Техникумда Ўзбекистон Агросаноат мажмуи ходимлари касаба уюшмаси ташаббуси билан йиғилиш ўтказилди

Амударё туманидаги 1-сонли техникумда Ўзбекистон Агросаноат мажмуи ходимлари касаба уюшмаси томонидан йиғилиш ўтказилди. Унда уюшма раиси ўринбосари Нодирбек Назаров, Қорақалпоғистон Республикаси бўйича масъул ходим Ерғали Ситназаров, техникум директори Давронбек Абдулаев, шунингдек, Амударё, Тўрткўл, Элликқалъа ва Беруний туманларининг касаба уюшмаси раислари ҳамда бошланғич қўмита вакиллари, ўқувчи ёшлар иштирок этди.

Йиғилишни Ерғали Ситназаров очиб, иштирокчилар эътиборини Ўзбекистон Касаба уюшмалари федерацияси раиси, сенатор Қудратулла Рафиқовнинг қаламига мансуб «Миллат шавкати» китобига қаратди. Асарда «Ғарбда Рим, Шарқда Самарқанд» дея эътироф этилган кўҳна шаҳарнинг қарийб 3000 йиллик улуғвор тарихи, XIX ва XX асрлардаги инқирозли даврлари ҳамда чинакам маънавий ва иқтисодий уйғониши қандай кечгани ҳақида батафсил маълумот берилади.

Китобда 2001 ва 2003 йиллар оралиғидаги тарихий бурилиш палласи – давлатимиз раҳбари, ўша вақтларда Самарқанд вилояти ҳокими бўлган Шавкат Мирзиёевнинг вилоятдаги фаолияти чуқур таҳлил қилинган. Ўша даврда вилоят иқтисодиёти оғир аҳволда бўлиб, 4 миллионга яқин аҳолининг атиги 7 фоизи тадбиркорлик билан шуғулланар эди. Ушбу мураккаб вазиятда ислоҳотлар дастлаб шаҳар гигиенаси ва экологиясини тиклашдан бошланган. Биргина ҳокимлик атрофидан 70 та юк машинасида чиқинди олиб чиқилгани ҳудуддаги ҳақиқий манзарани акс эттирган эди. Айнан шу даврда шаҳар секторларга бўлиниб, бугунги кундаги марказлашган бошқарув тизимининг илк намунаси яратилган.

Ижтимоий соҳадаги ўзгаришлар доирасида кўп йиллар ҳужжатсиз яшаб келган аҳоли қатламига паспортлар берилгани асарда алоҳида қайд этиб ўтилган. Таълим тизимидаги инқирозни бартараф этиш мақсадида кескин чоралар кўрилиб, вилоятдаги 1050 та мактабнинг моддий-техник базасини яхшилаш мақсадида ҳомийлик асосидаги ёрдамчи хўжаликлар тизими жорий этилган. Қисқа вақт ичида 20 дан ортиқ спорт иншоотлари фойдаланишга топширилган.

Иқтисодий кўрсаткичлар ҳам кескин ўсиб, саноат маҳсулотлари ишлаб чиқариш 107 фоизни, халқ истеъмоли моллари эса 112 фоизни ташкил этган. Қишлоқ хўжалигида тупроқ унумдорлигини ошириш мақсадида ҳар гектар ерга 20 тоннадан маҳаллий ўғит бериш йўлга қўйилган, Тойлоқ туманида гектаридан ўртача 50 центнергача ғалла ҳосили олинишига эришилган. Бу даврда нафақат иқтисодий, балки улкан маънавий уйғониш ҳам юз берган. Регистон, Шоҳи Зинда, Амир Темур каби қатор тарихий обидалар тарихий қиёфасига мос тарзда тикланган ва Имом Мотуридий ҳазратларининг қабри топилиб, маънавий ҳаётда улкан воқеликка айлангани мазкур асарда алоҳида эътироф этилган.

Йиғилишнинг иккинчи қисмида бевосита касаба уюшмаси фаолиятига доир муҳим ташкилий масалалар ҳам кўриб чиқилди. Унда 4 та туман вакиллари иштирокида жамоа шартномаларининг ижроси, уларнинг бажарилиши устидан назорат ўрнатиш ва ходимлар ҳуқуқларини ҳимоя қилиш механизмлари атрофлича муҳокама қилинди.

Мазкур учрашув тарихий хотирани мустаҳкамлаш, Янги Ўзбекистон пойдевори қандай яратилганини чуқур англаш ва меҳнаткашларнинг ижтимоий-иқтисодий манфаатларини таъминлаш йўлидаги муҳим амалий қадам бўлди.