Yangi kitoblar taqdimoti va ijodiy muloqot: Axborot-kutubxona markazida ijodkorlar bilan uchrashuv oʻtkazildi

Kitob – insoniyat tafakkurining bebaho mahsuli, asrlar osha ajdodlardan avlodlarga oʻtib kelayotgan buyuk maʼnaviy koʻprikdir. Bugungi globallashuv va axborot almashinuvi shiddat bilan rivojlanayotgan bir davrda, yoshlar qalbida kitobxonlikka boʻlgan mehrni uygʻotish, ularning maʼnaviy olamini boyitish, ongu tafakkurini milliy va umuminsoniy qadriyatlar ruhida tarbiyalash har qachongidan ham dolzarb va muhim ahamiyat kasb etmoqda. Aynan shu ezgu maqsadlarni koʻzlagan holda Amudaryo tumani axborot-kutubxona markazida ijodiy uchrashuv tashkil etildi. Yosh avlod qalbida adabiyotga boʻlgan qiziqishni yanada orttirish, isteʼdodli va ijodkor yoshlarni har tomonlama qoʻllab-quvvatlash maqsadida tashkil qilingan ushbu tadbir chinakam maʼnaviyat bayrami, avlodlar oʻrtasidagi jonli muloqot maydoniga aylandi.

Tadbirda elimizga tanilgan, soʻz sehri bilan minglab kitobxonlar qalbidan chuqur joy olgan sevimli ijodkorlar mehmon sifatida ishtirok etishdi. Xususan, oʻzbek adabiyotining zabardast vakili, taniqli shoir, yozuvchi, sermahsul adabiyotshunos va telejurnalist Abdulla Vahsh, shuningdek, Qoʻngʻirot tumanidan tashrif buyurgan isteʼdodli shoira va mohir tarjimon Zulayho Yoʻldoshevalarning tashrifi tadbirga alohida shukuh bagʻishladi. Ular qatorida tuman faxri boʻlmish, Oʻzbekiston Yozuvchilar uyushmasi aʼzosi, ardoqli shoira Robiya Yoʻldosheva, shuningdek, el nazariga tushgan, qalami oʻtkir va serqirra ijodkorlar – Tursunboy Abdullayev, Zulfiya Ollayorova va jamoatchilik faoli Pardagul Oʻrazbayevalar ham oʻzlarining samimiy ijod namunalari, yurak toʻridan chiqqan soʻzlari bilan davraga fayz kiritishdi. Tadbirda tumandagi umumtaʼlim maktablarining iqtidorli oʻquvchilari, adabiyot ixlosmandlari, kutubxonaning doimiy faol aʼzolari hamda keng jamoatchilik vakillari jam boʻlishdi.

Yoshlar va ustoz ijodkorlar oʻrtasidagi mazkur uchrashuv samimiy muloqot tarzida kechdi. Unda ijodning naqadar mashaqqatli, ammo shu bilan birga betakror va zavqli jarayon ekanligi, sheʼriyatning inson maʼnaviy olamini yuksaltirishdagi, uning qalb koʻzlarini ochishdagi beqiyos oʻrni haqida atroflicha soʻz yuritildi. Ustozlar ijod mashaqqati va soʻz masʼuliyati xususidagi suhbatlari bilan yoshlar qalbida adabiyotga, badiiy soʻzga boʻlgan cheksiz hurmat va muhabbat hissini yanada joʻsh urdirdi.

Uchrashuvning eng hayajonli qismlaridan biri, shubhasiz, yangi chop etilgan kitoblar taqdimoti boʻldi. Tadbir davomida Abdulla Vahsh qalamiga mansub, qoraqalpoq tiliga yuksak mahorat bilan oʻgirilgan “Men suygen hayal” nomli kitob, shuningdek, Robiya Yoʻldoshevaning teran oʻy-xayollar va yuksak badiiyat bilan sugʻorilgan yangi “Oʻzgarish” nomli sheʼriy toʻplami yigʻilganlar eʼtiboriga havola qilindi.

Mualliflar ushbu asarlarning yaratilish tarixi, ularning zamiriga yashiringan bosh gʻoya, yozilish jarayonidagi ichki kechinmalari va izlanishlari haqida soʻzlab berishdi. Taqdimot marosimida jam boʻlgan adabiyotshunoslar, kitobxonlar va ziyolilar oʻzlarining samimiy fikr-mulohazalarini bayon qilar ekanlar, oʻzbek va qoraqalpoq adabiy hamdoʻstligida, ikki qardosh xalqning maʼnaviy rishtalarini mustahkamlashda mazkur yangi nasrning oʻziga xos salmoqli oʻrni borligini alohida eʼtirof etdilar. Robiya Yoʻldoshevaning “Oʻzgarish” kitobi haqida ham eng iliq, samimiy eʼtiroflar yangradi. Ijodiy taqdimot yuqori saviyada, qizgʻin va qiziqarli tarzda oʻtdi. Taniqli ijodkorlar muallif va tarjimonning hamkorlikda amalga oshirgan ijodiy ishlariga munosib baho berib, bunday samarali loyihalar kelgusida ham bardavom boʻlishiga tilak bildirdilar.

Ijodiy kecha davomida Vatan madhi, begʻubor yoshlik, pok muhabbat, el-yurtga boʻlgan cheksiz sadoqat va yuksak insoniy qadriyatlarni tarannum etuvchi eng sara sheʼrlar, teran maʼnoli ruboiylar hamda dilrado qoʻshiqlar jonli ravishda ijro etildi. Yurakdan chiqqan bu satrlar va kuy-qoʻshiqlar yosh adabiyotsevarlar qalbida chuqur taassurot uygʻotib, ularga cheksiz ruhiy ozuqa va ilhom bagʻishladi.

Qizgʻin bahs-munozaralar va samimiy savol-javoblarga boy boʻlgan bu muloqot maydonida yoshlar oʻzlarini qiziqtirgan barcha savollarga ustoz ijodkorlardan aniq, batafsil va hayotiy tajribalarga asoslangan javoblar olishga muvaffaq boʻldilar. Shu bilan birga, havaskor yosh ijodkorlar ham katta davrada oʻzlari qalamga olgan ilk sheʼrlaridan namunalar oʻqib berib, tajribali ustozlarning qimmatli maslahatlarini, yoʻl-yoʻriqlarini va albatta, samimiy duolarini oldilar. Bu holat ularning kelgusi ijodiy parvozlari uchun ulkan qanot bagʻishlashi tabiiydir.

Tadbir yakunida Amudaryo tumani axborot-kutubxona markazi rahbariyati hamda barcha ishtirokchilar tomonidan tashrif buyurgan aziz mehmonlarga adabiyot va maʼnaviyat yoʻlidagi xizmatlari uchun cheksiz minnatdorchilik bildirilib, ularga esdalik sovgʻalari topshirildi. Samimiy va koʻtarinki ruhda oʻtgan ushbu unutilmas ijodiy uchrashuv yoshlar qalbida kitobga boʻlgan mehrni, ijodiy shijoatni yanada oshirishga va ertangi kunning yetuk maʼnaviyatli vorislarini tarbiyalashga ulkan xizmat qilishi shubhasizdir. Zero, adabiyot yashar ekan, millatning ruhi va ongi ham doimo yuksalaveradi.