БУГУНГИ ЁШЛАР – ЯНГИ ТАРИХ ЯРАТАДИГАН ОЛТИН АВЛОД ВАКИЛЛАРИДИР

Жамиятнинг ҳар томонлама ривожланиши ва келажак фаровонлиги бевосита ёшларга берилаётган эътибор ҳамда улар учун яратилган имкониятлар билан ўлчанади. Шу сабабли туманимизда ҳам навқирон авлод вакилларини ҳар томонлама қўллаб-қувватлаш, уларни комил инсонлар қилиб вояга етказиш, бандлигини таъминлаш ва бўш вақтларини мазмунли ташкил этиш борасида кенг кўламли ишлар амалга оширилмоқда. Бу борада Амударё тумани Ёшлар ишлари бўлими томонидан ҳам тизимли ишлар амалга оширилиб, салмоқли натижалар қўлга киритилмоқда.

Аввало, шуни айтиш керакки, тумандаги ҳақиқий ҳолатни ўрганиш ва ёшлар балансини шакллантириш мақсадида маҳалла ёшлар етакчилари томонидан уйма-уй юриб хатлов ўтказилди. Ушбу масъулиятли жараёнда 14 ёшдан 30 ёшгача бўлган жами 53 минг 369 нафар йигит-қизнинг муаммо ва қизиқишлари батафсил ўрганилди. Хатлов натижасига кўра, ёшлар тоифаларга ажратилиб, уларнинг 37 минг 435 нафари "яшил", 15 минг 550 нафари "сариқ" ва 384 нафари "қизил" тоифага киритилди. Айнан мана шу аниқ маълумотлар базаси кейинги барча амалий ишлар учун мустаҳкам пойдевор бўлиб хизмат қилмоқда.

Хусусан, оғир тоифага киритилган 546 нафар ишсиз ёшларга туман даражасидаги 29 нафар ташкилот раҳбари бириктирилди. Ўтган давр ичида уларнинг 159 нафари доимий иш ўрнига эга бўлган бўлса, 165 нафарига имтиёзли кредитлар берилди, 44 нафари тартибли миграцияга, 24 нафари муддатли ҳарбий хизматга юборилди. Шунингдек, 83 нафари ўзини ўзи банд қилганлар сафига қўшилди, 43 нафарига экин ер майдонлари ажратилди, 9 нафари касб-ҳунарга ўқитилиб, 16 нафари зарур асбоб-ускуналар билан таъминланди. Бундан ташқари, ҳуқуқбузарликка мойил бўлган 104 нафар ёшлар туман ҳокимлиги, мудофаа, ички ишлар, фавқулодда вазиятлар бўлимлари ва туман прокуратураси масъулларига оталиққа берилиб, уларни соғломлаштириш ишлари жадал олиб борилмоқда. Тарбияси оғир ёшларни ҳарбий-ватанпарварлик руҳида тарбиялаш мақсадида 16 нафар йигитлар Нукус шаҳридаги ҳарбий қисмда ташкил этилган "Жасорат мактаби" йиғинларида иштирок этди. Профилактика мақсадида 273 марта "Ўқувчи" ва "Тиғ", шунингдек, 412 марта "Тунги рейд" тадбирлари ўтказилди. Шу билан бирга 1 200 га яқин ёшларни қамраб олган "Шунқорлар" спартакиадаси ёшлар ўртасида соғлом муҳитни қарор топтиришга хизмат қилмоқда. Меҳнат бозорига кириб келиши кутилаётган 5 минг 732 нафар битирувчи ёшлар ҳам масъулларнинг доимий эътибор марказида турибди.

Туман ёшларининг маълум бир қисми хорижда меҳнат қилаётгани ҳисобга олиниб, миграциядаги 1 минг 62 нафар ёш билан алоқалар янада мустаҳкамланди. Уларнинг 869 нафари Россияда, 143 нафари Қозоғистонда ва қолганлари Туркия, Жанубий Корея, Япония ва Германия каби давлатларда бўлиб, ташкил этилган 3 та очиқ мулоқотда уларни қийнаётган 20 та муаммо тўлиқ бартараф этилди. Йил бошидан буён хориждан қайтиб келган 80 нафар ишсиз йигит-қизнинг бандлиги таъминланди.

Ижтимоий ҳимояга муҳтож қатлам билан ишлаш доирасида жорий йилда 100 нафар йигит-қиз "Ёшлар дафтари"га киритилиб, уларнинг 30 нафарига амалий ёрдам кўрсатилди. Ушбу тадбирларни молиялаштириш учун жамғармага 2 миллиард сўмдан ортиқ маблағ йўналтирилган.

Қишлоқ хўжалиги йўналишида ҳам катта қадамлар ташланди. Жумладан, бугунги кунда 1 минг 66 нафар ёшлар умумий майдони 381 гектар бўлган далаларда деҳқончилик қилмоқда. Ушбу ерларнинг 16 гектарига картошка, 86 гектарига полиз, 104 гектарига донли экинлар, 37 гектарига сабзавотлар ва 138 гектарига бошқа турдаги экинлар экилган. Шунингдек, ғалладан бўшаган 121 гектардан ортиқ ер майдони 807 нафар ёшга такрорий экин учун ажратилди. Президент қарори асосида Куюк кўпир овулидаги 54 гектар ер 74 нафар ёшларга берилиб, туман ҳокимлиги томонидан 1 км масофадан электр тармоғи тортиб келинди ва махсус сув насоси ўрнатиб берилди.

Ёшларнинг билим ва салоҳиятини юксалтириш, уларни замонавий касбларга йўналтириш борасида ҳам кенг кўламли лойиҳалар ҳаётга татбиқ этилмоқда. Хусусан, маҳаллаларда 150 нафар, таълим муассасаларида 220 нафар волонтёрлар гуруҳи шакллантирилиб, 9 та йўналишда фаолият юритмоқда. "Ибрат фарзандлари" лойиҳаси орқали 13 минг 188 нафар йигит-қизлар 23 та хорижий тилни ўрганмоқда, уларнинг 1 минг 531 нафари аллақачон махсус сертификатларни қўлга киритди.

Шу билан бирга, "Мутолаа" лойиҳасида 4 минг 349 нафар ёшлар бепул электрон ва аудио китоблар ўқимоқда, "Ustoz AI" платформасида 1 минг 946 нафар ва "Qizlar akademiyasi"да 2 минг 219 нафар ёшлар бепул билим олмоқда. Дастурлаш бўйича 149 нафар ёшларимиз инглиз ва бошқа тилларда халқаро сертификат олишга эришди.

Спорт ва интеллектуал ўйинларга жалб қилиш мақсадида ташкил этилган 24 та "Заковат" турнирларида минг нафардан ортиқ билимдон қатнашган бўлса, 73 минг 445 нафар ўғил-қизлар "Беш ташаббус олимпиадаси"да иштирок этиш истагида онлайн рўйхатдан ўтди.

Маҳалла ёшларининг бўш вақтини мазмунли ўтказиш мақсадида ўтказилган 875 та кунлик тадбирларда 30 минг нафар ёшлар қамраб олинди. Ҳар куни соат 16:00 дан 23:00 га қадар мактабларда фаолият юритаётган тўгараклар минглаб ўқувчиларнинг вақтлари мазмунли ўтишида муҳим восита бўлмоқда. Шунингдек, ҳарбий хизматдан қайтган 105 нафар йигитнинг барчаси иш билан таъминланди, уларнинг 102 нафари ўзини-ўзи банд қилишга эришди.

Жойларда ушбу ишларни юқори савияда ташкил этишда 49 нафар ёшлар етакчисининг меҳнати беқиёсдир. Уларнинг 46 нафари олий маълумотли мутахассислар бўлиб, ёшларга доир муаммоларни ҳал этишда катта тажрибага эга. Таъкидлаш ўринлики, етакчиларнинг барчаси рақамли технологиялар бўйича, 39 нафари эса тил ўрганиш бўйича махсус сертификатларга эга бўлган салоҳиятли кадрлардир.

Амударё туманида ёшлар сиёсати бўйича олиб борилаётган бундай манзилли ва тизимли ҳаракатлар ҳеч бир йигит-қизнинг эътибордан четда қолмаслигини кафолатлаб, уларнинг фаровон келажагини қуриш учун мустаҳкам ва ишончли замин яратмоқда. Фурсатдан фойдаланиб, амударёлик барча ёшларни, юртимизда истиқомат қилаётган келажагимиз эгалари бўлмиш навқирон авлод вакилларини 30 июнь – ёшлар куни билан табриклайман!

Бекзод ЎРИНБОЕВ, Амударё тумани Ёшлар ишлари бўлими бошлиғи