Халқ депутатлари Амударё туман Кенгашининг навбатдаги 24-сессияси ҳақида ахборот

2026 йил 8 сентябрь куни Амударё тумани ҳокимлигида Халқ депутатлари Амударё тумани Кенгашининг 24-сессияси бўлиб ўтди. Сессияни Кенгаш раиси Алишер Йўлдошев очиб берди ва олиб борди. Мажлис Ўзбекистон Республикаси ҳамда Қорақалпоғистон Республикаси давлат мадҳиялари садолари остида бошланди.

Сессияда дастлаб Амударё тумани бўйича “Ташаббусли бюджет” жараёнининг 2026 йил 2-мавсумида ғолиб бўлган лойиҳаларни “Фуқаролар ташаббуси жамғармаси” ҳисобидан молиялаштириш ҳамда ушбу мақсад учун Амударё тумани маҳаллий бюджети маблағларини йўналтириш тўғрисидаги масалалар муҳокама қилинди. Мазкур масалалар юзасидан Амударё тумани Иқтисодиёт ва молия бўлими бошлиғининг биринчи ўринбосари Жаҳонгир Йўлдошев ҳисобот берди.

Таъкидланганидек, жорий йилнинг “Ташаббусли бюджет” жараёни иккинчи мавсумини молиялаштириш учун жами 16 миллиард сўмдан ортиқ маблағ шакллантирилган. Депутатлар 4 149 та овоз тўплаган Жумуртов шаҳарчаси ҳудудидан ўтувчи йўлнинг 6 километр оралиғидан Ўзбекистон маҳалласи ва Қизилчоли маҳалласига олиб борадиган Дамба йўлини асфальт қилиш лойиҳасини муҳокама қилишди. Қиймати 1 миллиард 647 миллион сўм бўлган мазкур лойиҳани қўшимча ғолиб деб топиш учун 236 миллион сўм маблағ етишмаётгани қайд этилди. Сессияда 2026 йил иккинчи чорак туман маҳаллий бюджети даромадлар режасининг ортиқча бажарилган қисми маблағлари ҳисобидан 236 миллион сўмни туман ҳокимлиги ҳузуридаги “Фуқаролар ташаббуси жамғармаси”га ўтказиш ҳамда ушбу ташаббусини ғолиблар қаторига қўшиш таклифи билдирилди.

Сессия кун тартибидаги навбатдаги — “Маҳалланинг ижтимоий-иқтисодий муаммоларини ҳал этиш жамғармаси” даромадлари ва харажатлари ижроси ҳамда маҳалла институтини ривожлантиришга қаратилган фармон ва қарорларнинг ижроси тўғрисида”ги масала юзасидан Ўзбекистон маҳаллалари уюшмаси Амударё туман бўлими раҳбари Алишер Йўлдошев ҳисобот берди.

Ҳисоботда қайд этилишича, жорий йилнинг ўтган 8 ойи давомида маҳалла ҳудудларидаги ички йўллар, пиёдалар йўлаклари, ёритиш тизими, электр энергияси ва табиий газ тармоқлари, ичимлик ҳамда оқова сув тизимларини таъмирлаш ва тиклаш, шунингдек, эҳтиёжманд оилаларни моддий томондан қўллаб-қувватлаш бўйича қатор ишлар амалга оширилган.

Уюшма томонидан фуқаролар йиғинларининг моддий-техник базасини мустаҳкамлаш мақсадида 15 та компьютер техникаси, 13 та принтер ва 20 та мебель жамланмаси берилган. Шунингдек, 8 та маҳалла биносида таъмирлаш ишлари олиб борилган. Ушбу тадбирлар учун 319 миллион сўм маблағ сарфланган.

Бундан ташқари, 8 нафар кам таъминланган оила хонадонига қуёш панеллари олиш учун 176 миллион сўм миқдорида моддий ёрдам кўрсатилган. 19 нафар кам таъминланган фуқаронинг уй-жойи таъмирланиб, ушбу ишлар учун 125 миллион сўм маблағ сарфланган.

Сессия кун тартибида шунингдек, “Амударё туманида мактабгача таълимни такомиллаштириш ва ривожлантириш йўналишида амалга оширилаётган чора-тадбирларнинг самарадорлиги тўғрисида”ги масала муҳокама қилинди. Мазкур масала юзасидан Амударё тумани мактабгача ва мактаб таълими бўлими бошлиғи Ялғашбой Шамуратов ҳисобот берди.

Ҳисоботда қамров даражаси паст, камбағаллик даражаси юқори ҳудудларда 2026 йил давомида 18 та оилавий нодавлат мактабгача таълим ташкилотини янгидан очиш ва фаолиятини йўлга қўйиш режалаштирилгани таъкидланди. Йил бошидан буён эса режалаштирилганидан ортиқ — 22 та оилавий нодавлат мактабгача таълим ташкилоти фаолияти йўлга қўйилгани қайд қилинди.

2026-2027 ўқув йилида Бештом маҳалласи ҳудудида 150 ўринли, Оқ олтин овули ҳудудида эса 90 ўринли давлат мактабгача таълим ташкилотларининг янги биноларини қуриб, фойдаланишга топшириш режалаштирилган.

Сессия кун тартибидан, шунингдек, депутатларнинг ўз фаолияти юзасидан сайловчилар олдида ахборот беришининг режа-жадвалини тасдиқлаш тўғрисидаги масала ҳам ўрин олди. Мазкур масала юзасидан Халқ депутатлари Амударё тумани Кенгаши котибияти мудири Мансур Ўразбоев ахборот берди.

Сессияда кун тартибига киритилган барча масалалар атрофлича муҳокама қилинди. Депутатларнинг фикр ва мулоҳазалари тингланиб, берилган саволларга мутасаддилар томонидан тегишли жавоблар қайтарилди.

Чарос Арслонова, туман ҳокимлигининг Ахборот хизмати раҳбари.