14-сонли мактабда Навоий ва Бобур ижодига бағишланган маънавий-маърифий кеча ўтказилди

Амударё тумани Мактабгача ва мактаб таълими бўлимига қарашли 14-сонли умумтаълим мактабида ўзбек адабиётининг икки улуғ намояндаси — Алишер Навоий таваллудининг 585 йиллиги ва Заҳириддин Муҳаммад Бобур таваллудининг 543 йиллиги муносабати билан маънавий-маърифий кеча ташкил этилди. Тадбир ёш авлод қалбида миллий меросга ҳурмат, она тилига муҳаббат ва адабиётга қизиқишни кучайтириш мақсадида ўтказилди.

Мазкур тадбир мактабнинг ўзбек тили ҳамда она тили ва адабиёт фани ўқитувчилари Дилфуза Ғаипова, Феруза Хўжамуратова, Садоқат Давлетова ва Дилноза Сафарбоевалар раҳбарлигида тайёрланди. Улар ўқувчилар билан биргаликда буюк мутафаккирлар ҳаёти ва ижодига бағишланган мазмунли дастур ишлаб чиқиб, кечани ҳақиқий адабиёт байрамига айлантирдилар.

Кеча давомида ўқувчилар Алишер Навоийнинг ғазал ва рубоийларини ифодали ўқиб, унинг инсонпарварлик, эзгулик ва комиллик ғояларига йўғрилган ҳаёт йўли ва ижоди ҳақида батафсил маълумотлар бердилар. Шунингдек, Заҳириддин Муҳаммад Бобур асарлари асосида саҳна кўринишлари намойиш этилиб, унинг саркардалик жасорати, Ватанга муҳаббати ва юрт соғинчи бадиий образлар орқали ёритиб берилди. Саҳна чиқишлари ўқувчиларнинг истеъдоди ва тайёргарлиги юқори даражада эканини намоён қилди.

Тадбирда мактабнинг 5-“А”, 5-“Б”, 6-“Б”, 4-“А” ва 7-“Б” синф ўқувчилари фаол иштирок этдилар. Айниқса, мактабнинг фаол ва аълочи ўқувчилари Анаргул Узоқбоева, Мадина Жиянбоева, Чаросхон Аманбаева, Айдана Абатова, Жасмина Тазабоева, Улмекен Тўхтасинова ҳамда 7-“Б” синф ўқувчилари Чарос Турсунбаева, Фарангиз Ғайпова, Умида Юсупбоева томонидан Ватанни мадҳ этувчи куй-қўшиқлар ва мусиқаларга ижро этилган рақслар кечага янада файз бағишлади.

Айтиш жоизки, Алишер Навоий ва Заҳириддин Муҳаммад Бобур — ўзбек маънавияти ва давлатчилик тарихининг икки улуғ устунидир. Навоий Ҳиротда камол топиб, давлат ишларида фаол қатнашган, илм-маърифат ва бунёдкорликни қўллаб-қувватлаган арбоб сифатида танилган. Бобур эса Фарғонада ҳукмдор бўлиб, оғир сиёсий курашлардан сўнг Қобул ва Ҳиндистонда янги давлат — Бобурийлар салтанатига асос солган.

Навоий ижоди туркий адабиётни юксак поғонага кўтарди: унинг ғазаллари, достонлари ва маърифий асарлари инсонпарварлик, адолат, муҳаббат ва ватан туйғусини тарғиб қилади. Бобур ижодида эса шоҳ ва шоир руҳи уйғун: “Бобурнома” орқали у ўз даврининг сиёсий ҳаёти, табиати ва урф-одатларини жонли тасвирлаб, тарих учун бебаҳо манба қолдирди.

Икки буюк аждодимиз ўз ҳаёти ва ижоди билан туркий тил ва адабиётни, халқимиз тафаккурни бойитгани, ўзлигини мустаҳкамлаган билан авлодлар учун ниҳоятда аҳамиятли ва ибратлидир. Ёшлар учун Навоий ва Бобурни ўрганиш нутқ маданиятини оширади, ўтмишдан ибрат олишга, мақсадга қатъият билан интилишга, миллий ғурур ва маънавий масъулиятни ҳис этишга ундайди.

14-сонли мактабдаги тадбир ҳам ана шу мақсадларни ўзида мужассам этди. Мазмунли чиқишлар, шеърхонлик ва саҳна кўринишлари орқали ўқувчилар нафақат адабий билимларини намоён этдилар, балки миллий қадриятларимиз, тарихий меросимиз ва маънавий бойлигимизга бўлган ҳурматини ҳам ифода этдилар. Кеча давомида ўқувчилар томонидан билдирилган фикр ва таассуротлар уларнинг буюк аждодларимиз ижодига қизиқиши тобора ортиб бораётганини кўрсатди.

Мазкур тадбир ёш авлодни миллий адабиёт дурдоналари билан яқиндан таништириш, улар қалбида ватанпарварлик ва маънавий камолот туйғуларини шакллантиришда муҳим аҳамият касб этди. Бундай маънавий кечалар ёшларнинг маънавиятли ва маърифатли шахс бўлиб камол топишига хизмат қилиши билан алоҳида қадрлидир.