“Birlashib, buyuk tarix yaratamiz” shiori ostida “Maʼrifat karvoni” loyihasi doirasida madaniy-maʼrifiy tadbir oʻtkazildi

Vatanimiz mustaqilligining 35 yilligi yurtimizning har bir goʻshasida, har bir xonadonu mahallasida, eng chekka va olis qishloqlarimizda ham oʻzgacha koʻtarinkilik bilan nishonlandi. Oʻtgan 35-yil tarix uchun balki kichik bir ondek tuyular, biroq bu davr mobaynida xalqimiz asrlarga tatigulik ulkan yoʻlni bosib oʻtdi. Ayniqsa, soʻnggi yillarda mamlakatimizda olib borilayotgan keng koʻlamli islohotlar, yangilanishlar shabadasi jamiyatimizning barcha qatlamlariga yetib borib, yurtdoshlarimiz hayotida, ularning ongu tafakkurida oʻzining yorqin ifodasini topmoqda. Bugungi kunda “Birlashib, buyuk tarix yaratamiz” degan ezgu va ulugʻvor gʻoya atrofida jipslashgan yakdil xalqimiz oʻzining farovon kelajagini oʻz qoʻllari bilan bunyod etmoqda.

Istiqlol shodiyonalari va bayram kayfiyati Amudaryo tumanida haligacha davom etmoqda. Yaqinda tumanda taniqli ijodkorlar ishtirokida “Maʼrifat karvoni” loyihasi doirasida boʻlib oʻtgan yirik madaniy-maʼrifiy tadbir nafaqat koʻngillarga bayram shukuhini ulashdi, balki qalblarda Vatanga muhabbat, ertangi kunga boʻlgan mustahkam ishonch tuygʻularini yanada joʻsh urdirdi.

Respublika Maʼnaviyat va maʼrifat markazi, Qoraqalpogʻiston Respublikasi Joʻqorgʻi Kengesi hamda “Maʼrifat” targʻibotchilar jamiyati hamkorligida tashkil etilgan ushbu maʼrifiy uchrashuv jozibador kuy-qoʻshiqlar va kontsert dasturiga ulanib ketdi. Mamlakatimizning koʻzga koʻringan sanʼat va madaniyat namoyandalarini oʻzida jamlagan ushbu maʼnaviyat karvoni amudaryoliklarga haqiqiy bayram shukuhini tuhfa qildi. Loyiha doirasida tashkil etilgan uchrashuvlarda Oʻzbekiston xalq artisti Gavhar Zokirova hamda Oʻzbekistonda xizmat koʻrsatgan madaniyat xodimi Bobur Bobomurod kabi el sevgan, fidoyi ijodkorlar soʻzga chiqdilar. Ular oʻz nutqlarida keyingi yillarda mamlakatimizda barcha sohalarda erishilgan ulkan yutuqlar, Prezidentimiz boshchiligida amalga oshirilayotgan islohotlarning mazmun-mohiyati haqida keng va atroflicha toʻxtalib oʻtdilar. Bu islohotlar xalqimizning turmush darajasini yanada yuksaltirishda, jamiyatda ijtimoiy adolat va qonun ustuvorligini taʼminlashda qanday muhim oʻrin tutayotganligi aniq hayotiy misollar, real oʻzgarishlar yordamida ochib berildi. Ayniqsa, Oʻzbekistonda xizmat koʻrsatgan madaniyat xodimi Bobur Bobomurod tomonidan oʻqilgan istiqlol, tinchlik, doʻstlik va farovonlik haqidagi sheʼrlar yigʻilganlar koʻnglini nihoyatda xushnud etib, ularni chuqur mushohadaga chorladi. Soʻzning sehrli va jozibador qudrati orqali osmonimiz musaffoligining, tinchlikning qadri, millatlararo totuvlik va doʻstlikning ulugʻvorligi tarannum etildi.

Ushbu madaniy-maʼrifiy tadbirning aynan shu maskanda oʻtkazilayotgani bejiz emas, albatta. Tadbir boʻlib oʻtgan mazkur muhtasham va zamonaviy amfiteatr mamlakatimiz mustaqilligining 35 yillik bayrami arafasida tantanali ravishda foydalanishga topshirilgan edi. Bu esa soʻnggi yillarda Yangi Oʻzbekistonda inson qadrini ulugʻlash, uning huquq va manfaatlarini taʼminlash borasida olib borilayotgan kuchli ijtimoiy davlat siyosatining amaldagi yana bir yorqin isbotidir.

Bugungi kunda respublikamizning barcha hududlarida, xoh u markaziy yirik shaharlar boʻlsin, xoh olis va chekka qishloqlar, zamon talablariga toʻliq javob beruvchi, aholi uchun barcha zaruriy qulayliklarga ega boʻlgan ijtimoiy infratuzilma obʼektlari foydalanishga topshirilmoqda. Zamonaviy taʼlim muassasalari, tibbiyot maskanlari, madaniyat va maʼrifat markazlari, shuningdek, sport majmualari qad rostlamoqda.

Bunday keng koʻlamli bunyodkorlik ishlarining zamirida, eng avvalo, “Inson qadri uchun” degan hayotiy tamoyil mujassam. Har bir fuqaro oʻzi yashab, mehnat qilayotgan hududda munosib sharoitlarda hayot kechirishi, mazmunli dam olishi, madaniy hordiq chiqarishi uchun yaratilayotgan bunday keng imkoniyatlar xalqimizning turmush farovonligini oshirishga xizmat qilmoqda. Amudaryo tumanidagi ushbu yangi va koʻrkam amfiteatr ham tez orada tuman ahli, ayniqsa, kelajagimiz egalari boʻlgan yoshlar uchun asl maʼnaviyat va maʼrifat oʻchogʻiga, madaniyat va sanʼat maskaniga aylanishi shubhasiz.

Chindan ham, insonning komil shaxs boʻlib shakllanishida, uning ruhiy kamolotida madaniyat va maʼnaviyatning oʻrni beqiyos. Agar moddiy boyliklar va neʼmatlar insonning faqat jismoniy ehtiyojlarini qondirsa, maʼnaviyat va haqiqiy sanʼat uning ruhiyatini oziqlantiradi, qalbini gʻarazlardan poklaydi va doimo yuksaklikka sari yetaklaydi. Maʼnaviyati yuksak, madaniyatli insongina oʻzi yashayotgan jamiyat uchun, Vatan uchun eng kerakli va foydali ishlarga qodir boʻladi, atrofdagilarga faqat ezgulik ulashadi. Shu boisdan ham joylarda bunday madaniy-maʼrifiy tadbirlarning muntazam oʻtkazilishi aholi, ayniqsa, oʻsib kelayotgan yosh avlod ongida goʻzallikka intilish, ezgulik, oqibat va insoniylik tuygʻularini shakllantirishda muhim omil boʻlib xizmat qiladi.

Tadbir davomida taniqli sanʼatkorlar Iroda Iskandarova va Alisher Roʻzmetovning Vatanni, mehr-oqibat va yoshlikni madh etuvchi shoʻx qoʻshiqlari tomoshabinlar qalbiga bayram shukuhini yana bir bor olib kirdi. Nukus shahridan tashrif buyurgan taniqli sanʼatkorlar, shu bilan birga, Amudaryo tumani madaniyat boʻlimi xonandalari va tumandagi havaskor ijodkorlar ham oʻzlarining diltortar kuy-qoʻshiqlari bilan davraga yanada fayz kiritdilar. Yangragan milliy ohanglar, jozibali raqslar barchaga koʻtarinki kayfiyat va unutilmas lahzalarni bagʻishladi.

Bugungi shiddat bilan rivojlanayotgan, axborot almashinuvi mislsiz darajada tezlashgan murakkab globallashuv davrida bunday tadbirlarning oʻtkazilishi nafaqat madaniy hordiq, balki chuqur gʻoyaviy va tarbiyaviy ahamiyatga ham egadir. Globallashuv jarayonlari turli millat va davlatlarni bir-biriga yaqinlashtirishi, integratsiyani kuchaytirishi bilan birga, milliy oʻzlikka, asrlar sinovidan oʻtgan qadriyatlarga oʻziga xos jiddiy xavf ham tugʻdirmoqda. Turli yot gʻoyalar, mafkuraviy tahdidlar va "ommaviy madaniyat" xurujlari kuchaygan bir vaqtda aholini, ayniqsa, ertangi kunimizning, kelajagimizning egalari boʻlgan yoshlarni Vatanga cheksiz muhabbat, milliy qadriyat va anʼanalarimizga chuqur hurmat ruhida tarbiyalash har qachongidan ham muhimroq va dolzarbroq vazifaga aylangan.

“Maʼrifat karvoni” kabi keng qamrovli loyihalar orqali yoshlar oʻzlarining buyuk tarixi, boy madaniyati va buyuk ajdodlarining qoldirgan tengsiz merosi bilan yaqindan tanishadilar. Ularda milliy gʻurur, or-nomus va iftixor tuygʻulari shakllanadi. Vatanni sevish — bu shunchaki balandparvoz soʻz emas, balki uning oʻtmishini hurmat qilish, buguni bilan faxrlanish va, albatta, kelajagi uchun shaxsiy masʼuliyatni his etish demakdir. Sanʼat va maʼrifat vositasida berilgan tarbiya esa har doim eng taʼsirchan va esda qolarli boʻladi. Yoshlarimiz shunday jonli tadbirlarda yangrayotgan Vatan madhini, yurtimizdagi tinchlik qadrini teran anglab, oʻzlarining ham shu buyuk va muqaddas yurtning ajralmas bir boʻlagi ekanliklarini chin dildan his etadilar hamda bu tuygʻu ularni buyuk ishlarga undaydi.

Mustaqilligimizning 35 yilligi shodiyonalariga bagʻishlab Amudaryo tumanida koʻtarinki ruhda oʻtkazilgan ushbu madaniy-maʼrifiy tadbir yana bir bor butun xalqimizning jipsligini, yurtimizda hukm surayotgan tinchlik va totuvlikning beqiyos qadrini namoyon etdi. “Birlashib, buyuk tarix yaratamiz” degan teran va hayotiy shior ostidagi bunday ezgu saʼy-harakatlar har bir yurtdoshimiz qalbida ertangi kunga boʻlgan qatʼiy ishonchni yanada mustahkamlashi shubhasiz.