ҲАРБИЙ ХИЗМАТЧИЛАР УЧУН КАСБ-ҲУНАР ТАЪЛИМИ КУРСЛАРИ ЯКУНЛАНИБ, СЕРТИФИКАТЛАР ТАНТАНАЛИ ТОПШИРИЛДИ

Амударё туманида жойлашган Давлат хавфсизлик хизмати Чегара қўшинларига қарашли ҳарбий қисмида муддатли ҳарбий хизматни ўтаётган оддий аскарларни касб-ҳунарга ўргатиш, уларнинг касбий билим ва кўникмаларини оширишга қаратилган ўқув курслари муваффақиятли якунланди. Шу муносабат билан ҳарбий хизматчиларга сертификатларни тантанали топшириш маросими бўлиб ўтди.

Мазкур ташаббус Ўзбекистон Республикаси Президенти, Қуролли Кучлар Олий Бош қўмондонининг 2026 йил 7 апрелдаги “Қуролли Кучлар сафида муддатли ҳарбий хизматни ўташ нуфузини ва жозибадорлигини ошириш бўйича навбатдаги чора-тадбирлар тўғрисида”ги қарори ижросини таъминлаш доирасида амалга оширилмоқда.

Ушбу қарор доирасида жорий йилнинг май ойидан бошлаб Давлат хавфсизлик хизмати Чегара қўшинларига қарашли ҳарбий қисмида муддатли ҳарбий хизматни ўтаётган барча оддий аскарларни касбга ўргатиш, замонавий касблар бўйича билим ва амалий кўникмаларини шакллантириш борасида тизимли ишлар йўлга қўйилди. Мазкур жараён Қорақалпоғистон Республикаси Жўқорғи Кенгаши ҳамда туман ҳокимликлари билан ҳамкорликда ташкил этилди.

Лойиҳанинг самарали амалга оширилишини таъминлаш мақсадида Қорақалпоғистон Республикаси Касбий таълим агентлиги ва ушбу ҳарбий қисм ўртасида муддатли ҳарбий хизматчиларни касб-ҳунарга ўргатиш бўйича ўзаро ҳамкорлик меморандуми имзоланди.

Меморандум асосида ҳарбий хизматчилар учун меҳнат бозорида талаб юқори бўлган ахборот технологиялари, компьютер саводхонлиги ҳамда веб-сайтлар яратиш бўйича назарий ва амалий билимларни шакллантириш ҳамда автомобиль электр тизимлари, уларнинг ишлаш тамойиллари, техник хизмат кўрсатиш ва таъмирлаш йўналишлари бўйича касбий кўникмаларни ривожлантиришга эътибор қаратилди.

Ўқув машғулотлари Амударё туманидаги 3-сонли касб-ҳунар мактабининг малакали педагоглари томонидан олиб борилди. Машғулотлар давомида ҳарбий хизматчиларга назарий билимлар билан бир қаторда амалий кўникмалар ҳам берилди. Курс якунида тингловчилар белгиланган тартибда якуний синовлардан муваффақиятли ўтиб, ўзлаштирган касблари бўйича сертификатларга эга бўлишди.

Тадбир давомида сўзга чиққанлар муддатли ҳарбий хизмат даврида ёшларни нафақат ҳарбий-ватанпарварлик руҳида тарбиялаш, балки уларнинг келгусидаги ҳаёти ва меҳнат фаолияти учун зарур бўлган касбий билим ва кўникмалар билан қуроллантириш ҳам муҳим аҳамият касб этишини таъкидладилар.

Таъкидлаш жоизки, ушбу ташаббус ҳарбий хизматчиларнинг бўш вақтини мазмунли ташкил этиш, уларнинг интеллектуал ва касбий салоҳиятини ошириш, ҳарбий хизматдан кейинги ҳаётда муносиб ўрин эгаллашлари ҳамда бандлигини таъминлашга хизмат қилади.

Маросим якунида сертификатларни қўлга киритган ҳарбий хизматчиларга келгусидаги хизмат фаолиятида Ватан ҳимояси йўлида зиммаларига юклатилган жанговар вазифаларни сидқидилдан ва аъло даражада бажаришлари, уларга билдирилган юксак ишончни оқлашлари лозимлиги алоҳида таъкидланди.

Шунингдек, ҳарбий хизматчиларни касб-ҳунарга ўқитиш жараёнида яқиндан амалий ёрдам кўрсатган Амударё туманидаги 3-сонли касб-ҳунар мактаби раҳбарияти ва педагогик жамоасига ҳамкорлик, фидойилик ва масъулиятли меҳнатлари учун миннатдорлик билдирилди.

Чарос Арслонова, туман ҳокимлигининг Ахборот хизмати раҳбари.