Байрам арафасида янги бинолар фойдаланишга топширилди

Мустақиллик — бу, аввало, халқнинг эртанги кунга бўлган ишончи, обод ва фаровон ҳаёт сари дадил қадам демакдир. Юртимизда истиқлолнинг 35 йиллиги кенг нишонланаётган шу кунларда Амударё туманида ҳам бунёдкорлик ишлари, янгиланиш ва эзгу ташаббуслар ўзининг амалий ифодасини топмоқда.

Байрам шодиёналари арафасида тумандаги қатор ижтимоий соҳа объектлари фойдаланишга топширилди. Бу иншоотлар, аввало, аҳоли учун муносиб шарт-шароит яратиш, ёшларнинг сифатли таълим олиши, фуқаролар бандлигини таъминлаш ва маҳаллаларда хизмат кўрсатиш имкониятларини кенгайтиришга хизмат қилади.

Манғит шаҳридаги 30-сонли умумтаълим мактаби учун барпо этилган янги қўшимча бино ана шундай бунёдкорлик ишларининг ёрқин намуналаридан биридир. 660 ўринли замонавий қўшимча бино фойдаланишга топширилиши муносабати билан ташкил этилган очилиш маросимида туман ҳокими Собир Хўжаметов, ҳоким ўринбосарлари, мактабнинг фахрий устозлари ҳамда таълим жамоаси вакиллари иштирок этди.

Таълим масканининг янги биноси учун 8 миллиард 600 миллион сўмдан ортиқ маблағ сарфланди. Қурилиш ишлари “Манғит энерго строй” МЧЖ томонидан амалга оширилди.

Очилиш маросимида сўзга чиққан туман ҳокими янги бинода яратилган замонавий шарт-шароитлар ўқувчиларнинг сифатли таълим олиши, билим ва кўникмаларини янада ривожлантиришига хизмат қилишини таъкидлади.

Мактаб ёш авлоднинг дунёқараши шаклланадиган, орзу-мақсадлари қанот ёзадиган, келажак касбига илк қадамлар қўйиладиган муқаддас даргоҳдир. Шу маънода, янги 660 ўринли бино юзлаб ўқувчилар учун янги имкониятлар эшигини очади.

Тантанали маросим давомида янги бино рамзий калити қурувчи ташкилот раҳбари томонидан мактаб директорига топширилди. Сўнгра рамзий тасма қирқилиб, янги бинонинг эшиклари ўқувчилар учун очилди.

Мустақиллик байрами арафасида Ўртақалъа овули ҳудудида фойдаланишга топширилган маҳалла маиший хизмат кўрсатиш маркази ҳам аҳолининг кундалик ҳаётини янада қулайлаштиришга қаратилган муҳим лойиҳалардан биридир.

Марказнинг очилиш маросимида Ўзбекистон Маҳаллалар уюшмаси Қорақалпоғистон Республикаси бошқармаси бошлиғи Сағиндиқ Турманов, туман ҳокими Собир Хўжаметов ҳамда маҳалла фаоллари иштирок этди.

Мазкур маҳалла мажмуаси Ўзбекистон Республикаси Президентининг Ислом тараққиёт банки ва ОПEК халқаро тараққиёт жамғармаси иштирокида “Қишлоқ жойларни барқарор ривожлантириш” лойиҳасини амалга ошириш чора-тадбирлари тўғрисидаги қарори асосида барпо этилди.

Лойиҳага 3 миллиард 600 миллион сўмдан ортиқ маблағ йўналтирилди. Қурилиш ишлари “Бакен қурилиш монтаж” ХК томонидан амалга оширилди.

Эндиликда маҳалла аҳолиси учун марказда бир қатор хизматлардан фойдаланиш имконияти яратилган. Мажмуада аёллар ва эркаклар сартарошхонаси, компьютер хонаси, ўқув маркази, спорт зали, тикувчилик хонаси, новвойхона каби хизмат кўрсатиш ва ижтимоий объектлар фаолият юритади.

Бу эса, бир томондан, аҳолининг турли хизматларга бўлган эҳтиёжини ўз маҳалласининг ўзида қондириш имконини берса, иккинчи томондан, янги иш ўринлари яратиш орқали фуқаролар, айниқса, маҳалла ёшларининг бандлигини таъминлашга хизмат қилади.

Бугун Амударёда қад ростлаётган ҳар бир янги бино, фойдаланишга топширилаётган ҳар бир ижтимоий объект ортида инсон манфаатлари, халқ фаровонлиги ва келажак авлод тақдири мужассам.

Мустақилликнинг 35 йиллиги арафасида Амударёда фойдаланишга топширилган ушбу объектлар юртимизда амалга оширилаётган бунёдкорлик ишларининг амалий ифодасидир. Энг муҳими, улар одамлар ҳаётига дахлдор, кундалик турмушини яхшилашга хизмат қиладиган эзгу мақсадларга йўналтирилгани билан аҳамиятлидир.

Зеро, обод маҳалла, замонавий мактаб, муносиб меҳнат ва яшаш шароити — фаровон жамиятнинг муҳим мезонларидир. Бугун бунёд этилаётган масканлар эса ана шу эзгу мақсадларнинг мустаҳкам пойдеворига айланмоқда.

Чарос Арслонова, туман ҳокимлигининг Ахборот хизмати раҳбари.