Билим ва имкониятлар маскани

Мактаб инсон ҳаётида ва камолотида муҳим аҳамият касб этувчи муқаддас даргоҳлардан биридир. Зеро, инсоннинг илк орзулари, дунё ҳақидаги тасаввурлари, билимга бўлган қизиқиши ва келажакка интилишлари айнан мактаб остонасидан бошланади. Мактаб нафақат савод ўргатади, балки инсонни фикрлашга, изланишга, ўз мақсади сари интилишга, Ватан ва жамият олдидаги масъулиятини англашга чорлайди.

Бугунги кунда мамлакат тараққиётини таълим ва илм-фан ривожисиз тасаввур этиб бўлмайди. Шу боис Ўзбекистонда таълим тизимини ислоҳ қилиш, мактабларни замонавийлаштириш, ўқитувчи касбининг нуфузини ошириш, ёшларга сифатли билим ва тарбия бериш масалаларига алоҳида эътибор қаратилмоқда. Амударё туманидаги 30-сонли умумий ўрта таълим мактаби жамоаси ҳам ана шундай эътибор ва ғамхўрлик натижасида самарали фаолият олиб бормоқда.

Мактаб туман марказида, Навоий маҳалласи ҳудудида жойлашган бўлиб, муассасанинг асосий биноси 2012 йилда фойдаланишга топширилган ва жорий йилда дастур асосида 860 миллиард сўм маблағ эвазига реконструкция қилиниб, 660 ўринли 3 қаватли бино қурилди.

Педагогика жамоасига мактаб директори Улуғбек Раимов раҳбарлик қилмоқда. Ҳозирда мактабда жами 1 104 нафар ўқувчи таҳсил олмоқда, улардан 616 нафари ўғил, 488 нафари қиз болалардир. Жами 46 та синф комплекти (“камплекти” бўлиб ўқилади) шакллантирилган бўлиб, биринчи сменада 24 та синфда 574 нафар, иккинчи сменада эса 22 та синфда 530 нафар ўқувчи билим олади. Таълим ўзбек тилида олиб бориладиган 12 та синфда 265 нафар, рус тилида олиб бориладиган 34 та синфда эса 839 нафар ўқувчи таҳсил олади.

Мактабнинг эришаётган натижалари, аввало, тажрибали педагоглар меҳнати билан боғлиқ. Бугунги кунда бу ерда 90 нафар педагог ходим фаолият юритади. Уларнинг 88 нафари олий, 2 нафари ўрта махсус маълумотга эга. Тоифалар бўйича 15 нафар олий, 20 нафар биринчи, 19 нафар иккинчи тоифали ўқитувчи ва 35 нафари мутахассис ўқитувчилардир.

Шу билан бирга, 25 нафар педагог миллий ва халқаро сертификатларга эга, 1 нафар ўқитувчи вазир жамғармаси устамасини олишга муваффақ бўлди. 2026 йилда 3 нафар ўқувчи асосий фан олимпиадасининг Қорақалпоғистон босқичига йўлланмани қўлга киритди, ўқувчиларда жами 28 та миллий ва халқаро сертификатлар мавжуд.

Битирувчилар кўрсаткичи ҳам ижобий динамикани намоён этмоқда: 2026 йилда 11-синфни тамомлаган 58 нафар ўқувчининг олий таълим муассасаларига кириш бўйича ўртача балли 81,9 баллни ташкил этди. 2025 йилда битирувчилардан 19 нафари, яъни 33 фоизи олийгоҳлар талабаси бўлган эди.

Моддий-техник база ҳам босқичма-босқич яхшиланиб бормоқда. Битта компьютер синфида жами 24 та компьютер ўрнатилган ва улар тўлиқ интернет тармоғига уланган, кутубхона фонди дарсликлр ва бадиий адабиётларга бой. 12га 24 метр ўлчамдаги спорт зали, лаборатория хоналари доимо ўқувчилар билан гавжум.

Мактаб биносида 120 киловатт қувватга эга қуёш панеллари ўрнатилгани муқобил энергиядан самарали фойдаланиш имконини бермоқда. Санитария шароитлари ҳам талаб даражасида бўлиб, муассаса биноси марказлашган ичимлик суви тармоғига уланган.

Яратилган бу каби шароитлар пировардида ўқувчилар билимида ва улар қўлга киритадиган ютуқларда акс этишини инобатга олсак, келгусида мазкур билим даргоҳидан давлат ва жамият манфаатлари йўлида фидойилик билан хизмат қиладиган кадрлар етишиб чиқишига асло шубҳа йўқ.