“Бирлашиб, буюк тарих яратамиз” шиори остида “Маърифат карвони” лойиҳаси доирасида маданий-маърифий тадбир ўтказилди

Ватанимиз мустақиллигининг 35 йиллиги юртимизнинг ҳар бир гўшасида, ҳар бир хонадону маҳалласида, энг чекка ва олис қишлоқларимизда ҳам ўзгача кўтаринкилик билан нишонланди. Ўтган 35 йил тарих учун балки кичик бир ондек туюлар, бироқ бу давр мобайнида халқимиз асрларга татигулик улкан йўлни босиб ўтди. Айниқса, сўнгги йилларда мамлакатимизда олиб борилаётган кенг кўламли ислоҳотлар, янгиланишлар шабадаси жамиятимизнинг барча қатламларига етиб бориб, юртдошларимиз ҳаётида, уларнинг онгу тафаккурида ўзининг ёрқин ифодасини топмоқда. Бугунги кунда “Бирлашиб, буюк тарих яратамиз” деган эзгу ва улуғвор ғоя атрофида жипслашган якдил халқимиз ўзининг фаровон келажагини ўз қўллари билан бунёд этмоқда.

Истиқлол шодиёналари ва байрам кайфияти Амударё туманида ҳалигача давом этмоқда. Яқинда туманда таниқли ижодкорлар иштирокида “Маърифат карвони” лойиҳаси доирасида бўлиб ўтган йирик маданий-маърифий тадбир нафақат кўнгилларга байрам шукуҳини улашди, балки қалбларда Ватанга муҳаббат, эртанги кунга бўлган мустаҳкам ишонч туйғуларини янада жўш урдирди.

Республика Маънавият ва маърифат маркази, Қорақалпоғистон Республикаси Жўқорғи Кенгеси ҳамда “Маърифат” тарғиботчилар жамияти ҳамкорлигида ташкил этилган ушбу маърифий учрашув жозибадор куй-қўшиқлар ва концерт дастурига уланиб кетди. Мамлакатимизнинг кўзга кўринган санъат ва маданият намояндаларини ўзида жамлаган ушбу маънавият карвони амударёликларга ҳақиқий байрам шукуҳини туҳфа қилди. Лойиҳа доирасида ташкил этилган учрашувларда Ўзбекистон халқ артисти Гавҳар Зокирова ҳамда Ўзбекистонда хизмат кўрсатган маданият ходими Бобур Бобомурод каби эл севган, фидойи ижодкорлар сўзга чиқдилар. Улар ўз нутқларида кейинги йилларда мамлакатимизда барча соҳаларда эришилган улкан ютуқлар, Президентимиз бошчилигида амалга оширилаётган ислоҳотларнинг мазмун-моҳияти ҳақида кенг ва атрофлича тўхталиб ўтдилар. Бу ислоҳотлар халқимизнинг турмуш даражасини янада юксалтиришда, жамиятда ижтимоий адолат ва қонун устуворлигини таъминлашда қандай муҳим ўрин тутаётганлиги аниқ ҳаётий мисоллар, реал ўзгаришлар ёрдамида очиб берилди. Айниқса, Ўзбекистонда хизмат кўрсатган маданият ходими Бобур Бобомурод томонидан ўқилган истиқлол, тинчлик, дўстлик ва фаровонлик ҳақидаги шеърлар йиғилганлар кўнглини ниҳоятда хушнуд этиб, уларни чуқур мушоҳадага чорлади. Сўзнинг сеҳрли ва жозибадор қудрати орқали осмонимиз мусаффолигининг, тинчликнинг қадри, миллатлараро тотувлик ва дўстликнинг улуғворлиги тараннум этилди.

Ушбу маданий-маърифий тадбирнинг айнан шу масканда ўтказилаётгани бежиз эмас, албатта. Тадбир бўлиб ўтган мазкур муҳташам ва замонавий амфитеатр мамлакатимиз мустақиллигининг 35 йиллик байрами арафасида тантанали равишда фойдаланишга топширилган эди. Бу эса сўнгги йилларда Янги Ўзбекистонда инсон қадрини улуғлаш, унинг ҳуқуқ ва манфаатларини таъминлаш борасида олиб борилаётган кучли ижтимоий давлат сиёсатининг амалдаги яна бир ёрқин исботидир.

Бугунги кунда республикамизнинг барча ҳудудларида, хоҳ у марказий йирик шаҳарлар бўлсин, хоҳ олис ва чекка қишлоқлар, замон талабларига тўлиқ жавоб берувчи, аҳоли учун барча зарурий қулайликларга эга бўлган ижтимоий инфратузилма объектлари фойдаланишга топширилмоқда. Замонавий таълим муассасалари, тиббиёт масканлари, маданият ва маърифат марказлари, шунингдек, спорт мажмуалари қад ростламоқда.

Бундай кенг кўламли бунёдкорлик ишларининг замирида, энг аввало, “Инсон қадри учун” деган ҳаётий тамойил мужассам. Ҳар бир фуқаро ўзи яшаб, меҳнат қилаётган ҳудудда муносиб шароитларда ҳаёт кечириши, мазмунли дам олиши, маданий ҳордиқ чиқариши учун яратилаётган бундай кенг имкониятлар халқимизнинг турмуш фаровонлигини оширишга хизмат қилмоқда. Амударё туманидаги ушбу янги ва кўркам амфитеатр ҳам тез орада туман аҳли, айниқса, келажагимиз эгалари бўлган ёшлар учун асл маънавият ва маърифат ўчоғига, маданият ва санъат масканига айланиши шубҳасиз.

Чиндан ҳам, инсоннинг комил шахс бўлиб шаклланишида, унинг руҳий камолотида маданият ва маънавиятнинг ўрни беқиёс. Агар моддий бойликлар ва неъматлар инсоннинг фақат жисмоний эҳтиёжларини қондирса, маънавият ва ҳақиқий санъат унинг руҳиятини озиқлантиради, қалбини ғаразлардан поклайди ва доимо юксакликка сари етаклайди. Маънавияти юксак, маданиятли инсонгина ўзи яшаётган жамият учун, Ватан учун энг керакли ва фойдали ишларга қодир бўлади, атрофдагиларга фақат эзгулик улашади. Шу боисдан ҳам жойларда бундай маданий-маърифий тадбирларнинг мунтазам ўтказилиши аҳоли, айниқса, ўсиб келаётган ёш авлод онгида гўзалликка интилиш, эзгулик, оқибат ва инсонийлик туйғуларини шакллантиришда муҳим омил бўлиб хизмат қилади.

Тадбир давомида таниқли санъаткорлар Ирода Искандарова ва Алишер Рўзметовнинг Ватанни, меҳр-оқибат ва ёшликни мадҳ этувчи шўх қўшиқлари томошабинлар қалбига байрам шукуҳини яна бир бор олиб кирди. Нукус шаҳридан ташриф буюрган таниқли санъаткорлар, шу билан бирга, Амударё тумани маданият бўлими хонандалари ва тумандаги ҳаваскор ижодкорлар ҳам ўзларининг дилтортар куй-қўшиқлари билан даврага янада файз киритдилар. Янграган миллий оҳанглар, жозибали рақслар барчага кўтаринки кайфият ва унутилмас лаҳзаларни бағишлади.

Бугунги шиддат билан ривожланаётган, ахборот алмашинуви мислсиз даражада тезлашган мураккаб глобаллашув даврида бундай тадбирларнинг ўтказилиши нафақат маданий ҳордиқ, балки чуқур ғоявий ва тарбиявий аҳамиятга ҳам эгадир. Глобаллашув жараёнлари турли миллат ва давлатларни бир-бирига яқинлаштириши, интеграцияни кучайтириши билан бирга, миллий ўзликка, асрлар синовидан ўтган қадриятларга ўзига хос жиддий хавф ҳам туғдирмоқда. Турли ёт ғоялар, мафкуравий таҳдидлар ва "оммавий маданият" хуружлари кучайган бир вақтда аҳолини, айниқса, эртанги кунимизнинг, келажагимизнинг эгалари бўлган ёшларни Ватанга чексиз муҳаббат, миллий қадрият ва анъаналаримизга чуқур ҳурмат руҳида тарбиялаш ҳар қачонгидан ҳам муҳимроқ ва долзарброқ вазифага айланган.

“Маърифат карвони” каби кенг қамровли лойиҳалар орқали ёшлар ўзларининг буюк тарихи, бой маданияти ва буюк аждодларининг қолдирган тенгсиз мероси билан яқиндан танишадилар. Уларда миллий ғурур, ор-номус ва ифтихор туйғулари шаклланади. Ватанни севиш — бу шунчаки баландпарвоз сўз эмас, балки унинг ўтмишини ҳурмат қилиш, бугуни билан фахрланиш ва, албатта, келажаги учун шахсий масъулиятни ҳис этиш демакдир. Санъат ва маърифат воситасида берилган тарбия эса ҳар доим энг таъсирчан ва эсда қоларли бўлади. Ёшларимиз шундай жонли тадбирларда янграётган Ватан мадҳини, юртимиздаги тинчлик қадрини теран англаб, ўзларининг ҳам шу буюк ва муқаддас юртнинг ажралмас бир бўлаги эканликларини чин дилдан ҳис этадилар ҳамда бу туйғу уларни буюк ишларга ундайди.

Мустақиллигимизнинг 35 йиллиги шодиёналарига бағишлаб Амударё туманида кўтаринки руҳда ўтказилган ушбу маданий-маърифий тадбир яна бир бор бутун халқимизнинг жипслигини, юртимизда ҳукм сураётган тинчлик ва тотувликнинг беқиёс қадрини намоён этди. “Бирлашиб, буюк тарих яратамиз” деган теран ва ҳаётий шиор остидаги бундай эзгу саъй-ҳаракатлар ҳар бир юртдошимиз қалбида эртанги кунга бўлган қатъий ишончни янада мустаҳкамлаши шубҳасиз.