Oilaviy zoʻravonlikka qarshi mutaxassislar salohiyati oshirilmoqda

Oilada xavfsiz va sogʻlom muhitni taʼminlash, xotin-qizlarni zoʻravonlikdan himoya qilish bugungi kunda ijtimoiy siyosatning ustuvor yoʻnalishlaridan biriga aylangan boʻlib, bu borada samarali natijaga erishish, avvalo, aholi bilan bevosita ishlaydigan mutaxassislarning bilimi va amaliy koʻnikmasiga bogʻliq. Zero, zoʻravonlik holatini oʻz vaqtida aniqlash, jabrlanganga toʻgʻri munosabatda boʻlish va uni zarur yordamga yoʻnaltirish koʻp jihatdan ijtimoiy xodim, psixolog hamda mahalla xotin-qizlar faolining tayyorgarlik darajasiga bogʻliq boʻladi.

Shu maqsadda Qoraqalpogʻiston Respublikasida ijtimoiy xodimlar, psixologlar va jamoat faollarining oilaviy hamda gender asosidagi zoʻravonlikning oldini olish sohasidagi kasbiy salohiyatini oshirishga qaratilgan loyiha amalga oshirilmoqda.

Loyiha doirasida oʻtkazilgan mahalliy tahlil natijalariga koʻra, zoʻravonlikka duch kelgan koʻplab xotin-qizlar oʻz huquqlari va mavjud himoya mexanizmlari haqida yetarlicha maʼlumotga ega emas, ayrim hollarda esa qoʻrquv hamda yaqinlarining bosimi ularning yordam soʻrashiga toʻsqinlik qilmoqda. Bunday vaziyat muammoning oshkor boʻlmasdan qolishiga, oqibatda esa zoʻravonlik takrorlanishiga olib keladi.

Yevropa Ittifoqining moliyaviy koʻmagi ostida Fuqarolik tashabbuslarini qoʻllab-quvvatlash markazi va Latviyaning “Marta” tashkiloti hamkorligida amalga oshirilayotgan mazkur “Qadamma qadam – erkin va xavfsiz hayot!” nomli loyiha doirasida Amudaryo tumanida seminar oʻtkazildi. Seminardan koʻzlangan maqsad – oilaviy zoʻravonlik holatlarini erta aniqlash, xavf darajasini baholash, jabrlangan xotin-qizlarni zarur xizmatlarga yoʻnaltirish hamda ularning xavfsizligini taʼminlashga qaratilgan samarali mexanizmlarni kuchaytirishdan iborat. Loyiha doirasida “Xavfsiz va erkin hayot” oʻquv-uslubiy qoʻllanmasi qoraqalpoq tiliga tarjima qilinib, ishtirokchilarga tarqatildi.

Qoraqalpogʻiston boʻylab 7 ta hududda oʻkaziladigan oʻquv tadbirlari davomida 448 nafar ijtimoiy xodim, 17 nafar psixolog va xotin-qizlar masalalari boʻyicha inspektor hamda 273 nafar mahalla faoli, jami 758 nafar mutaxassis va jamoat faoli qamrab olinadi.

Shuningdek, “Zoʻravonliksiz oila” axborot aktsiyasi doirasida ochiq tadbirlar orqali kamida 1 500 nafar aholini qamrab olish, ijtimoiy tarmoqlarda materiallar tarqatish koʻzda tutilgan. Bu esa loyiha taʼsirini faqat mutaxassislar doirasi bilan cheklanib qolmasdan, keng jamoatchilikka ham yetkazish imkonini beradi.

Qayd etish joizki, loyihaning bosh gʻoyasi — olingan bilimni kundalik amaliyotga tadbiq etish, zoʻravonlik holatlarini aniqlash va jabrlanganlarni xizmatlarga yoʻnaltirish boʻyicha yagona algoritmni joriy qilishdir.