Moʻynoq ekologiya muzeyida Vatan himoyachilari kuniga bagʻishlab tadbir tashkil qilindi

Oʻzbekiston Respublikasi Qurolli Kuchlari tashkil etilganining 34 yilligi hamda 14-yanvar – Vatan himoyachilari kuni Orolboʻyining eng chekka hududlarida ham oʻzgacha koʻtarinkilik, faxr va iftixor ruhida nishonlanmoqda. Ana shunday maʼnaviy yuksak ruhdagi tadbirlardan biri bayram arafasida Qoraqalpogʻiston Respublikasi tarixi va madaniyati davlat muzeyi filiali — Moʻynoq ekologiya muzeyida tashkil etildi. Ushbu maʼnaviy-maʼrifiy uchrashuv yosh avlod bilan harbiy xizmatchilar oʻrtasida jonli muloqot maydoniga aylanib, vatanparvarlik gʻoyalarini targʻib etishda muhim ahamiyat kasb etdi.

“Choʻqqilarda hilpirasin Vatan bayrogʻi” mavzusida oʻtkazilgan tadbir nafaqat bayram tantanasi, balki yoshlar uchun oʻziga xos vatanparvarlik darsi vazifasini oʻtadi. Unda Moʻynoq tumanidagi 3-sonli umumtaʼlim maktabining “Jasorat” maxsus sinf oʻquvchilari hamda hududda joylashgan strategik ahamiyatga ega Maxsus muhandislik qurilish boshqarmasi va ixtisoslashtirilgan tabiatni tiklash bataloni harbiy xizmatchilari ishtirok etdilar. Bu esa tadbir mazmuniga yanada salmoq va amaliy ruh bagʻishladi.

Tadbir Oʻzbekiston Respublikasi hamda Qoraqalpogʻiston Respublikasining davlat madhiyalari sadolari ostida boshlandi. Davlat madhiyasi — mustaqillik, erkinlik va milliy gʻurur ramzi sifatida yosh avlod qalbida Vatanga boʻlgan muhabbat va sadoqat tuygʻularini mustahkamlaydi. Madhiya yangragan onlarda ishtirokchilarning yuzlarida faxr, koʻzlarida esa kelajakka ishonch aks etdi. Zero, madhiya har bir fuqaroni Vatan taqdiriga daxldor ekanini his ettiruvchi muqaddas qoʻshiqdir.

Tadbirning aynan Moʻynoq ekologiya muzeyida oʻtkazilishi esa chuqur ramziy maʼnoga ega. Bu maskan bir tomondan Orol dengizining ogʻriqli tarixi va inson faoliyatining tabiatga taʼsirini yodga solsa, ikkinchi tomondan, tadbirda ishtirok etgan “Tabiatni tiklash bataloni” harbiy xizmatchilari bugungi kunda Orolning qurigan tubida “yashil qoplama”lar barpo etib, ekologik falokat oqibatlariga qarshi mardonavor kurash olib borayotganliklarini namoyon etdi. Bu esa “Vatan himoyasi” tushunchasi faqat qurol bilan emas, balki mehnat, masʼuliyat va fidoyilik bilan ham amalga oshirilishini yaqqol koʻrsatdi.

Bayram dasturi davomida maktabning “Jasorat” sinfi oʻquvchilari oʻz isteʼdodlarini namoyon etdilar. Ular ijro etgan Vatanni madh etuvchi jangovar ruhdagi qoʻshiqlar, milliy raqslar va sahna chiqishlari yigʻilganlarga koʻtarinki kayfiyat bagʻishladi. Oʻquvchilarning harbiycha intizomi, oʻzlariga boʻlgan ishonchi va chiqishlardagi jipsligi ularning kelajakda harbiy sohani tanlashga boʻlgan qiziqishi yuqori ekanligidan dalolat berdi.

Uchrashuvning eng qiziqarli qismi harbiylar va oʻquvchilar oʻrtasida tashkil etilgan viktorina boʻldi. Oʻzbekiston tarixi, buyuk sarkardalarimiz hayoti va harbiy xizmatga oid savollar yoshlarning bilim saviyasini sinovdan oʻtkazdi. Qiziqarli bahs-munozaralarga boy boʻlgan savol-javoblar jarayonida faol ishtirok etgan oʻquvchilar va harbiylar muzey maʼmuriyati tomonidan ragʻbatlantirildi.

Ushbu maʼnaviy-maʼrifiy tadbir yoshlarda Milliy Armiyamizga boʻlgan faxr tuygʻusini yanada oshirish, ularni ona yurtga sadoqat ruhida tarbiyalash hamda harbiy xizmatning sharafli va masʼuliyatli burch ekanligini chuqur his etishlariga xizmat qildi.