Оилавий зўравонликка қарши мутахассислар салоҳияти оширилмоқда

Оилада хавфсиз ва соғлом муҳитни таъминлаш, хотин-қизларни зўравонликдан ҳимоя қилиш бугунги кунда ижтимоий сиёсатнинг устувор йўналишларидан бирига айланган бўлиб, бу борада самарали натижага эришиш, аввало, аҳоли билан бевосита ишлайдиган мутахассисларнинг билими ва амалий кўникмасига боғлиқ. Зеро, зўравонлик ҳолатини ўз вақтида аниқлаш, жабрланганга тўғри муносабатда бўлиш ва уни зарур ёрдамга йўналтириш кўп жиҳатдан ижтимоий ходим, психолог ҳамда маҳалла хотин-қизлар фаолининг тайёргарлик даражасига боғлиқ бўлади.

Шу мақсадда Қорақалпоғистон Республикасида ижтимоий ходимлар, психологлар ва жамоат фаолларининг оилавий ҳамда гендер асосидаги зўравонликнинг олдини олиш соҳасидаги касбий салоҳиятини оширишга қаратилган лойиҳа амалга оширилмоқда.

Лойиҳа доирасида ўтказилган маҳаллий таҳлил натижаларига кўра, зўравонликка дуч келган кўплаб хотин-қизлар ўз ҳуқуқлари ва мавжуд ҳимоя механизмлари ҳақида етарлича маълумотга эга эмас, айрим ҳолларда эса қўрқув ҳамда яқинларининг босими уларнинг ёрдам сўрашига тўсқинлик қилмоқда. Бундай вазият муаммонинг ошкор бўлмасдан қолишига, оқибатда эса зўравонлик такрорланишига олиб келади.

Европа Иттифоқининг молиявий кўмаги остида Фуқаролик ташаббусларини қўллаб-қувватлаш маркази ва Латвиянинг “Марта” ташкилоти ҳамкорлигида амалга оширилаётган мазкур “Қадамма қадам – эркин ва хавфсиз ҳаёт!” номли лойиҳа доирасида Амударё туманида семинар ўтказилди. Семинардан кўзланган мақсад – оилавий зўравонлик ҳолатларини эрта аниқлаш, хавф даражасини баҳолаш, жабрланган хотин-қизларни зарур хизматларга йўналтириш ҳамда уларнинг хавфсизлигини таъминлашга қаратилган самарали механизмларни кучайтиришдан иборат. Лойиҳа доирасида “Хавфсиз ва эркин ҳаёт” ўқув-услубий қўлланмаси қорақалпоқ тилига таржима қилиниб, иштирокчиларга тарқатилди.

Қорақалпоғистон бўйлаб 7 та ҳудудда ўказиладиган ўқув тадбирлари давомида 448 нафар ижтимоий ходим, 17 нафар психолог ва хотин-қизлар масалалари бўйича инспектор ҳамда 273 нафар маҳалла фаоли, жами 758 нафар мутахассис ва жамоат фаоли қамраб олинади.

Шунингдек, “Зўравонликсиз оила” ахборот акцияси доирасида очиқ тадбирлар орқали камида 1 500 нафар аҳолини қамраб олиш, ижтимоий тармоқларда материаллар тарқатиш кўзда тутилган. Бу эса лойиҳа таъсирини фақат мутахассислар доираси билан чекланиб қолмасдан, кенг жамоатчиликка ҳам етказиш имконини беради.

Қайд этиш жоизки, лойиҳанинг бош ғояси — олинган билимни кундалик амалиётга тадбиқ этиш, зўравонлик ҳолатларини аниқлаш ва жабрланганларни хизматларга йўналтириш бўйича ягона алгоритмни жорий қилишдир.