Дўрман овули мисолида ёшлар бандлиги бўйича республика ўқув семинари ўтказилди

Ёшларни меҳнатга йўналтириш, уларга барқарор даромад манбаини яратиб бериш сўнгги йилларда давлат ижтимоий сиёсатининг муҳим йўналишларидан бирига айланди. Бу борада махсус дастур ишлаб чиқилиб, унинг ижроси ҳудудлар кесимида доимий назоратга олинган.

Айниқса қишлоқ жойларида мазкур вазифа ўзига хос ёндашувни талаб этади. Овул ва маҳаллаларда яшовчи ёшларнинг иш билан таъминланиши кўп жиҳатдан ерга, деҳқончилик анъаналарига ва маҳаллий бошқарув тизимининг фаоллигига боғлиқ бўлади.

Шу боис Ўзбекистон маҳаллалари уюшмаси раиси Қаҳрамон Қуронбоев бошчилигида Қорақалпоғистон Республикаси Амударё тумани ҳамда туманнинг Дўрман овули мисолида ёшлар бандлиги дастури доирасида амалга оширилаётган ишлар юзасидан Республика ўқув семинари ташкил этилди.

Семинар олдидан уюшма раиси туманнинг бир қатор маҳаллаларида бўлди. У ёшлар бандлигини таъминлаш борасида олиб борилаётган ишлар билан бевосита жойларда танишди, эришилган амалий натижалар ва мавжуд имкониятларни ўрганди.

Ўқув машғулоти учун Дўрман овулининг танланиши бежиз эмас. Ҳудуд аҳолиси азалдан ер билан тиллашиб, ундан мўл ҳосил етиштириб, юқори даромад олиб келишган. Деҳқончилик анъаналари авлоддан авлодга ўтиб, овул хўжалигининг асосий таянчига айланган.

Бугун ҳам қишлоқ хўжалиги овулнинг ўсиш нуқтаси бўлиб қолмоқда. Соҳа кўплаб аҳолининг, хусусан ёшларнинг бандлигини таъминлашда етакчилик қилмоқда. Шу сабабли овул тажрибаси республика миқёсидаги ўқув семинари учун намуна сифатида олинган.

Уюшма раиси ёшлар учун электрон аукцион платформаси орқали ажратилган ер майдонлари, фермер хўжаликларининг ғалладан бўшаган ерлари ҳамда аҳоли томорқаларининг ёшлар бандлигини таъминлашдаги ўрни ва аҳамиятини эътироф этди.

Ташриф давомида далаларда меҳнат қилаётган ёшлар билан яқиндан суҳбат қурилди. Бундай мулоқот дастур ижросининг амалдаги ҳолатини жойида баҳолаш, ёшларни қизиқтираётган масалаларни бевосита уларнинг ўзларидан эшитиш имконини беради.

Ёшлар бандлиги масаласи фақат иқтисодий кўрсаткич эмас. Иш билан таъминланган йигит-қиз оиласига суянч бўлади, келажагини аниқ режалаштиради, турли зарарли таъсирлардан йироқ юради. Шу боис бу йўналишдаги ҳар бир қадам ижтимоий барқарорликка бевосита хизмат қилади.

Айтиш жоизки, қишлоқ хўжалиги ёшлар учун иш ўрни яратишнинг энг қулай йўлларидан биридир. Бу соҳада йигит-қизлар йирик сармоясиз ҳам меҳнат бошлаши, тажриба орттириши ва ўз хўжалигини босқичма-босқич кенгайтириши мумкин.

Шу билан бирга, аграр соҳа ёшларга фақат бандлик эмас, касб ва кўникма ҳам беради. Ерга ишлов бериш, ҳосилни сақлаш ҳамда сотиш жараёни уларда тадбиркорлик малакасини шакллантиради, қишлоқда қолиб меҳнат қилиш истагини кучайтиради.

Ўқув семинарида Қорақалпоғистоннинг барча туман ва шаҳарларидан келган масъуллар, Амударё туманидаги барча овул ва маҳалла фуқаролар йиғини раислари, шунингдек, ҳудуддаги “Маҳалла еттилиги” аъзолари иштирок этди.

Қайд этилганидек, ёшлар бандлигини таъминлаш давлатнинг доимий эътиборидаги масала бўлиб, бу борада махсус дастур ишлаб чиқилган. Масъуллар мазкур дастур ижроси, қўлга киритилган натижалар ва олдинда турган режалар юзасидан ҳисобот берди.

Бундай вазифаларни жойларда амалга оширишда маҳалла институтининг ўрни беқиёс. Айнан маҳалла ҳар бир хонадоннинг аҳволидан, ишсиз ёшнинг қобилияти ва интилишидан хабардор бўлади. Шу сабабли дастур ижроси кўп жиҳатдан маҳалла раисининг ташкилотчилигига боғланади.

Йиғилишда маҳалла раиси ўз ҳудудининг ҳақиқий бошқарувчиси бўлиши шартлиги алоҳида кўрсатиб ўтилди. Бунинг учун у ҳоким ёрдамчиси, хотин-қизлар фаоли, ёшлар етакчиси, ижтимоий ходим, профилактика инспектори, солиқчи ва маҳалла банкирининг ҳафталик ҳамда ойлик иш режасини тасдиқлаб бериши лозимлиги, раис “еттилик” аъзоларига аниқ вазифа қўйиб, уларга бош бўлган ҳолда ҳудуд иқтисодиётини янада юксалтириш йўлида ҳамжиҳатликда ҳаракат қилиши лозимлиги таъкидланди. Бундай тартибда фаолият юритиш ҳар бир масъулнинг жавобгарлигини оширади ва маҳалладаги ишларни ягона мақсад атрофида бирлаштиради.

Қолаверса, қишлоқ шароитида ердан мўл ҳосил олиш бир хонадоннинг эмас, бутун ҳудуднинг фаровонлигига хизмат қилиши эътироф этилди. Бу жараёнда оила даромади ортади, ички бозор маҳсулот билан тўлдирилади, озиқ-овқат хавфсизлигини таъминлашга муносиб ҳисса қўшилади. Ҳар қарич ердан унумли фойдаланиш эса пировардида мамлакат иқтисодиётини мустаҳкамлайди. Натижада экспорт салоҳияти кенгаяди, қишлоқда янги иш ўринлари пайдо бўлади. Ҳалол меҳнат билан топилган даромад эса жамиятда барқарорликнинг ишончли пойдевори бўлиб хизмат қилади.

Бу йўналишдаги тизимли фаолият эса аҳоли бандлиги ва турмуш даражасини янада яхшилашга хизмат қилади. Ёшларнинг ўз юртида иш топиши, оила қуриб, ҳалол меҳнат билан яшаши ҳар қандай ҳудуднинг эртанги кунини белгилайди. Ана шу мақсад йўлида маҳалла, ҳокимлик ва масъул идоралар ҳамкорлиги янада мустаҳкамланиши зарурлиги қайд қилинди.