9 ёшли болалар папиллома вирусига қарши эмланмоқда
Юқумли касалликларнинг олдини олишда профилактик эмлаш энг ишончли восита сифатида эътироф этилган бўлиб, мамлакатимизда бу йўналишдаги ишлар йилдан-йилга кенгайиб, «Миллий эмлаш календари» янги вакциналар билан бойитилмоқда. Бугунги кунда календарга 13 турдаги касалликка қарши эмлаш киритилган.
Одам папиллома вирусининг оғир асоратларини инобатга олган ҳолда, рўйхатга 9 ёшли болаларни ушбу вирусга қарши профилактик эмлаш ҳам қўшилган. 2019 йил октябрь ойидан бошлаб 9 ёшли қиз болалар эмланиб келинмоқда, жорий йилнинг октябрь ойидан эса ўғил болаларни ҳам эмлаш бошланди.
Амударё туман Санитария-эпидемиологик осойишталик ва жамоат саломатлиги бўлими томонидан бу йил 9 ёшли болалар учун 3712 доза вакцина даволаш-профилактика муассасаларидаги 14 та эмлаш пунктига махсус транспортда етказиб берилди. Эмлашни амалга оширадиган тиббиёт ходимлари ўқитилиб, уларга сертификатлар тақдим этилган.
Маълумот ўрнида айтиш жоизки, одам папиллома вируси эркаклар ва аёллар орасида кенг тарқалган бўлиб, ҳозирда унинг 600га яқин тури мавжуд, шундан 80 тури ўрганилган. Қарийб 40 тури аёлларнинг жинсий аъзоларида касаллик қўзғатади, 15 турининг эса канцероген таъсири аниқланган.
Бачадон бўйни саратони ҳолатларининг 70 фоизини вируснинг 16 ва 18-турлари келтириб чиқаради, шунингдек яна бир неча турлари ҳам онкологик касалликка сабаб бўлиши мумкин. Эркакларда вирус оғиз-томоқ ва аногенитал органлар саратонини қўзғатади.
Вирус манбаи бемор одам ва вирус ташувчилар ҳисобланиб, у мулоқот ҳамда жинсий йўл билан юқади; «кириш эшиги» бўлиб тери ва шиллиқ қаватлардаги майда жароҳатлар хизмат қилади. Яширин даври бир неча ойдан бир неча йилгача, онкологик касалликнинг ривожланиши эса 5 йилдан 30 йилгача, камдан-кам ҳолларда 1 йилгача давом этади.
Қайд этиш жоизки, ҳозирча вирусга бевосита таъсир қиладиган дори воситалари мавжуд эмас, шу боис касалликнинг олдини олишда профилактик эмлаш, болаларга соғлом турмуш тарзи ва тамаки чекишнинг зарарини тушунтириш, ёшига мос жинсий тарбия бериш ҳамда ўғил болаларни хатна қилиш бирламчи чора-тадбир саналади.
Иккиламчи профилактика сифатида 30 ёш ва ундан катта аёллар ҳамда эркакларни скринингдан ўтказиш, таҳлилларни текширтириб вирусни эрта аниқлаш ва зудлик билан даволашни бошлаш тавсия этилади. Айтиш жоизки, бачадон бўйни саратони аёллар орасидаги онкологик касалликлар ичида иккинчи ўринни эгаллайди.
Демак, фарзанд саломатлигини асраш имконияти бугун ота-оналар қўлида: ўз вақтида қилинган эмлаш келажакда оғир касалликнинг олдини олишга хизмат қилади.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
