АМУДАРЁ ТУМАНИДА “ОСОЙИШТА САРҲАД — БАРЧАМИЗНИКИ” ШИОРИ ОСТИДА ТАРҒИБОТ-ТАШВИҚОТ ТАДБИРИ ЎТКАЗИЛДИ

Амударё тумани Маданият бўлимида Давлат хавфсизлик хизмати Чегара қўшинлари томонидан “Осойишта сарҳад — барчамизники” шиори остида тарғибот-ташвиқот тадбири ташкил этилди. Унда ДХХ Чегара қўшинлари масъуллари, туман ҳокими ўринбосари Жасур Яхшимов, Ўзбекистон маҳаллалари уюшмаси туман бўлими бошлиғи Алишер Йўлдашев, тегишли ташкилот ва идоралар вакиллари, маҳалла фаоллари ҳамда ёшлар иштирок этди. Тадбирда мамлакатимиз давлат чегараларининг дахлсизлигини таъминлаш, сарҳадларимизни ишончли ҳимоя қилиш, юртимиз тинчлиги ва осойишталигини асраш борасида амалга оширилаётган ишлар ҳақида маълумот берилди. Шунингдек, давлат чегараси хавфсизлигини таъминлашда ваколатли органлар ва жамоатчилик ҳамкорлигининг аҳамияти таъкидланди. Тадбир давомида “Давлат чегараси тўғрисида”ги Қонуннинг мазмун-моҳияти, асосий қоидалари, давлат чегарасини қўриқлаш ва ҳимоя қилиш соҳасидаги ваколатлар ҳамда фуқароларнинг иштироки масалалари ёритилди. Жумладан, Қонуннинг 9-моддасида маҳаллий давлат ҳокимияти органларининг, 28-моддасида фуқароларнинг, 30-моддасида эса Давлат хавфсизлик хизмати Чегара қўшинларининг давлат чегарасини қўриқлаш ва ҳимоя қилиш соҳасидаги ваколат ҳамда мажбуриятлари белгиланганига эътибор қаратилди. Таъкидланганидек, чегара хавфсизлигини таъминлашда ҳушёрлик, қонунларга риоя қилиш ва фуқаролик масъулияти муҳим ўрин тутади. Айниқса, чегараолди ҳудудларида яшовчи аҳолининг ҳуқуқий саводхонлигини ошириш, шубҳали ҳолатларга бефарқ бўлмаслик ва ваколатли органлар билан ҳамкорлик қилиш долзарб аҳамиятга эга экани таъкидланди. Қайд этилишича, мамлакатимиздаги қарийб 9 мингта маҳалланинг 552 таси чегараолди ҳудудларида жойлашган. Ушбу маҳаллаларда истиқомат қилувчи аҳолининг давлат чегараси тўғрисидаги қонунчиликдан хабардорлигини ошириш, маҳалла фаоллари ва тегишли ташкилотлар ҳамкорлигини кучайтириш муҳим вазифалардан ҳисобланади. Тадбирда тумандаги маҳаллаларда аҳоли турмуш шароитини яхшилаш, инфратузилмани ривожлантириш ва замонавий шароитлар яратиш борасида амалга оширилаётган ишлар ҳақида ҳам сўз юритилди. Хусусан, “Обод маҳалла” дастури доирасида 2026 йилда туманда 88 километр ички йўлга асфальт қопламаси ётқизилгани, 31 километр масофада тоза ичимлик суви тармоқлари тортилгани, шунингдек, замонавий шароитларга эга учта умумтаълим мактабида қурилиш-реконструкция ишлари амалга оширилгани қайд этилди. Мазкур ишлар маҳаллалар инфратузилмасини яхшилаш, аҳолига қулай шароитлар яратиш ва ёшларнинг сифатли таълим олиши учун имкониятларни кенгайтиришга хизмат қилмоқда. Учрашувда ёшларни Ватанга муҳаббат, миллий қадриятларга ҳурмат ва ватанпарварлик руҳида тарбиялаш, уларда тинчлик ва осойишталикни қадрлаш туйғуларини мустаҳкамлаш масалаларига ҳам алоҳида эътибор қаратилди. Таъкидланганидек, давлат чегараларининг дахлсизлигини таъминлаш нафақат тегишли идоралар, балки ҳар бир фуқаронинг ҳам масъулиятидир. Шу боис бундай тарғибот-ташвиқот тадбирлари аҳолининг ҳуқуқий саводхонлигини ошириш, жамоатчилик ҳамкорлигини мустаҳкамлаш ҳамда фуқароларда юрт тинчлиги ва хавфсизлигига дахлдорлик ҳиссини кучайтиришда муҳим аҳамият касб этади. Чарос Арслонова, туман ҳокимлигининг Ахборот хизмати раҳбари.