OʻZBEKISTONNI, AMU ELINI OʻZIGA VATAN KILGAN OTAXON

Jamiyatimizda millatlararo hamjihatlik va totuvlikni mustahkamlash, barcha fuqarolarga millati va diniy eʼtiqodidan qatʼiy nazar, teng huquq va imkoniyatlar yaratish davlatimiz siyosatining eng muhim ustuvor yoʻnalishlaridan biri sifatida belgilangan.

Yurtimizning barcha hududlarida boʻlgani kabi Amudaryo tumanida ham 30 dan ortiq turli millat va elat vakillari oʻzaro tinch-totuv va birdamlikda yurt ravnaqi, el farovonligiga munosib hissa qoʻshib yashab kelmoqdalar.

Tumanimizning Kuyuk koʻpir ovulida istiqomat qiluvchi qozoq millatiga mansub Qaziyevlar oilasi nafaqat ovuldagi, balki tumandagi eng namunali oilalardan biri. Fayzga toʻla uy oldida ochilib turgan chiroyli gullar bilan burkangan bogʻli hududga qadam qoʻyganingizdanoq bu yerda naqadar mehnatkash, yaratuvchan insonlar istiqomat qilishini his etasiz. Tomorqada yozgi sabzavotlar yetilgan, mevasidan shoxlari egilib turgan uzum, olma, nok, shaftoli daraxtlarini tomosha qilishning zavqi boʻlakcha. Xuddi ona zaminimizning saxovati shu bir parcha yerda aks etib turganday.

Uzoq yillar zahmatli kasbda ishlagan, yoshi saksondan oshib ketgan oila boshchisi Mingturgʻan ota ham bolalari bilan birga mehnat qiladi, ularga yoʻl-yoʻriq koʻrsatadi. Ekin, mollarga qarashib, oʻz mehnatidan zavq oladi.

Mingturgʻan Kaziyevning ota-onalari ham shu yurtni Vatanim, xalqini qon-qardoshim, deb yashagan insonlardan boʻlgan. Otaxon 1936-yilda shu ovulda tugʻilgan. Barcha imkoniyatlar yaratilgan shunday jannatmakon yurtda kamolga yetib, Vatan ravnaqiga munosib hissa qoʻshdi. U 1954-yili oliygohni tugatib, hozirgi 2-sonli maktabda oʻqituvchi boʻlib ish boshladi. Keyinchalik 1964-yilda Kuyuk koʻpir ovulida joylashgan 19-sonli maktabga direktor lavozimiga tayinlandi.

1968-yilgacha oʻquvchilarga fizika-matematika fanlaridan dars berdi. Soʻngra, 1969-yili hozirgi 2-sonli maktabga ilmiy boʻlim mudiri etib tayinlandi. Ish faoliyatining soʻnggi yillarida Mingturgʻan ota 19-sonli maktabda oʻqituvchilik qildi. Turmush oʻrtogʻi bilan beshta qiz, ikkita oʻgʻilni voyaga yetkazdi. Hozirda ular oʻzlarining faol xizmatlari, ulkan tajribalari bilan tanilgan yetuk mutaxassislar boʻlib yetishib, Vatanimiz ravnaqi yoʻlida mehnat qilayotgan, boy amaliy tajribasi bilan yoshlarga oʻrnak boʻlayotgan insonlardir.

Katta farzandi Dinar Qaziyeva Toshkent Davlat Jahon tillari Universitetini tugatib, oʻz sohasi boʻyicha faoliyat olib bordi. Ikkinchi farzandi Ayboʻpe Qaziyeva maktabgacha taʼlim sohasi xodimi, Gulnor Qaziyeva esa 19-sonli maktabda boshlangʻich sinf oʻqituvchisi. Qayrat Qaziyev tuman Tibbiyot birlashmasi tez tibbiy yordam boʻlimida shifokor, qizi Xaldan Qaziyeva Toshkent shahar Sanitariya-epidemiologik osoyishtalik markazi  jamoat salomatligi boʻlimi mudirasi, yana bir oʻgʻli Muhit Qaziyev 19-sonli maktabda xoʻjalik ishlari boʻyicha ishchi-xodim, kichik qizi Raya Qaziyeva uy bekasi. Mingturgʻan otaning kelinlari Maya Qalandarova tibbiyot xodimi, Aygul Nurishboyeva esa hozirda 19-sonli maktabda oʻquvchilarga taʼlim-tarbiya berib kelmoqda.

Mustaqillikning ilk yillarida Mingturgʻan otaning koʻp qarindoshlari Qozogʻistonga koʻchib ketishdi. Unga ham yur, ketamiz, deganlar koʻp boʻlgan ekan. Biroq u hech qayerga ketmasdan, shu yerda yashashni maʼqul koʻrdi. Chunki, ustoz deb boshiga koʻtarguvchi shogirdlarini, ogʻa-iniday qadrdon ovuldoshlarini tashlab ketgisi kelmadi. Shu yurtdagi tinch-osoyishtalikni, bir-birovga boʻlgan gʻamxoʻrlik, mehr-oqibatlilikni boshqa biror joydan topa olishiga koʻzi yetmadi.

Otaxon aytganidek, ovulda yashayotgan qozoq millati vakillari toʻy-maʼrakalardan boshqa vaqtda ham uyiga mehmon kelsa, yaxshi kutib olib, borini dasturxonga qoʻyadi. Eng tansiq taomlari bilan dasturxonni toʻldiradi. Oʻgʻil-qizlarini voyaga yetgunicha, biror hunarga oʻrgatishadi.

Yoshligidan ularga yerdan unumli foydalanishni, chorvachilik bilan shugʻullanishni oʻrgatadi. Ovul yoshlarining savodi chiqishiga mehnati singgan, ularga xat-savod oʻrgatgan Mingturgʻan otaning bugun ovulda hurmati baland. Mehnatlarining rohatini koʻrib, keksalik gashtini surib yashayotgan nuroniylardan biri Mingturgʻan otaning oilasi qishloqdagi ibratli oilalardan. Farzandlarini ham yurt koriga yaraydigan insonlar qilib tarbiyalagan ota hozir nafaqat oʻgʻil-u kelinlari, balki elning ham ardogʻida.

Otaxon yer yuzidagi turfa xil madaniyatlar gullab-yashnayotgan mamlakatlardan biri – Oʻzbekistonda yashayotganidan hamisha faxrlanadi.

Sevara Ismoilova.