Шоир Пўлат Худойберганов ижодига бағишлаб шеърият кечаси ўтказилди

Шеърият тилини тушунган одам сўз қадрини ҳам, юрт қадрини ҳам теран англайди. Шу боис кутубхоналарда ўтказиладиган адабий кечалар маънавий тарбиянинг таъсирчан шаклларидан бири сифатида эътироф этилади. Улар шоирнинг билан китобхонни юзлаштиради. Айниқса, ўз юртидан етишиб чиққан шоирнинг ижоди муҳокама этилса, таъсир кучлироқ бўлади.

Амударё тумани Ахборот-кутубхона марказида таниқли шоир Пўлат Худойберганов ижодига бағишланган шеърият кечаси бўлиб ўтди. Тадбирда шоира Зулфия Оллаёрова, таълим соҳаси фахрийси Пардагул Уразбоева, кутубхона ходимлари ҳамда фаол китобхонлар иштирок этди. Кеча самимий мулоқот руҳида ташкил этилди.

Тадбир шоирнинг ижодий меросини кенг тарғиб қилиш, унинг китобларини китобхонлар орасида оммалаштириш, ёш авлодда шеърият ва бадиий адабиётга қизиқишни кучайтириш мақсадида ташкил этилди. Шу боис дастурга китоб тақдимоти ва шеърхонлик қисмлари киритилди.

Китоб тақдимоти давомида Пўлат Худойбергановнинг ҳаёти ва ижодий фаолияти, миллий адабиёт равнақига қўшаётган ҳиссаси ҳақида сўз юритилди. Шоир асарларидаги инсонийлик, Ватанга муҳаббат, она юртга садоқат, эзгулик ва меҳр-оқибат ғоялари хусусида фикр алмашилди. Иштирокчилар қизиқтирган саволларга жавоб олди.

Кечанинг энг таъсирли қисми шеърхонлик бўлди. Кутубхона фойдаланувчилари ва ходимлари шоирнинг шеърларини ифодали ўқиб эшиттирди. Сатрлардаги маъно ва ижронинг таъсирчанлиги тадбирга ўзгача руҳ бағишлади. Шунингдек, меҳмонлар китобхонликнинг инсон маънавий ҳаётидаги ўрни, ёшларни китобга ошно қилиш борасида қимматли тавсиялар билдирди.

Маълумот ўрнида айтиш жоизки, Пўлат Худойберганов 1956 йил 26 май куни Амударё туманидаги Қиличбой қишлоғида таваллуд топган. У 1978 йилда Низомий номидаги Тошкент давлат педагогика институтининг сиртқи бўлимини тамомлаган ва меҳнат фаолиятини шу даргоҳнинг Кимё-биология факультетида бошлаган. Айнан ўша йилларда унинг журналистикага бўлган қизиқиши намоён бўлди.

Олийгоҳнинг “Педагог” газетаси бош муҳаррири, устози Мамасоли Жумабоев билан ҳамкорликда профессор-ўқитувчилар ҳаёти ва талабалар фаолиятига оид туркум мақолалар ёзди, илк шеърлари ҳам матбуот нашрларида чоп этила бошлади. Мустақилликнинг дастлабки йилларида у Ўзбекистон радиосига ишга таклиф этилди. Бу ерда кўп йиллар қишлоқ хўжалиги мавзусидаги эшиттиришларга муаллифлик қилди.

Шу билан бирга, шоир Ўзбекистон Республикаси Ички ишлар вазирлиги Йўл ҳаракати хавфсизлиги бош бошқармаси матбуот хизмати билан ҳамкорлик қилди. 2000 йилдан 2017 йилгача “Ассалом, Ўзбекистон!” телекўрсатувида мухбир бўлиб ишлаб, “Ибрат”, “Таълимнинг фидойилари”, “Юз билан юзлашганлар” дастурларини тайёрлади. 2017–2019 йилларда эса “Автоҳамроҳ” журналида фаолият юритди.

Ижодкорнинг 2006 йилда “Ватан дейман”, 2009 йилда “Муҳаббатсан”, 2012 йилда “Қадри баланд қадрдонларим”, 2018 йилда “Қиличбой, она қишлоғим”, 2021 йилда “Орзуларим бир олам” номли шеърий тўпламлари нашр этилган. 2021 йилда Ўзбекистон Ёзувчилар уюшмаси аъзолигига қабул қилинган. 2020 йилдан буён Тошкент шаҳридаги “Баркамол авлод” болалар мактабида ва 354-сонли мактабда тўгарак раҳбари сифатида фаолият юритмоқда.

Қайд этиш жоизки, бундай кечалар ёшларни шоирнинг ҳаёти ва ижоди билан яқиндан таништириш билан бир қаторда китобга меҳр қўйган ёшлар сафини кенгайтиришга ҳам хизмат қилади. Шу боис, кутубхонада шоир ва ёзувчилар билан суҳбатлар, янги нашрлар тақдимоти ҳамда маърифий йўналишдаги тадбирлар бундан кейин ҳам узлуксиз равишда ташкил этилиши маълум қилинди.