Амударё нуронийлари ёшлар тарбияси бўйича аниқ вазифаларни белгилаб олди

Кекса авлоднинг ҳаётий тажрибаси ва маънавий обрўси маҳалла барқарорлигининг муҳим таянчи бўлиб, сўнгги йилларда мамлакатимизда нуронийларнинг ижтимоий фаоллигини ошириш давлат сиёсатининг алоҳида йўналишига айланди. Зеро, ёши улуғ инсонларнинг насиҳати оилада ҳам, маҳаллада ҳам қонундан кам таъсир қилмайди, деган қараш халқимиз анъаналарида чуқур илдиз отган.

Бугун нуронийлар ёшлар тарбиясида, оилаларни мустаҳкамлашда ва маҳалладаги муаммоларни ҳал этишда маслаҳатчи вазифасини бажармоқда. Айниқса, маҳалла институти янги мазмун касб этаётган ҳозирги шароитда кексаларнинг сўзи ҳамда ҳаётий йўли ёшлар учун тўғри йўналиш беради.

Бу борадаги амалий ишларнинг давоми сифатида жорий йилнинг 22 сентябрь куни Ўзбекистон маҳаллалари уюшмаси Амударё туман бўлими биносида маҳаллалардаги фаол нуроний бувижонлар ҳамда «Кексалар маслаҳати» гуруҳлари раислари иштирокида учрашув бўлиб ўтди.

Учрашувни «Нуроний» жамғармаси Амударё туман бўлими раиси Бекман Аллаберганов кириш сўзи билан очиб берди. Унда «Нуроний» жамғармаси Республика бошқаруви бўлим бошлиғи Мажид Умаров ҳамда Хоразм вилояти «Нуроний» жамғармаси раиси ўринбосари Эркин Атажанов иштирок этдилар.

Мулоқотда Президентимизнинг Қорақалпоғистон Республикасига ташрифи давомида берган топшириқлари ижросини таъминлаш, хусусан, нуронийларнинг жамиятдаги ўрни ва фаоллигини ошириш масалалари атрофлича кўриб чиқилди. Биринчи навбатда ҳар бир мактаб ва боғчага тажрибали нуронийларни бириктириш, улар орқали ўқувчи-ёшларга одоб-ахлоқ, билим ва ҳаётий насиҳатлар бериш тизимини йўлга қўйиш вазифаси белгиланди.

Шу билан бирга, ёш авлодда ватанпарварлик ва миллий қадриятларга ҳурмат туйғусини шакллантириш мақсадида туман бўйлаб «Уч авлод учрашувлари»ни янада кўпроқ ўтказиш зарурлиги қайд этилди. Маҳалла ва хонадонларда озодаликни таъминлаш ҳамда «Яшил макон» умуммиллий лойиҳасида кекса авлоднинг ибратли ролини кўрсатиш ҳам устувор вазифалар сирасига киритилди.

Бундан ташқари, «Кексалар маслаҳати» гуруҳлари фаолиятини такомиллаштириш, ҳар бир маҳаллада мавжуд имкониятлардан тўлиқ фойдаланиш ва гуруҳ аъзоларининг масъулиятини ошириш масаласига ҳам алоҳида эътибор қаратилди. Камбағалликни қисқартириш йўналишида эҳтиёжманд оилаларга манзилли ёрдам кўрсатиш, томорқадан унумли фойдаланиш борасида нуронийларнинг бой ҳаётий тажрибасини оммалаштириш лозимлиги таъкидланди.

Учрашув якунида иштирокчилар томонидан билдирилган таклиф ва ташаббуслар атрофлича тингланиб, белгиланган вазифаларни маҳаллалар ва муассасалар кесимида тизимли амалга ошириш бўйича тегишли чора-тадбирлар ишлаб чиқилди.

Бундай мулоқотлар нуронийларнинг билими ва тажрибасини маҳалла ҳаётининг амалий масалаларига йўналтириш имконини беради. Мактаб ва боғчаларга бириктирилган кексаларнинг ёшлар билан мунтазам суҳбати, «Уч авлод учрашувлари» ва манзилли ёрдам пировардида оилалар мустаҳкамлиги ва маҳаллаларда соғлом маънавий муҳитнинг қарор топишига хизмат қилади.