Қорақалпоғистонда 8 ойда 13,2 миллиард сўмлик ноқонуний электр истеъмоли аниқланди
Электр энергияси – иқтисодий барқарорлик ва аҳоли фаровонлигининг муҳим гаровидир. Шу боисдан ҳам, энергия ресурсларидан оқилона фойдаланиш, тизимда учрайдиган қонунбузилиш ҳолатларининг олдини олиш ҳамда инфратузилмани мунтазам равишда янгилаб бориш долзарб аҳамият касб этади. “Ўзэнергоинспекция”нинг Қорақалпоғистон Республикаси ҳудудий бошқармаси томонидан бу борада тизимли ишлар амалга оширилмоқда. Соҳа мутахассислари электр таъминотидаги узилишларнинг олдини олиш, ноқонуний уланишларни бартараф этиш ва энг муҳими, яқинлашиб келаётган куз-қиш мавсумига пухта ҳозирлик кўриш масалаларига алоҳида эътибор қаратмоқдалар.
Аҳоли ва тадбиркорлик субъектлари билан доимий ва очиқ мулоқотни йўлга қўйиш инспекция фаолиятининг муҳим йўналишларидан бири ҳисобланади. Жорий йилнинг ўтган 8 ойи мобайнида бошқармага юридик ва жисмоний шахслардан жами 65 та мурожаат келиб тушган. Қувонарлиси шундаки, ушбу мурожаатларнинг 53 таси жойида ижобий ҳал этилган бўлса, қолганлари бўйича фуқароларга батафсил ҳуқуқий тушунтиришлар берилган.
Масалан, Амударё туманининг Оқ олтин овулидаги фермер хўжаликларидан бирининг раҳбари ўз объектида электр энергиясидан фойдаланиш жараёнида туман электр таъминоти корхонаси томонидан нотўғри ҳисоб-китоб юритилганидан норози бўлиб шикоят қилган. Мазкур ҳолат “Ўзэнергоинспекция”нинг Қорақалпоғистон Республикаси ҳудудий бошқармаси масъул ходимлари томонидан зудлик билан назоратга олинди. Мутахассислар мурожаатчи билан бевосита жойига чиқиб учрашди, вазиятни ўрганди ва натижада тадбиркорнинг муаммоси тўлиқ, ижобий ҳал қилиб берилди. Бу каби амалий ишлар истеъмолчиларнинг ҳуқуқларини ҳимоя қилишда муҳим аҳамият касб этмоқда.
Албатта, тизимда қонунийликни таъминлаш, энергия ресурсларини талон-торож қилиш ҳолатларига чек қўйиш йўналишида ҳам кескин чоралар кўрилмоқда. Жорий йилнинг ўтган 8 ойи давомида Қорақалпоғистон Республикаси бўйича электр энергиясидан ноқонуний фойдаланиш ҳолатларини аниқлаш мақсадида ўтказилган назорат тадбирлари натижасида жами 124 та қонунбузилиш ҳолати фош этилди. Ушбу ноқонуний хатти-ҳаракатлар оқибатида давлат манфаатларига етказилган зарар миқдори 13,2 миллиард сўмни ташкил этгани аниқланди. Қонунбузарларга нисбатан Ўзбекистон Республикасининг Маъмурий жавобгарлик тўғрисидаги кодексига асосан жами 245 та маъмурий баённомалар расмийлаштирилди ва айбдорларга нисбатан тегишли жазо чоралари қўлланилди.
2026-2027 йилги куз-қиш мавсумида аҳоли хонадонлари ҳамда ижтимоий соҳа объектларини узлуксиз ва сифатли электр энергияси билан таъминлаш мақсадида тармоқларни модернизация қилиш ишлари жадал суръатларда олиб борилмоқда. Хусусан, таъминотчи корхоналар томонидан бугунги кунга қадар ҳудуддаги 675 та трансформатор пунктлари ҳамда 1927 километр узунликдаги ҳаво электр узатиш линияларида мукаммал таъмирлаш ишлари амалга оширилди. 672 та электр қурилмаси кўрикдан ўтказиб, аниқланган камчиликлар бўйича масъулларга бажарилиши мажбурий бўлган кўрсатмалар берилди. Бундан ташқари, Қорақалпоғистон Республикаси ҳудудида фаолият юритаётган йирик саноат корхоналаридан 6 тасида махсус энергоаудит текширувлари ўтказилди. Ушбу жараёнда энергия ресурсларини тежаш юзасидан аниқ чора-тадбирлар ишлаб чиқилди ва уларнинг ҳаётга татбиқ этилиши устидан тизимли мониторинг ўрнатилди.
“Ўзэнергоинспекция”нинг Қорақалпоғистон Республикаси ҳудудий бошқармаси томонидан олиб борилаётган бу каби кенг кўламли ишлар аввало халқ манфаатларига хизмат қилади. Электр энергиясидан оқилона фойдаланиш маданиятини шакллантириш, тармоқларни замонавий талаблар асосида янгилаш ва ноқонуний ҳолатларга қарши курашиш орқали нафақат иқтисодий йўқотишларнинг олди олинмоқда, балки ҳар бир хонадонга нур ва илиқлик етиб бориши кафолатланмоқда.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
