Shoir Poʻlat Xudoyberganov ijodiga bagʻishlab sheʼriyat kechasi oʻtkazildi

Sheʼriyat tilini tushungan odam soʻz qadrini ham, yurt qadrini ham teran anglaydi. Shu bois kutubxonalarda oʻtkaziladigan adabiy kechalar maʼnaviy tarbiyaning taʼsirchan shakllaridan biri sifatida eʼtirof etiladi. Ular shoirning bilan kitobxonni yuzlashtiradi. Ayniqsa, oʻz yurtidan yetishib chiqqan shoirning ijodi muhokama etilsa, taʼsir kuchliroq boʻladi.

Amudaryo tumani Axborot-kutubxona markazida taniqli shoir Poʻlat Xudoyberganov ijodiga bagʻishlangan sheʼriyat kechasi boʻlib oʻtdi. Tadbirda shoira Zulfiya Ollayorova, taʼlim sohasi faxriysi Pardagul Urazboyeva, kutubxona xodimlari hamda faol kitobxonlar ishtirok etdi. Kecha samimiy muloqot ruhida tashkil etildi.

Tadbir shoirning ijodiy merosini keng targʻib qilish, uning kitoblarini kitobxonlar orasida ommalashtirish, yosh avlodda sheʼriyat va badiiy adabiyotga qiziqishni kuchaytirish maqsadida tashkil etildi. Shu bois dasturga kitob taqdimoti va sheʼrxonlik qismlari kiritildi.

Kitob taqdimoti davomida Poʻlat Xudoyberganovning hayoti va ijodiy faoliyati, milliy adabiyot ravnaqiga qoʻshayotgan hissasi haqida soʻz yuritildi. Shoir asarlaridagi insoniylik, Vatanga muhabbat, ona yurtga sadoqat, ezgulik va mehr-oqibat gʻoyalari xususida fikr almashildi. Ishtirokchilar qiziqtirgan savollarga javob oldi.

Kechaning eng taʼsirli qismi sheʼrxonlik boʻldi. Kutubxona foydalanuvchilari va xodimlari shoirning sheʼrlarini ifodali oʻqib eshittirdi. Satrlardagi maʼno va ijroning taʼsirchanligi tadbirga oʻzgacha ruh bagʻishladi. Shuningdek, mehmonlar kitobxonlikning inson maʼnaviy hayotidagi oʻrni, yoshlarni kitobga oshno qilish borasida qimmatli tavsiyalar bildirdi.

Maʼlumot oʻrnida aytish joizki, Poʻlat Xudoyberganov 1956-yil 26-may kuni Amudaryo tumanidagi Qilichboy qishlogʻida tavallud topgan. U 1978-yilda Nizomiy nomidagi Toshkent davlat pedagogika institutining sirtqi boʻlimini tamomlagan va mehnat faoliyatini shu dargohning Kimyo-biologiya fakultetida boshlagan. Aynan oʻsha yillarda uning jurnalistikaga boʻlgan qiziqishi namoyon boʻldi.

Oliygohning “Pedagog” gazetasi bosh muharriri, ustozi Mamasoli Jumaboyev bilan hamkorlikda professor-oʻqituvchilar hayoti va talabalar faoliyatiga oid turkum maqolalar yozdi, ilk sheʼrlari ham matbuot nashrlarida chop etila boshladi. Mustaqillikning dastlabki yillarida u Oʻzbekiston radiosiga ishga taklif etildi. Bu yerda koʻp yillar qishloq xoʻjaligi mavzusidagi eshittirishlarga mualliflik qildi.

Shu bilan birga, shoir Oʻzbekiston Respublikasi Ichki ishlar vazirligi Yoʻl harakati xavfsizligi bosh boshqarmasi matbuot xizmati bilan hamkorlik qildi. 2000-yildan 2017-yilgacha “Assalom, Oʻzbekiston!” telekoʻrsatuvida muxbir boʻlib ishlab, “Ibrat”, “Taʼlimning fidoyilari”, “Yuz bilan yuzlashganlar” dasturlarini tayyorladi. 2017–2019-yillarda esa “Avtohamroh” jurnalida faoliyat yuritdi.

Ijodkorning 2006-yilda “Vatan deyman”, 2009-yilda “Muhabbatsan”, 2012-yilda “Qadri baland qadrdonlarim”, 2018-yilda “Qilichboy, ona qishlogʻim”, 2021-yilda “Orzularim bir olam” nomli sheʼriy toʻplamlari nashr etilgan. 2021-yilda Oʻzbekiston Yozuvchilar uyushmasi aʼzoligiga qabul qilingan. 2020-yildan buyon Toshkent shahridagi “Barkamol avlod” bolalar maktabida va 354-sonli maktabda toʻgarak rahbari sifatida faoliyat yuritmoqda.

Qayd etish joizki, bunday kechalar yoshlarni shoirning hayoti va ijodi bilan yaqindan tanishtirish bilan bir qatorda kitobga mehr qoʻygan yoshlar safini kengaytirishga ham xizmat qiladi. Shu bois, kutubxonada shoir va yozuvchilar bilan suhbatlar, yangi nashrlar taqdimoti hamda maʼrifiy yoʻnalishdagi tadbirlar bundan keyin ham uzluksiz ravishda tashkil etilishi maʼlum qilindi.