Amudaryo nuroniylari yoshlar tarbiyasi boʻyicha aniq vazifalarni belgilab oldi

Keksa avlodning hayotiy tajribasi va maʼnaviy obroʻsi mahalla barqarorligining muhim tayanchi boʻlib, soʻnggi yillarda mamlakatimizda nuroniylarning ijtimoiy faolligini oshirish davlat siyosatining alohida yoʻnalishiga aylandi. Zero, yoshi ulugʻ insonlarning nasihati oilada ham, mahallada ham qonundan kam taʼsir qilmaydi, degan qarash xalqimiz anʼanalarida chuqur ildiz otgan.

Bugun nuroniylar yoshlar tarbiyasida, oilalarni mustahkamlashda va mahalladagi muammolarni hal etishda maslahatchi vazifasini bajarmoqda. Ayniqsa, mahalla instituti yangi mazmun kasb etayotgan hozirgi sharoitda keksalarning soʻzi hamda hayotiy yoʻli yoshlar uchun toʻgʻri yoʻnalish beradi.

Bu boradagi amaliy ishlarning davomi sifatida joriy yilning 22-sentyabr kuni Oʻzbekiston mahallalari uyushmasi Amudaryo tuman boʻlimi binosida mahallalardagi faol nuroniy buvijonlar hamda «Keksalar maslahati» guruhlari raislari ishtirokida uchrashuv boʻlib oʻtdi.

Uchrashuvni «Nuroniy» jamgʻarmasi Amudaryo tuman boʻlimi raisi Bekman Allaberganov kirish soʻzi bilan ochib berdi. Unda «Nuroniy» jamgʻarmasi Respublika boshqaruvi boʻlim boshligʻi Majid Umarov hamda Xorazm viloyati «Nuroniy» jamgʻarmasi raisi oʻrinbosari Erkin Atajanov ishtirok etdilar.

Muloqotda Prezidentimizning Qoraqalpogʻiston Respublikasiga tashrifi davomida bergan topshiriqlari ijrosini taʼminlash, xususan, nuroniylarning jamiyatdagi oʻrni va faolligini oshirish masalalari atroflicha koʻrib chiqildi. Birinchi navbatda har bir maktab va bogʻchaga tajribali nuroniylarni biriktirish, ular orqali oʻquvchi-yoshlarga odob-axloq, bilim va hayotiy nasihatlar berish tizimini yoʻlga qoʻyish vazifasi belgilandi.

Shu bilan birga, yosh avlodda vatanparvarlik va milliy qadriyatlarga hurmat tuygʻusini shakllantirish maqsadida tuman boʻylab «Uch avlod uchrashuvlari»ni yanada koʻproq oʻtkazish zarurligi qayd etildi. Mahalla va xonadonlarda ozodalikni taʼminlash hamda «Yashil makon» umummilliy loyihasida keksa avlodning ibratli rolini koʻrsatish ham ustuvor vazifalar sirasiga kiritildi.

Bundan tashqari, «Keksalar maslahati» guruhlari faoliyatini takomillashtirish, har bir mahallada mavjud imkoniyatlardan toʻliq foydalanish va guruh aʼzolarining masʼuliyatini oshirish masalasiga ham alohida eʼtibor qaratildi. Kambagʻallikni qisqartirish yoʻnalishida ehtiyojmand oilalarga manzilli yordam koʻrsatish, tomorqadan unumli foydalanish borasida nuroniylarning boy hayotiy tajribasini ommalashtirish lozimligi taʼkidlandi.

Uchrashuv yakunida ishtirokchilar tomonidan bildirilgan taklif va tashabbuslar atroflicha tinglanib, belgilangan vazifalarni mahallalar va muassasalar kesimida tizimli amalga oshirish boʻyicha tegishli chora-tadbirlar ishlab chiqildi.

Bunday muloqotlar nuroniylarning bilimi va tajribasini mahalla hayotining amaliy masalalariga yoʻnaltirish imkonini beradi. Maktab va bogʻchalarga biriktirilgan keksalarning yoshlar bilan muntazam suhbati, «Uch avlod uchrashuvlari» va manzilli yordam pirovardida oilalar mustahkamligi va mahallalarda sogʻlom maʼnaviy muhitning qaror topishiga xizmat qiladi.