Ижтимоий реестрга киритилган оилаларнинг муаммолари манзилли ўрганилди
Инсон қадри, унинг муносиб ҳаёт кечириши, оилалар фаровонлиги ва ёшларнинг келажакка ишончи — жамият тараққиётини белгиловчи муҳим мезонлардан. Шу боис бугунги кунда мамлакатимизда ижтимоий ҳимояга муҳтож оилаларни қўллаб-қувватлаш, уларни камбағалликдан чиқариш, бандлигини таъминлаш ва даромад манбаларини шакллантириш масалаларига алоҳида эътибор қаратилмоқда.
Бу борадаги ишларнинг амалий ифодаси сифатида Қорақалпоғистон Республикаси прокурори Шоҳрух Аминов томонидан Амударё туманидаги Чойкўл овули ҳудудида ижтимоий реестрга киритилган оилалар ҳолидан хабар олинди. Ўрганиш жараёнида туман ҳокими Собир Хўжаметов бошчилигидаги туман масъуллари иштирок этишди.
Мазкур жараёнда хонадонларнинг ижтимоий шароити, оилаларнинг эҳтиёжлари ва уларни қийнаётган муаммолар бевосита жойига чиққан ҳолда ўрганилди. Ўрганишлар давомида ижтимоий реестрга киритилган оилаларнинг мавжуд муаммо ва эҳтиёжлари бирма-бир аниқлаб олинди.
Оилаларнинг турмуш шароити, даромад манбалари, меҳнатга лаёқатли аъзоларининг бандлиги ҳамда қўшимча даромад топиш имкониятлари атрофлича таҳлил қилинди.
Энг муҳими, аниқланган муаммоларни шунчаки қайд этиш билан чекланиб қолмасдан, уларни жойида ҳал этиш, оила аъзоларини иш билан таъминлаш, янги даромад манбаларини шакллантириш ва оилаларни камбағалликдан чиқариш бўйича аниқ чора-тадбирлар белгиланди. Бу эса бугунги ижтимоий сиёсатнинг моҳиятини — инсонни фақат моддий жиҳатдан қўллаб-қувватлаш эмас, балки унга мустақил даромад топиш, ўз имкониятларини рўёбга чиқариш ва оиласи фаровонлигини ўз меҳнати билан таъминлаш учун шароит яратиш тамойилини яққол намоён этади.
Дарҳақиқат, камбағалликни қисқа муддатли ёрдам билангина енгиб бўлмайди. Бунинг учун оилада барқарор даромад манбаини яратиш, меҳнатга лаёқатли фуқароларни иш билан таъминлаш, уларни тадбиркорликка жалб этиш ва зарур ҳолларда касб-ҳунарга ўқитиш муҳим аҳамиятга эга.
Ташриф давомида маҳалладаги ёшлар билан ҳам учрашув ташкил этилиб, уларнинг фикр-мулоҳазалари, муаммо ва таклифлари тингланди. Бугун ёшлар билан очиқ мулоқот қилиш, уларнинг ташаббусларини қўллаб-қувватлаш ва бандлигини таъминлаш ҳар қачонгидан ҳам муҳим. Чунки ҳар бир ёшнинг қўлида касб, қалбида мақсад ва ҳаётида муносиб даромад манбаи бўлса, у нафақат ўз келажагини, балки оиласи ва жамиятининг эртанги кунини ҳам барпо этади.
Учрашувда ёшларнинг бандлигини таъминлаш, уларни замонавий ва талаб юқори бўлган касб-ҳунарларга ўқитиш, тадбиркорлик фаолиятига йўналтириш ҳамда муносиб даромад топиши учун зарур имкониятларни яратиш масалаларига алоҳида эътибор қаратилди.
Ёшларнинг билдирган таклиф ва мурожаатлари юзасидан масъулларга тегишли топшириқлар берилиб, уларнинг ижросини таъминлаш бўйича вазифалар белгилаб олинди.
Ҳар бир хонадонга кириб бориш, оиланинг шароитини ўрганиш, одамларни қийнаётган муаммоларни ўз оғзидан эшитиш ва уларнинг имкониятларини ҳисобга олган ҳолда аниқ ечим топиш — самарали ижтимоий сиёсатнинг муҳим шартидир. Зеро, ҳар бир оиланинг фаровонлиги — маҳалла фаровонлиги, ҳар бир ёшнинг келажакка ишончи эса жамиятнинг эртанги кунига бўлган ишончидир.
Чарос Арслонова, туман ҳокимлигининг Ахборот хизмати раҳбари.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
