтиш жоизки, «Кибархавфсизлик» ойлиги доирасида мактабларда «Рақамли гигиена» соатларини мунтазам ўтказиш, кучли пароллардан фойдаланиш, шубҳали ҳаволалар ва номаълум файлларни очмаслик, интернетдаги фирибгарликдан эҳтиёт бўлиш бўйича тушунтириш ишларини кучайтириш тавсия этилди.
Тадбирда кибержиноятчиликнинг «дропперлик» кўриниши алоҳида кўриб чиқилиб, бу ўз банк пластик картасини ёки ундан фойдаланиш имконини берувчи маълумотларни фирибгарларга бериб туриш билан боғлиқ хавфли ҳолат экани тушунтирилди. Банк иловасига кириш маълумотлари, тасдиқлаш кодлари ва ПИН-код ошкор этилмаслиги уқтирилди.
Хусусан, «картангизни ижарага берамиз», «картангиз орқали пул ўтказиб бериш учун ҳақ тўлаймиз», «осон даромад топинг» каби таклифларга ишонмаслик ва бундай ҳолатлар ҳақида тегишли тартибда хабар бериш, бегона шахсларнинг ноқонуний молиявий операцияларига йўл қўйиш қонунчиликка мувофиқ жавобгарликка сабаб бўлиши кўрсатиб ўтилди.
Семинарда ўқувчиларни замонавий рақамли касбларга йўналтириш масалалари ҳам муҳокама қилиниб, aileaders.uz платформаси орқали «Беш миллион сунъий интеллект етакчилари» лойиҳасига жалб этиш имкониятлари тушунтирилди. Информатика ўқитувчиларига лойиҳага қизиқиши юқори ўқувчиларни қамраб олиш тавсия қилинди.
Ўқитувчилар учун ташкил этилган бундай машғулотлар олинган билимнинг бевосита синф хонасига етиб боришини таъминлайди. Рақамли муҳитда ўзини ҳимоя қилишни билган ўқувчи эса эртанги рақамли иқтисодиётнинг ишончли иштирокчисига айланади.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
