Ўйинга асосланган таълим: педагогик инновациялар ва дидактик ўйинлар фестивали юқори савияда ўтказилди

Бугунги кунда таълим тизимида инновацион ёндашувларни жорий этиш энг долзарб масалалардан ҳисобланади. Шу мақсадда Амударё туманидаги 58-сонли давлат мактабгача таълим ташкилотида муҳим тадбир бўлиб ўтди. Туман мактабгача ва мактаб таълими бўлими томонидан ташкил этилган тадбир “Ўйинга асосланган таълим: педагогик инновациялар ва дидактик ўйинлар фестивали” деб номланиб, мактабгача таълим соҳаси вакилларини ягона мақсад йўлида жамлади.

Мазкур фестивалда Амударё туманидаги мактабгача таълим ташкилотларининг директорлари, директор ўринбосарлари ҳамда кўп йиллик тажрибага эга тарбиячилари фаол иштирок этишди. Тадбирни Амударё тумани Мактабгача ва мактаб таълими бўлимининг Мактабгача таълим ташкилотлари фаолиятини мувофиқлаштириш шўъбаси методисти Сауле Патуллаева очиб берди ва иштирокчиларни самимий қутлаб, уларнинг келгуси ишларига омад тилади. У ўз сўзида фестивалнинг асосий мақсади мактабгача таълим ташкилотларида ўйинга йўналтирилган таълимни кенг оммалаштириш, педагогларнинг касбий компетенцияси ҳамда ижодий билим ва кўникмаларини мунтазам ривожлантиришдан иборат эканлигини алоҳида таъкидлаб ўтди. Шунингдек, таълим-тарбия жараёнига инновацион дидактик ўйинларни жорий этиш ва бу орқали педагогларни рағбатлантириш ушбу лойиҳанинг бош мақсади эканлиги қайд этилди.

Шундан сўнг, бўлим мудири ўринбосари Ибрагим Раджапов сўзга чиқиб, фестивалнинг асосий вазифаларидан бири мактабгача ёшдаги болаларнинг ижодкорлиги ва мустақил фикрлашини ривожлантиришга бевосита хизмат қиладиган дидактик ўйинлар яратишни рағбатлантириш эканига урғу берди. Шу билан бирга, мактабгача таълим ташкилотларида ривожлантирувчи таълим муҳитини ўйинга асосланган таълим методикаси ёрдамида бойитиш, педагогларнинг дидактик ўйинларни яратиш, моделлаштириш ва амалиётда қўллаш бўйича ижодий фаолиятини қўллаб-қувватлаш каби устувор мақсадлар илгари сурилди. Шунингдек, фестивал якунларига кўра эътироф этиладиган энг яхши дидактик ўйинлар барча мактабгача таълим ташкилотларида кенг оммалаштирилиши қайд этилди.

Беллашув жараёнлари “Ижодий марафон” шаклида бўлиб ўтди. Унда Амударё тумани ҳудудидаги давлат мактабгача таълим ташкилотларида фаолият юритаётган педагог ходимлардан таркиб топган 4 кишилик ижодий жамоалар ўзаро баҳс олиб боришди. Барча жамоаларга 1 соат вақт ажратилган бўлиб, улар мана шу қисқа фурсат ичида ҳамжиҳатликда ўйинга асосланган таълим методикаси доирасида янги дидактик ўйин яратишлари талаб этилди.

Бундан ташқари, тадбир доирасида педагоглар томонидан энг яхши дидактик ўйинларда қўллаш учун яратилган ўйинчоқлар ва кўргазмали қуролларнинг махсус кўргазмаси ҳам ташкил қилинди. Иштирокчилар ўзларининг ижодий ишларини яратишда турли хил техник воситалардан маҳорат билан фойдаланишди. Яратилган барча дидактик ўйинларнинг махсус паспорти ва маълумотномаси ишлаб чиқилиб, жамоа аъзолари томонидан ҳакамлар ҳайъати олдида ҳимоя қилинди.

Ҳакамлар иштирокчиларнинг қўл меҳнатлари ва кўргазмаларини баҳолашда қатъий мезонларга таянишди. Хусусан, дидактик ўйинларнинг талабга мослиги, болалар учун хавфсизлиги, ўйиннинг болалар ёшига ва таълим методикасига мутаносиблиги, шунингдек, амалий қўллаш имкониятлари асосий ўринда турди. Бундан ташқари, ишларнинг “Илк қадам” миллий ўқув дастури мавзу режаларига мувофиқлиги, ўйиннинг муаллифлик ҳуқуқи, янгилиги, амалга ошириш техникаси ҳамда жамоанинг тақдимот қилиш маҳорати ва методик асослари каби муҳим жиҳатлар ҳам тўлиқ ҳисобга олинди.

Қизғин ва муросасиз кечган баҳслар якунига кўра, жами тўпланган баллар асосида янги дидактик ўйинлар яратиш йўналишида энг юқори натижа қайд этган 23-сонли давлат мактабгача таълим ташкилоти жамоаси фахрли 1-ўринни қўлга киритди. Шунингдек, 13-сонли ташкилот жамоаси 2-ўрин ва 17-сонли ташкилот жамоаси 3-ўрин эгалари сифатида эътироф этилди. Дидактик ўйинларда қўллаш учун яратилган ўйинчоқлар ва кўргазмали қуроллар йўналиши бўйича эса 48-сонли давлат мактабгача таълим ташкилоти жамоаси 1-ўринга муносиб деб топилди. Ушбу йўналишда 2-ўринни 52-сонли ташкилот, 3-ўринни эса 33-сонли ташкилот жамоалари банд этишди. Барча ғолиб жамоалар ҳамда фаол иштирокчилар ташкилотчилар томонидан фахрий ёрлиқлар ва эсдалик совғалари билан тақдирланди.

Тадбирнинг тантанали тақдирлаш маросимида туман ҳокимининг ўринбосари, Оила ва хотин-қизлар бўлими бошлиғи Гўзал Сабурова иштирок этиб, тадбир ғолибларига фахрий ёрлиқлар ҳамда эсдалик совғаларини тантанали равишда топширди. Шу билан бирга, Амударё тумани Мактабгача ва мактаб таълими бўлими томонидан мактабгача таълим ташкилотлари тарбияланувчилари ўртасида алоҳида ўтказилган “Жажжи нурли юлдузлар” номли танловнинг туман босқичи ғолиблирига ҳам фахрий ёрлиқ ва эсдалик совғалари топширилди.

Тадбир сўнгида мактабгача таълим ташкилотлари ходимлари сўзга чиқиб, кун тартибидаги масалалар юзасидан ўзаро фикр ва мулоҳазаларини билдиришди. Улар мазкур танловнинг шаффоф ва жуда қизиқарли ташкил этилганлигини эътироф этиб, бундай лойиҳалар келажак авлод таълим-тарбияси йўлида хизмат қилувчи мутахассислар учун улкан тажриба мактаби вазифасини ўташини таъкидлашди.