Ёшлар билан учрашув: спорт, таълим ва янги имкониятлар

Ёшлар — жамиятнинг эртанги куни, юрт тараққиётининг энг катта ҳаракатлантирувчи кучидир. Уларнинг билим олиши, касб-ҳунар эгаллаши, спорт билан мунтазам шуғулланиши ва ўз истеъдодини намоён этиши учун зарур шароит яратиш бугунги куннинг муҳим вазифаларидан биридир. Пайшанба — Ёшлар куни муносабати билан Амударё тумани ҳокими Собир Хўжаметов бошчилигидаги масъуллар томонидан Тўлқин овулида ёшлар билан ўтказилган учрашув айни мақсадларга қаратилгани билан аҳамиятли бўлди.

Учрашув давомида ёшларнинг таълим олиши, спорт билан шуғулланиши, бўш вақтини мазмунли ташкил этиши, иқтидор ва ташаббусларини қўллаб-қувватлаш, улар учун янги имкониятлар яратиш масалалари атрофлича муҳокама қилинди.

Ташриф 33-сонли умумтаълим мактабидаги шароитлар билан танишишдан бошланди. Бу ерда янги ўқув йилига тайёргарлик жараёнлари, ўқув хоналарининг ҳолати, мавжуд инфратузилма, спорт иншоотлари ҳамда ўқувчилар учун яратилаётган имкониятлар кўздан кечирилди.

Бугун таълимга яратилаётган ҳар қандай имконият эртанги кун учун киритилган сармоядир. Шу боис мактабларда ўқувчилар билимини ошириш билан бир қаторда, уларнинг қизиқиш ва қобилиятларини аниқлаш, бўш вақтини мазмунли ташкил этиш ҳам долзарб вазифа бўлиб қолмоқда.

Учрашувда мактабда фаолият юритаётган баскетбол тўгарагига ҳам алоҳида эътибор қаратилди. Баскетбол майдонида шуғулланаётган ёшларнинг иштиёқи, жамоавий ҳаракатлари ва спортга бўлган қизиқиши бундай машғулотлар ёшлар ҳаётида нақадар муҳим ўрин тутаётганини кўрсатди. Зеро, спорт билан банд бўлган ёшнинг вақти мазмунли ўтади, унда интизом, ирода, масъулият ва ғалабага интилиш каби фазилатлар шаклланади.

Шу жиҳатдан ҳам, ҳудудларда турли спорт тўгаракларини кўпайтириш, ёшларнинг қизиқишидан келиб чиқиб улар учун зарур шароитларни яратиш нафақат спортни ривожлантириш, балки баркамол авлодни тарбиялашнинг муҳим йўналишларидан бири.

Ташриф доирасида маҳалла ҳудудида фаолият юритаётган бокс спорт мактаби фаолияти ҳам кўздан кечирилди. Бу ерда мунтазам шуғулланаётган ёш спортчилар билан самимий мулоқот ўтказилиб, уларнинг машғулотлари, эришаётган натижалари ва келгусидаги мақсадлари ўрганилди.

Бокс — ёш спортчидан нафақат жисмоний куч, балки қатъият, сабр-тоқат, ўзини бошқара билиш ва кучли ирода талаб қиладиган спорт тури. Рингда ҳар бир жанг спортчининг маҳорати билан бирга унинг руҳий тайёргарлигини ҳам синовдан ўтказади. Шу боис бокс билан шуғулланаётган ёшларнинг ҳар бир ютуғи ортида машаққатли меҳнат ва тинимсиз изланиш мужассам.

Ташриф доирасида бокс бўйича “Мустақиллик кубоги” мусобақалари ҳам ташкил этилди. Унда ёш боксчилар ўз маҳорат ва иродаларини намойиш этиб, ғолиблик учун муросасиз баҳсларга киришдилар. Мусобақа ёшлар ўртасида соғлом рақобат муҳитини шакллантириш, иқтидорли спортчиларни аниқлаш ва уларни янада катта марралар сари руҳлантиришга хизмат қилди.

Таъкидлаш жоизки, бугун ёшлар фақатгина эътибор ва имконият кутаётган қатлам эмас. Улар ўз ғояларига, ташаббусларига ва аниқ мақсадларига эга бўлган фаол авлоддир. Муҳими, ана шу ташаббусларни эшитиш, қўллаб-қувватлаш ва уларни амалий лойиҳаларга айлантириш учун имконият яратишдир. Ёшлар учун яратилган ҳар бир имконият — келажак учун қўйилган мустаҳкам пойдевордир.

Чарос Арслонова, туман ҳокимлигининг Ахборот хизмати раҳбари.