Таниқли ижодкор Пўлат Худойбергановнинг янги китоби тақдимоти ўтказилди
Китоб – инсон маънавиятини юксалтирувчи, унинг ички дунёсини бойитувчи бебаҳо хазинадир. Адабиёт ва шеъриятга ошно қалблар эса жамиятнинг энг зиёли қисмини ташкил этади. Амударё тумани Ахборот-кутубхона марказида ана шундай зиёли инсонлар иштирокида Ўзбекистон Ёзувчилар уюшмаси аъзоси, таниқли ижодкор ва болалар шоири Пўлат Худойбергановнинг яқиндагина нашрдан чиққан "Орамиздаги фидойилар" деб номланган публицистик ва шеърий тўплами тақдимоти ўтказилди. Ушбу маърифий тадбирда кутубхона маъмурияти, ижодкорнинг яқинлари ҳамда адабиётга меҳр қўйган бир гуруҳ китобхон ёшлар жам бўлишди.
Асар муаллифи Пўлат Худойберганов 1956 йилнинг 26 майида Амударё туманидаги Қиличбой қишлоғида таваллуд топган. Унинг илм-фан ва ижодга бўлган иштиёқи жуда эрта уйғонган бўлиб, 1978 йилда Низомий номидаги Тошкент давлат педагогика институтининг сиртқи бўлимини муваффақиятли тамомлаган. Ижодкор ўзининг меҳнат фаолиятини дастлаб шу даргоҳнинг Кимё-биология факультетида бошлаган. Айнан шу даврда унинг журналистикага бўлган қизиқиши ўзининг илк меваларини бера бошлади. Мазкур олийгоҳнинг "Педагог" газетаси бош муҳаррири, устози Мамасоли Жумабоев билан ҳамкорликда профессор-ўқитувчилар ҳаёти ва талабаларнинг кундалик фаолиятига оид туркум мақолалар ёзиб, шу билан биргаликда ўзининг илк шеърларини ҳам матбуот нашрларида чоп эта бошлади.
Мамлакатимиз мустақиллигининг илк йилларидан бошлаб Пўлат Худойберганов Ўзбекистон миллий телерадиокомпанияси тизимидаги Ўзбекистон радиосига ишга таклиф этилди. Бу даргоҳда соҳанинг етук мутахассисларидан радиожурналистиканинг барча сир-асрорларини қунт билан ўрганди. Кўп йиллар давомида қишлоқ хўжалиги мавзусига оид радиоэшиттиришларга муаллифлик қилди.
Бундан ташқари, Ўзбекистон Республикаси Ички ишлар вазирлиги Йўл ҳаракати хавфсизлиги бош бошқармаси матбуот хизмати билан яқиндан ҳамкорлик қилиб, долзарб мавзулардаги эшиттиришлари орқали тингловчилар эътиборига тушди. 2000 йилдан то 2017 йилга қадар эса у "Ассалом, Ўзбекистон!" телекўрсатувида мухбир сифатида иш олиб борди. Бу вақт мобайнида давр руҳини ўзида акс эттирган "Ибрат", "Таълимнинг фидойилари", "Юз билан юзлашганлар" каби қатор ижтимоий-маърифий дастурларни тайёрлаб, телетомошабинлар эътиборига ҳавола қилди.
Пўлат Худойбергановнинг 2006 йилда "Ватан дейман", 2009 йилда "Муҳаббатсан", 2012 йилда "Қадри баланд қадрдонларим", 2018 йилда "Қиличбой – она қишлоғим" ва 2021 йилда "Орзуларим бир олам" номли шеърий тўпламлари китобхонлар қўлига етиб борди. Шунингдек, у 2017–2019 йиллар оралиғида Ички ишлар вазирлигининг "Автоҳамроҳ" журналида мухбир бўлиб фаолият юритган. Унинг қаламига мансуб ранг-баранг мақола ва шеърлар бир қатор газета ва журналларда мунтазам равишда чоп этилиб келинмоқда.
Ижодкорнинг болалар адабиётига қўшган ҳиссаси ва кўп йиллик меҳнатлари эътироф этилиб, 2021 йилда у Ўзбекистон Ёзувчилар уюшмаси аъзоси бўлди. Бугунги кунда ҳам у ёш авлод тарбиясига бефарқ эмас. 2020 йилдан буён Тошкент шаҳри Юнусобод туманидаги "Баркамол авлод" болалар мактаби ҳамда 354-сонли умумтаълим мактабида шеърият, адабиёт ва нотиқлик тўгараги раҳбари сифатида фаолият юритиб келмоқда.
Амударё тумани Ахборот-кутубхона марказида бўлиб ўтган "Орамиздаги фидойилар" асарининг тақдимоти ҳам ана шу сермазмун ижод йўлининг узвий ва мантиқий давоми бўлди. Тадбир давомида янги китобнинг мазмун-моҳияти, унда сўз юритилган замонамиз қаҳрамонлари, уларнинг ибратли ҳаёт йўли ва хайрли ишлари ҳақида маълумотлар берилди. Шунингдек, болалар шоирининг ўзига хос услубда ёзилган самимий ва тарбиявий аҳамиятга эга шеърларидан намуналар ўқилди.
Бу каби маърифий учрашувлар нафақат ёшларнинг китобга бўлган меҳрини оширади, балки эл-юрт фидойиларининг ҳаёти ва ижоди билан танишиш орқали уларда ватанпарварлик туйғуларини янада мустаҳкамлашга хизмат қилади.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
