Doʻrman ovuli misolida yoshlar bandligi boʻyicha respublika oʻquv seminari oʻtkazildi

Yoshlarni mehnatga yoʻnaltirish, ularga barqaror daromad manbaini yaratib berish soʻnggi yillarda davlat ijtimoiy siyosatining muhim yoʻnalishlaridan biriga aylandi. Bu borada maxsus dastur ishlab chiqilib, uning ijrosi hududlar kesimida doimiy nazoratga olingan.

Ayniqsa qishloq joylarida mazkur vazifa oʻziga xos yondashuvni talab etadi. Ovul va mahallalarda yashovchi yoshlarning ish bilan taʼminlanishi koʻp jihatdan yerga, dehqonchilik anʼanalariga va mahalliy boshqaruv tizimining faolligiga bogʻliq boʻladi.

Shu bois Oʻzbekiston mahallalari uyushmasi raisi Qahramon Quronboyev boshchiligida Qoraqalpogʻiston Respublikasi Amudaryo tumani hamda tumanning Doʻrman ovuli misolida yoshlar bandligi dasturi doirasida amalga oshirilayotgan ishlar yuzasidan Respublika oʻquv seminari tashkil etildi.

Seminar oldidan uyushma raisi tumanning bir qator mahallalarida boʻldi. U yoshlar bandligini taʼminlash borasida olib borilayotgan ishlar bilan bevosita joylarda tanishdi, erishilgan amaliy natijalar va mavjud imkoniyatlarni oʻrgandi.

Oʻquv mashgʻuloti uchun Doʻrman ovulining tanlanishi bejiz emas. Hudud aholisi azaldan yer bilan tillashib, undan moʻl hosil yetishtirib, yuqori daromad olib kelishgan. Dehqonchilik anʼanalari avloddan avlodga oʻtib, ovul xoʻjaligining asosiy tayanchiga aylangan.

Bugun ham qishloq xoʻjaligi ovulning oʻsish nuqtasi boʻlib qolmoqda. Soha koʻplab aholining, xususan yoshlarning bandligini taʼminlashda yetakchilik qilmoqda. Shu sababli ovul tajribasi respublika miqyosidagi oʻquv seminari uchun namuna sifatida olingan.

Uyushma raisi yoshlar uchun elektron auktsion platformasi orqali ajratilgan yer maydonlari, fermer xoʻjaliklarining gʻalladan boʻshagan yerlari hamda aholi tomorqalarining yoshlar bandligini taʼminlashdagi oʻrni va ahamiyatini eʼtirof etdi.

Tashrif davomida dalalarda mehnat qilayotgan yoshlar bilan yaqindan suhbat qurildi. Bunday muloqot dastur ijrosining amaldagi holatini joyida baholash, yoshlarni qiziqtirayotgan masalalarni bevosita ularning oʻzlaridan eshitish imkonini beradi.

Yoshlar bandligi masalasi faqat iqtisodiy koʻrsatkich emas. Ish bilan taʼminlangan yigit-qiz oilasiga suyanch boʻladi, kelajagini aniq rejalashtiradi, turli zararli taʼsirlardan yiroq yuradi. Shu bois bu yoʻnalishdagi har bir qadam ijtimoiy barqarorlikka bevosita xizmat qiladi.

Aytish joizki, qishloq xoʻjaligi yoshlar uchun ish oʻrni yaratishning eng qulay yoʻllaridan biridir. Bu sohada yigit-qizlar yirik sarmoyasiz ham mehnat boshlashi, tajriba orttirishi va oʻz xoʻjaligini bosqichma-bosqich kengaytirishi mumkin.

Shu bilan birga, agrar soha yoshlarga faqat bandlik emas, kasb va koʻnikma ham beradi. Yerga ishlov berish, hosilni saqlash hamda sotish jarayoni ularda tadbirkorlik malakasini shakllantiradi, qishloqda qolib mehnat qilish istagini kuchaytiradi.

Oʻquv seminarida Qoraqalpogʻistonning barcha tuman va shaharlaridan kelgan masʼullar, Amudaryo tumanidagi barcha ovul va mahalla fuqarolar yigʻini raislari, shuningdek, hududdagi “Mahalla yettiligi” aʼzolari ishtirok etdi.

Qayd etilganidek, yoshlar bandligini taʼminlash davlatning doimiy eʼtiboridagi masala boʻlib, bu borada maxsus dastur ishlab chiqilgan. Masʼullar mazkur dastur ijrosi, qoʻlga kiritilgan natijalar va oldinda turgan rejalar yuzasidan hisobot berdi.

Bunday vazifalarni joylarda amalga oshirishda mahalla institutining oʻrni beqiyos. Aynan mahalla har bir xonadonning ahvolidan, ishsiz yoshning qobiliyati va intilishidan xabardor boʻladi. Shu sababli dastur ijrosi koʻp jihatdan mahalla raisining tashkilotchiligiga bogʻlanadi.

Yigʻilishda mahalla raisi oʻz hududining haqiqiy boshqaruvchisi boʻlishi shartligi alohida koʻrsatib oʻtildi. Buning uchun u hokim yordamchisi, xotin-qizlar faoli, yoshlar yetakchisi, ijtimoiy xodim, profilaktika inspektori, soliqchi va mahalla bankirining haftalik hamda oylik ish rejasini tasdiqlab berishi lozimligi, rais “yettilik” aʼzolariga aniq vazifa qoʻyib, ularga bosh boʻlgan holda hudud iqtisodiyotini yanada yuksaltirish yoʻlida hamjihatlikda harakat qilishi lozimligi taʼkidlandi. Bunday tartibda faoliyat yuritish har bir masʼulning javobgarligini oshiradi va mahalladagi ishlarni yagona maqsad atrofida birlashtiradi.

Qolaversa, qishloq sharoitida yerdan moʻl hosil olish bir xonadonning emas, butun hududning farovonligiga xizmat qilishi eʼtirof etildi. Bu jarayonda oila daromadi ortadi, ichki bozor mahsulot bilan toʻldiriladi, oziq-ovqat xavfsizligini taʼminlashga munosib hissa qoʻshiladi. Har qarich yerdan unumli foydalanish esa pirovardida mamlakat iqtisodiyotini mustahkamlaydi. Natijada eksport salohiyati kengayadi, qishloqda yangi ish oʻrinlari paydo boʻladi. Halol mehnat bilan topilgan daromad esa jamiyatda barqarorlikning ishonchli poydevori boʻlib xizmat qiladi.

Bu yoʻnalishdagi tizimli faoliyat esa aholi bandligi va turmush darajasini yanada yaxshilashga xizmat qiladi. Yoshlarning oʻz yurtida ish topishi, oila qurib, halol mehnat bilan yashashi har qanday hududning ertangi kunini belgilaydi. Ana shu maqsad yoʻlida mahalla, hokimlik va masʼul idoralar hamkorligi yanada mustahkamlanishi zarurligi qayd qilindi.